Mizo Ṭawng Zir Leh Bible Lehlinna Sawisel Hi
LLB kan zir lai khan, kan zir lai (course)-ah hian 'Maxims of Equity' hi kan zir tel ve a; Equity' awmzia chu sawi fiah lo mai ila. Equity thu thu fing tawi zinga pakhat chu 'He who seeks Equity, must do equity' hi awm a, a awmze hnai tak chu 'Equity ṭanpuina dil chu a dik hmasa ngei tur a ni (...Equity zàwm mi a ni tur a ni) tiin dah ta ila. Tin, hei lo pawh hi 'He who comes to Equity, must come with clean hands' tih a awm bawk a, a awmzia hi 'Equity ṭanpuina dil tura lo kal, kut chu a fai tur a ni' emaw, 'Equity ṭanpuina ngen tuma lo kal chu kut fai mi (mi dik) a ni bawk tur a ni' tiin dah ta mai ila. He thu fing tawi (Maxim) pahnih awmzia hi hrangin lang mah se, a sawi chhuah tum erawh chu a thuhmun tho niin a lang.
Tunlai hian Mizo ṭawng dik leh dik lo sawihona whatsapp group hi a awm nual tawh a, chungah chuan Mizo Bible lehlinna ṭawngkam dik lo nia an hriat ṭhenkhatte chu rawn tar chhuakin an chai ṭhin a. Bible (Pathian aw) sawisel ni lova Mizo ṭawnga an lehlinna ṭawngkam han khel bap bap hi chu thil thiang lo chu a ni lo vang; a kheltute khan ṭawngkam hman dan dik zawk leh a grammar ṭha zawkte hmuh chhuah tuma an khel nia a lan avangin; amaherawhchu, mi ṭhenkhat, Mizo ṭawng tlar hnih khat pawh ziak dik thei lovin Bible lehlinna ṭawngkam an han sawisel ve ngawt zel hi chu a huaisenthlakin a fel lo hlein ka hre ṭhin. Mizo ṭawng sawihona huanga awmte hi kan inenlet a ngai hlein ka hria. Bible a ni emaw, lehkhabu lehlin dang a ni emaw, mi thu ziah hrim hrim thlir lêta sawisel tumte thu ziah chu a dik/a fai hmasa tur a ni. Kawng danga sawi chuan, Bible ṭawngkam sawisel tur chuan chumi chu mitena mi thiama an ngaih tling phak a ni ngei tur a ni, Hebrai leh Greek thiam tel lam chu thu hran pawh lo ni se. Chuti lo chu, mahni ṭawng (mahni Zoṭawng) hmang dik thiam si lova mi dang thu ziah sawisel hmang Zofate-ah ṭhangtharte hi kan inchhuah mai a hlauhawm hle. A kimin Bible lehlinna ṭawngkam phei hi chu thlir let tur chuan fimkhur hle a ngai; a phur nazawng emaw Zoṭawng thiam inti nazawng emaw zir nazawng emaw sawisel chi a ni lo; Bible pawh a ti zahawm lo bawk.
Kan thlir let duh a nih pawhin fimkhur takin tih ni se; ṭawngṭai hmasak zet pawh a ṭul ngei ang; chubakah, chhut hlui leh chhut thar aṭangtein a Hebrew, Greek leh English tea chang thuhmun chi 3 tal chu tar chhuah ni se. Zoṭawng hman dan dik pangngai (usage)-in an ziak dik thiam ngei bawk tur a ni. Mi ṭhenkhatten Bible ṭawngkam an sawiselna Zoṭawng an hmanah hian dik lo a awm ṭeuh zel tho si hi chu kan inen lêt fe a ngai. Heng aṭang hian mahni engmah ni si lo va mi dang sawisel ching tak leh, mahni tawka hnam chapo tak angin kan lang thei dawn a lawm le!
Chubakah, kan sawisel dawn a nih chuan edition hnih/thum tal dah chhuak thei ila, chuti a nih loh chuan a ṭawngkam hman hi sawisel ngawt loh a ṭha ber. Mi pakhatin a sawiselna kha ka lo en ve a; mahse, Re-exited 2017-ah chuan an lo thlak daih tawh a lo ni a; mahse a sawiseltu chuan he Re-edition hi a thlir tel hauh si lo. Chuvangin, Mizo ṭawng ziah dan ṭha hmangaih mi kan nih pawhin Bible ṭawngkam sawiselna lamah kher hi chuan a mi nawlpuite hi chu (he lama mi thiam kan nih miau loh avangin) Zoṭawng zirna group neuh neuhah te hi chuan sawisel tur atan Bible ṭawngkam hi i dah chhuak zen lo vang u, hemi laka insum hrâm hrâm chu ringtute tihmakmawh zinga pakhat a ni ngei bawk ang. A thu leh hla zawngin kan khel ti mah ila, Bible zah lohna a keng tel tho tih pawh hriat tel ni se.
– Dr J.T. Vanlalngheta, PhD (Biblical Studies)