Restricted tender hi ṭhalaiten vei a ngai a ni

Mizoram mipui hian thil ho mai mai zawk hi kan khel ṭhin a. Mizoram sorkarin cheng maktaduai tam tak hnathawhna tur Covid-19 len laia pek chhuah hi ‘Restricted Tender’ a ni a, he mi awmzia chu hna awm hi a thawk thei tur hnena lilam ni tawh lovin a thawktu tur an thlan fel tawh sa chiahin a chhan theih turin hna an pe tihna a ni. Hei hi mipuiin kan sawi luai luai loh chuan he sorkar hian kum thum dawn hun a la nei sia, kan ram hmabak a thim dawn a ni. 

CM Pu Zoramthangan Assembly House-ah khan ZPM mem­ber C Lalsawivunga a chhan danah khan kum 2009 aṭanga August 31, 2020 chhungin restricted tender hmangin hna 53 pek a nih thu a tarlang a, hengte hi engtin nge kan ṭhalai lehkhathiam zawkte hian an khel loh theih le? Sorkar hna kan zawng luai luai a, mahse sorkar hnaa kan luha kan dam chhunga kan hlawh pawhin a phak ngai loh tur hi ‘duhsak zawng’ nih vang ringawt hian hna pakhat in pekah hian an hlep ṭawk ṭawk ṭhin. Hei hi kan ram infrastructure in a tuar a, hei hi ‘politics hi eizawnna’ anga kan khelh chhan a ni ve leh chiah bawk a ni. 

The Frontier Despatch chanchinbu September 7, 2020 a chhuak kha kan en chuan he sorkar hnuaiah hian Department hrang hrang pariatah lek hna 100 chuang ‘Restricted Tender’ hmang vekin an pe chhuak a, chumi belhkhawm chu cheng nuai hlir 70,000 vel a nih thu an ziak a ni. Cheng nuai tamzia hre tan chuan cheng nuai hlir 70,000 chu a tam dan tur han ngaihtuah ve ta ula! Heng te hi duhsak zawngte hnenah Restricted Tender hmangin an insem vel mai mai a ni. 

Tender pangngaiin pe chhuak se, kan construction company hrang hrang leh hnathawk thei turten han chhang sang sang se, chutah chuan a thawk thei tur an lo lang dawn a nih vei nen heti reng renga kan in vulh bik a nih chuan Mizoram hian nakinah a tuar dawn a ni. 

Congress hun lai pawh khan Restricted tender hi an hmang ve thova, duhsak zawng an invulh ve thova, mahse tunlai ang em em hi chuan an chelek lo. Tuna kan sorkar hnuaia hna sem dan en hi chuan kan ram kal dan hi a he sawt hle a, restricted tender hmanga hna pe thei bik riau pawh an awm a, ṭhangthar mithiamte hian RTI Act hmang leh chumi hmang kher lo pawhin kan ram dam leh dam lohna hnar hi i vei tlang ang u. Hei hi Korean hla leh film leh football tih mai mai vei lova kan vei tur dik tak chu a ni.

Sorkar hna ka zawng tiin ṭhalaite in buai a, chu chu hlawh (pawisa) hmuhna a nih vang a ni a, in dam chhunga lehkhathiam rual hlawh zat aia tam kha restricted tender vawi khatah hian an hlep tih hi Mizo ṭhalai hian hria ni ila kan vei ngei ngei ang tih hi ka rin ve dan a ni.