Mizo leh foreigner team

Mizoram hi kan vannei hle. India ram pawn atangin inkhel tura lokal kan lo mikhual ve ta fo mai a Tun tum hi Mizoramin Foreigner team a mikhual pangana chu German National Student team te hi an ni.

A hmain Russian Youth team, Royal Nepal Airlines Football team, Ambassador In Football, TSG 1899 Hoffenheim te kan lo mikhual tawh. Tun tumah German Students National Football Team te Mizo tlangval te nen Lammual ah bawk an inhmachhawn leh tur hi a vanneithlak hle. Kan lo mikhual tawh te chanchin tawi te tein in sawi nawn leh teh ang.

Russian Youth Team

Kum 1988 khan India leh Russia te chuan an inthian thatna nasa taka nemnghetin, khawvel ram dang te ngaihven khawpin hma an la dun a. Ram pahnih te inbiakthatna chu Mizo te pawhin a zar kan lo zo ve a. Sawrkar thuneitute ruahman angin, ram pahnih thalai te pualin Cultural Youth Exchange programme an duang a, he programme hian infiamna lam pawh a huam avangin Russia chuan India ramah Football team a rawn tir ta hial a. Vanneihthlak takin Russian Youth team te hian Mizoram an rawn tlawh ve hlauh a.Tuipui ral ram atanga Mizoram a inkhel tura lokal hmasa ber an ni.

Ni 12 November 1988, chawhnu dar 2:00 ah Lammual ah Mizoram XI nen an inkhel a. Khatih hunlaia Mizoram XI a player pawimawh leh foreigner team in Mizoram an rawn tlawh tawh chin a, la hmachhawn kim vektu defender lar tak ni thin Hrangzuala chuan "Chaltlangah kan camp a, kan theihtawpin kan inbuatsaih" tia a sawiin, an inkhel entu chungchang sawi chhunzawmin Hrangzuala chuan "Inkhel entu tam zia chu, hmuh theih zawng zawng kha chu lu hlir a ni a, line bul thlengin an thu khat thup a, Lammual leh a chhehvel mihring awm theihnaah chuan mipui an awm vekin ka hria ' tiin a sawi. He inkhelah hian Mizoram XI chu 4 - 3 in an chak a, Mizoram tan Thialthawnga, Khualchunga, Lalrova leh Lianhminga ten goal khat theuh an thun.

Russian Youth team te hian an sawi chhawn leh dan chuan inkhel a an chak loh aia mak an tih zawk chu, tlang pang leh thingkung vela inkhel entu awmte him dam taka an haw leh thei kha mak an ti hle niin an sawi.

Kha inkhela Mizoram XI team te chu :-

Sanghmuna, Zonunmawia, Lalchhuanawma (Capt), Hrangzuala, Lalneihsanga, Enthanga, F.Lalchhandama, Laldingngheta, Lalchawiliana, Tialthawnga, Khualchunga, Lalrinawma, Lalrova, F.Laltanpuia, Lianhminga

Manager : R. Thankima Coach : R. Buanthanga.

Royal Nepal Airlines Football Club

India rama Football tournament hlut leh hriat hlawh tak ni thin Bordoloi Trophy, Guwa­hati Assam a khelh thinah kum 1992 khan Royal Nepal Airlines Football Club an tel ve a. India rama Nepal team tha lokal chu Mizoram ah ngei chahchhuah ve duhin, khatih laia MFA hruaitu te khan theihtawp an chhuah a. Kum 1992 ah a vawihnihna atan India ram pawnah Mizoram team chu Kings Cup, Bhutan ah champion an ni a. Kum 1991, 92 leh 94 ah Kings Cup, Bhutan ah hian Mizoram chu champion a ni nghe nghe.

Kum 1992 a Kings Cup, Bhutan a Mizoram champion lawmna ni pah fawmin, Mizoram Football Association hruaitute leh Mizoram sawrkar tangkawp chuan kum 1992 khan Mizoram XI nen exibition match khel turin Royal Nepal Airlines FC te hi Mizoram a inkhel turin sawm an ni ta a. MFA hruaitute sawmna ti hlawhtlingin Royal Nepal Airlines Football Club leh Mizoram XI te chu ni 19 sept 92 khan Lammual ah an inkhel a. Inkhel entu an tam hle a, khatih lai kha Mizoramah tualchhung football boruak a invawrhsan tan lai a ni a. Tualchhung Football ah club tha tak tak Mizoram Police, PWD, PHE, Power Deptt club awm lai kha a ni bawk a. Mizoram XI tia hming vuahin Royal Nepal Airlines Football Club hi an lo hmachhawn a, 2- 2 in an inhneh tawk.

Mizoram aiawh a khelte chu :-

Lalchhanhima , Zohminga , Laltleipuia, Hrangzuala , Eldy, VL Thawnga, Lalruatkima, C. Chhakchhuakvunga, Lalringliana, F.Laltanpuia, Nipenga, Jack Manga, Thansanga, Lalmuanpuia, Lalthazuala, Vanlalliana

Manager : Zothangliana,

Coach : K.Kawla Director : H. Thangchhuanga Vice President, MFA

Ambassadors In Football

He team lokal dan erawh chu a dang deuh, rawngbawlna rilru puin khawvel hmun hrang hranga footballer intelkhawm ten an hmingah Ambassadors football tia invuahin, chanchintha hrilin an vak kual a, inkhelh chawlh laiin footballer ten an testimony te sawiin, Pathian thu inziahna thuziak te semin rawng an bawl thin.

Kum 1995 khan Lammualah bawk inkhel hmuhnawm a awm leh a. India hmarchhak a kristian inzawmkhawm pawl pakhat North East India Coordination on Religious Development (NEICORD) bultum a inkhelh hi bautsaih a ni thung. Ambassadors Football team a tel te hi ram hrang hrang mi an ni a, an ram a top flight football khel erawh an awm lem lo.

He team ah hian USA leh UK a mi an tam ber a, Spain leh Malaysia mite pawh an awm ve bawk. Football hmanga chanchintha hrilh chu an thupui a ni a, Ambassadors Football hi England a hmunpui nei an ni a, tun thlengin khawvel hmun hrang hrangah an rawngbawlna hi an la chhunzawm reng a. Inkhelhah Mizoram XI 3 - 4 Ambassadors Football a ni.

Mizoram team te chu :

Lalramliana, Lalthakima, Eldy-a, Hrangzuala, C.Lalrinsanga, Benjamin Zonunsiama, Zohminga, Lalneihsanga, F. Laltanpuia, Nipenga, Lalringliana, Lalthazuala, Muanzova, Vanlaltlana, Lalmuanpuia, Thansanga

Manager : Dr. Zorammawia

Coach : Robert Guite

Mizoramin mikhual duhawm a neih chungchanga khat tih hunlaia sport ziaktu lar tak leh Mizoram infiamna chanchin mumal tak vawng tha tu Pu VL Sanga (Zoeng) chuan "Foreigner team Mizoramin a lo mikhual changin, Mizo players te nen an inkhel tawk thei viau kha a ropui a, inkhel lah mipuiin kan hlut thin viau kha a lawmawm thin hle a ni' tiin a sawi.

TSG 1899 Hoffenheim

Mizoramin football lama mikhual kan neih tawh zingah chuan an la ropui ber awm e. May ni 13, 2014 zan dar 8 khan Lammual ah Mizoram XI nen an inkhel a. He inkhelah hian Hoffenheim te hian 3 - 0 in hnehna an chang. TSG Hoffenheim te hi an lokal lai khan Bundesliga table ah pawh 9 na hauh phak khawpa team tha an ni.

Mizo mipuite football hmuhnawm tak min hlui. European club tha kan ram ngeia an inkhel kan en phak kha ropui a, a lawmawm a tih loh theih loh! Kan quality insan hleihzia chu sawi tam ngai loin kan hre theuh awm e. Mizote paw’n football a hma kan sawnzia an pho lang - zir tur leh hmasawnna tur erawh ala tam hle tih hriat theih.

Mizoram XI te chu :

Goalkeepers : J Vanlalhriata, Lalawmpuia

Defenders: K Lalrinzuala, Lalruatthara, MS Dawngzela, Ricky Lallawmawma, Robert Lalthlamuana, Zothanpuia

Midfielders : David Lalrinmuana, H Lalmuankima, Lalbiakhlua, Laldingngheta, Lalrindika Ralte, R Laldanmawia, R Malsawmtluanga, Reuben Zosangpuia, S Malsawmtluanga, V Laltanpuia

Forwards : F Lalrinpuia, Jeje Lalpekhlua, MS Dawngliana, Zico Zoremsanga

Coaches : H. Vanlalthlanga, HC Zarzoliana

Manager : Lalbiakzuala

Mizoram XI : Awpa; Robert, Rinzuala, Ruatthara, Thangpuia; Tri-a, David, Didika, Mka, Mama; Jeje

Hoffenheim: Jens Grhal; Andreas Beck, David Abraham, Janic Vestergaard, Robin Szarka, Jeremy Toljan; Eugen Polanski, Roberto Firmino, Jiloan Hamad, Bruno Nazario; Anthony Modeste.

- Hmingsanga