Sawrkar laka rinawm
Kan sakhaw min zirtir dan ngaihtuah hi chuan rinawmna chungchang te hi sawi sawi ngai awm lo tak hi a ni. Mahse inti sakhaw mi em emte pawh kan rinawm hleithei lo fo chu a ni sia. Sakhaw ngaihsak lo tan rinawm a har awm mang e han ti dawn ila Christian ni lo rinawm tak tak an tam viau lawi si. Kan ban phak tawka zir hian kan rinawm loh dan hi a inchen lo a ni mai ṭhin.
Kan rinawm lohna hian mipui leh ram a nghawng a, chhungkua a nghawng a, a pawi hle. Rinawm tur chuan rilru retheih loh hmasak a ngai a, chuvangin rinawmna hi chhungkua aṭanga in zirtirin bul kan ṭan ṭhat a ngai.
Sorkar leh vantlang thil mahni ta anga en tur tihte hi chu kan hre viau a, kan zawm lem lo. Sorkar te hi kan han sawisel pang pang a, a thlawptu nih erawh kan tum lem lo a, eng rilru nge maw kan put ṭhin ni. Pen khat chu sawi loh pen chanve takngial pawh kawngpui zau leh nuam neih theih nana tawlh hnung duh lo ṭhinte kha kan ni sia. Inthiam lohna tel miah loin, "He lei ram mi kan ni lo" tiin biakinah kan zai lam dup dup lawi si.
Sorkar laka rinawm lohna chi hrang hrang a awm thei a, sorkar thil paipawn te, sorkar hnathawk ve lem lote pawh hian sawrkar tan kan rinawm lo fo mai.
Sorkarin mipui chhawr tura a thil chhawp chhuahte dimdawina tel hauh lo leh chhia se pawi tihna nei loa kan khawih chingpen fo hi sorkar tana kan rinawm lohna chikhat a ni. Power supply kan neih ṭhat loh changin kan phun mur mur a, mahse power renchem tum erawh kan awm der si lo.
Kolasib leh Bairabi inkara power pekna 132kv line chu rukru-ten tower part an ruk zel avangin thlipui leh ruahpui tuar loin kumin April thla khan tower 5 a tlu a, sum tam tak senga siam a ni. Tin, PWD Bailey bridge te pawh a bang bik chuang lo. A lak theih theih la duh mai leh herh thlawn mai pawl kan la awm a, hetianga sorkar thil rutute hi Mizo an ni deuh zel an ti lehnghal.
Sorkar thil a chhiata tuartu chu keimahni bawk kan ni. Ṭhahnem ngai takin sawiin ziak
ṭhin mah ila a chhiar tura kan duhten an chhiar ṭhin si lo a, a buaithlak hle a ni. Amaherawhchu, thil ṭha in zirtir hi i ning suh ang u. Sawi tawh pawh thil ṭha a nih chuan i sawi nawnin i inzirtir nawn fo ang u.
- B. Lalremruati (Marty Bawitlung)