KUT A ṬIAK TA

Kan hunpui ropui ber, Krismas leh kumthar chu kan hmang zo ta a. A lunglenthlak ruai ruai ngawt mai. Tunah chuan pa taima chuan mahni hnathawhna hmun lam phur takin an pan sauh sauh ang a, an hmabak an thlirin an tihtur te an zawh hun tur an bithliah ang a, phur takin an insiam sauh sauh ang. Mi thatchhia erawh chuan hnathawhna hmun lam a’n ngaihtuah ang a, a huphurh ngawih ngawih ang a, chawlhkar hnih dawnlai chawlh a hman hnu pawhin chawlh chu a la kham lo ang a, phur lo zetin a hnathawhna hmun chu a melh ang. Chu chu a ni, mi taima leh mi thatchhe inkar chu. Mi taima hma chu a kaw zawt zawt ang a, mi thatchhe hma chu tihtlakin a kaw thei lovang.

Krismas kan lawm a, a ni takah ruai theh lovin a tukah kan han theh phawt mai a. Hmun tam taka chawlh pawh ni tawh lovah chuan ruai kan theh mup mup a, a tuk leh lama nawn pawh kan la awm. Chutiang bawkin kumthar lawmnaah pawh January ni 1 a ruaitheh ta lo chuan ni 2-naah kan han theh a. A tuk Sunday zawh, thawhtan lama la nawn ta cheu pawh kan awm. Kan Krismas leh kumthar lawm zet chu kan bei nasa ngat ngat viau e. Kan sorkar pawhin December ni 20 hnu lam leh January chawlhkar khatna lamah te chuan Central lam atanga min rawn tlawh lo turin ngenna a thawn chhuak hial a. Kan nihphung leh kan awmdan mek leh kan rilru kalphung en chuan thiltih awm tak a ni. Hotu lian tan chuan hetih hunlaia meeting pawimawh emaw, tihtur bituk engemaw neih chu luhaithlak tak a ni ang. Mi pawimawh tam tak hming an han lam ang a, ‘A awm lo,’ tih zel a nih chuan mawhphurhna thutthlenga thu, mawhphur thama sorkar laipuiin a ruat, mahni chanvo hlen that tum tan chuan luhaithlak tak tur a ni.

Kan sorkar hnathawkte hi an hlawh leh an thawh en chuan vannei tak an ni tlangpui a. Chutah hnathawk tura sorkar hnathawk mimal hrang hrang nitina an thuthmuna an awm chhung hi a hranpaa ngaihtuah viau a ngai bawk. Zing dar 9.00 atanga thu a, tlai dar 5.00 thlenga thawk tur an ni a. A tul chang chuan chu aia rei pawh an thu fo tur a ni. An thuthmuna awm fo thei tur chuan hnathawh ni, pisa kai ni hi a tam a tul a, an thawh hun chhung darkar a rei a tul tih chu a chiang sa. Kan sorkar hnathawk tam tak chuan tha takin an thawk a, an tulin an buai hle mai a, an hlawh pawh an phu khawp mai. Mahse hlawh lam kiam ve chuang hauh si lova kal loh ni nei thei riau an awm tlat hi kan ngaihtuah a ngai hle mai.

Kan sorkar hnathawkte kan enkawl dan a pawimawh em emna pakhat chu an awmdan leh an khawsazia hian sorkar hnathawk ve lote hawiher leh khawsazia thui tak a hril tlat a ni. Tun dinhmunah chuan kan sorkar hnathawkte hi hlawh tam tak hmu, mahse duh duhna lama phar kual thei an ang riauva. Chu ngaihdan leh awmdan chuan kan mipuite rilru sukthlek hi thui takin a thunun tlat a. Kan sorkarin a hnuaia thawkte hi khauh tak emaw, tha takin emaw enkawl se chu sorkar hnathawk ve lo mipuite pawh hian awmphung dang, tun aia fel zawk hi kan nei theiin a rinawm. Tunah hian a manganthlak ta chu sorkar hnathawk lo mipui mimir hian thawh tam lam hi kan inelna a ni mang tlat lovin a lang a. Thawh loh apianga hlawh nei lo nghal zel tur mi tam tak pawhin chawlh hi kan phurpui em emin a lang. Chu chauh a ni lo, hnathawhna hmuna awm rei te, hnathawh hun chhung rei te hi kan inelna lam a ni lo hlein a hriat ta.

Heng kan sawi te hi a dikzia a lo lanna chu kan Synod Office chawlh neihdanah te, kan tlawmngai pawl te Office khar danah te hian a lo lang a. Dan naranin sorkar chawlh hi kan tehfung intanna a ni ta hle mai a. Chumi piahah chuan kan kohhran lam chuan kohhran anga kan ni pawimawh chu chawlh hmanga serh emaw, chawi vul emaw kan tum tlat bawk niin a lang. Chuti a nih tawh chuan mimal rilru thui tak a nghawng tawh a, mimal rilru a nghawng tawh chinah chuan a sorkar ber pawh chuan, ‘Kan rilru hi heti hi a nih avangin sorkar tan a tih theih loh,’ a leh tih leh hlauh tawh mai.

Kan hnam hi ding chhuak tura kan duh chuan mipui mimir rilruah ‘thawh tam’ ‘thawh nasat’ hi kan tuh a ngai a. Chumi kan tuh theih lohna chhan ni thei tur hrang hrang te chu kan ngaihtuah lo thei ta lo a ni.

Krismas leh kumthar lawmna hi chu, ‘Mizoramah chuan an ti nasa tak tak a nia aw,’ te ti sela. ‘Krismas lai chuan Mizote chu an pawk a, an rilru pawh a zau khawp mai,’ te pawh min ti sela Krismas hi kan ngai ropui a nih chuan a tha e. Mahse a buaithlak deuh laia chu Krismas lai lem lo pawha kan hna kan ngawrh tawk ta lo hi a ni. Krismas vuakveta kan pisa kai, ni hnih ni thum kan han dul deuh a nih pawhin Krismas vuakvet lovah chuan ‘strict’ ila, Krismas vuakveta kan mimal eizawnna hna, dawrkai, lo neih, thil siamna lam leh sumdawnna te, kan kut hnathawh te kan lo thlahdah deuh a nih pawhin Krismas vuakvet lovah chuan hnathawh dan phung ‘work culture’ khirh deuh leh nghet deuh nei ila a tha khawp ang.

Tlangval leh nula, thalai thenkhat tan chuan Weekend hian awmzia a nei ve chiah lo, thawhtan atanga mi weekend hmang ang reng maia duh duhna lama kal theia inhria kan nih chuan Weekend hian awmzia neih ngaihna a awm lo. Krismas-ah hian lungleng tak leh nuam ti taka awm tur chuan Krismas loh laia kan awmdan hian thui tak a hril awm e.