New Year's Resolution

Resolution hi JF-a chuan tumruhna, inkhawmnaa thu rawtna tiin a letling a, 'Plan' ve thung hi thil ruahmanna, thil duan chhin tiin a letling leh bawk a. Manifesto hi pawl emaw, vantlang emaw ngaihdan ziah chhuahna tiin a letling leh a. Motto hi thuvawn, thupui tiin ama Dictionary-ah a let bawk a ni.

Heng thumal kan sawi takte hi mimal emaw pawl emaw in thil tum tihpuitlinnan an hmang thei vek a, Court-ah resolution an pass a, sorkar financial planning a fuh loh chuan Zoramin a tuar a, manifesto lah political party-ten an in sawi mawi siak mai mai bawk si. Kristiante motto chu 'God first' a ni a, Resolution ṭha pui pui mimalin kan nei a, sorkarin manifesto ṭha pui pui inthlan dawna a duang ang hian kum a thar meuh chuan kan thil tih theih loh tur thil ṭha ṭha kan duang chhuak ve bawk ṭhin.

Kumin tluang tak, ṭha tak leh nuam taka hman i duh chuan i tum ti hniam rawh! Tum tihsan ringawt hian hlimna emaw lawmna emaw changkanna min pe lo tih hriat a ṭha. Manifesto ṭha pui pui siamin awmzia a neih lohzia chu kan hriat tlan vek tawh hi. Thil tih theih loh tur chu sawi rik loh law law a ṭha, mahni inbumna mai a ni. Mahni
ṭhatna leh chakna lai hriat tum ila, chung kan talent neihte chu tih pun dan i zir zawk ang u. Motor khalh i thiam loh chuan khalh lo la, khalh thiam tir i nih chuan khalh chak lo la, motor khalh thiam tak pawh ni la, chak taka khalh a ṭul hran lo, accident na mai a ni. India hnampa Mahatma Gandhi chuan, 'Mihring tha chakna hi chakna dik tak a ni lova, hneh theih loh, paukhauh nun hi chakna dik tak chu a ni' a ti a ni.

Tum neih hi a ṭha, tum neih loh hi kum hman ṭhatnan a ṭha hlei hlei, chu aia ṭha leh chu kan hmaa thil thleng uluk tak leh chik taka thlir thiama thliar thiam hi a ni. Kuminah ka tho zing tawh ang, kuhva ka ei tawh lovang, meizial ka zu tawh lovang, ngaihzawng ka nei ngei ngei tawh ang, hobby thar ka nei tawh ang. Zu ka thlah hmak tawh ang ti ti lovin, miin, chu chu ti ila an tih 'yes' ve zel ching tawh lo ila, 'no' ti a hnar dan i zir ang u! New years resolution hi a ziah a ziah chhuah ngawt tur a ni lova, facebook vela post chei chuai tur lah a ni lo.

A chet a chet chhuah pui zawk tur a ni. Pathian thu hriltu a nuna hmuh tur awm lo nen in ang khat reng in ni. Nu leh pa, chhungte Kristian an nih avanga pawr taka kristian ka ni ti ta mai mai. Mahni nihna pawha chiang lo nen danglamna a awm lo.

Hlawhtlinna nei tur chuan thil thlir zau a ngai a, kan vela thil thleng azirin kan insiksawi thiam a ṭha a, tum nghet tlet tlawt nei ila, taima em em bawk ila, mahni inrintawkna nei ila, harsatna a lo thlenin beidawn mai loh a ṭha. Chhel tak leh huaisen takin mahni thil tum chu vawn tlat tur a ni. Heng kan thil sawi zawng zawng hi hre lo fa kan awm lovang, sikul, khawtlang leh kohhranah kan inzirtir chamchi a, eng kan ang thei chuang lo a nih hi. Kan hlawhchhamna tam zawk chu kan thil tum kan dah pawimawh lutuk a, keimahni kan in theihnghilh
ṭhin vang a ni.

Thlasik nisa a kiang ang a, nipui thli a rawn thaw leh ang a, furah namen lovin leimin chanchintharah kan hre leh ang. Favang kan thleng ang a, a ngai te bawkin phunchiarte phun hun thlasikah kan kir leh ang. Mahni sitting room-a ṭhu thluang duai a TV, Computer, Whatsapp i khawih mai mai lai khan mifate chuan chawl lovin hna an thawk a, lehkha an zir tluah tlauh a ni. MCS-ah an inziak tling ang a, exam chi hrang hrang paltlangin, hna
ṭha pui pui hmuin, in lian pui pui an sak khalh leh ang che.

Rukru tak ngial pawhin mi in a rawk dawnin emaw bank a rawk dawnin emaw plan mumal tak a siam ṭhin. Plan mumal nei lova mi thil ruk emaw thilsual ti chu awlsam takin Police ten an man chhuak leh mai ṭhin. Pathian rawngbawltu ni ve si motto nei mumal lo rawngbawltu ṭha an awm ngai lova, an nunah Isua Krista nun hmuh tur a awm ngai lo; Kohhranah nihna nei eng ang mahse kan ngaisang ngai chuang hek lo. Bible chuan heti hian ringtute awm dan tur a sawi a, 'He khawvel awm dan ang hian awm suh u, a ṭha leh pawmtlak leh famkimna chu engte nge in hriat fiah theih nan in rilru a thara awmin tihdanglam lo ni tawh zawk rawh u. (Rom 12:2.)

Pathian ngaihah chuan nikhat hi kum sang khat ang a ni a, kum sangkhat hi ni khat ang lek a ni. He khawvelah hian keini mihringte hi vawi khat chauh kan dam dawn a. Nakinah, naktukah, tun kumah, nakkumah tih ai chuan tun hun hi kan thil tum tih puitlin nan a lo
ṭha ber mai. I dam hun chhung reilotea damrei i duh chuan mite hriatreng tur thil ṭha ti la. Chuti chuan i thih hnuah pawh mite thinlungah i nung reng ang. Hun kal tawh hi thawnthu a ni a, hun lo kal tur hi rinthu a ni, tun hi a takram chu a ni.

- Mpa Leto