Eirukna chungchang bawk
Zu chungchang a dai ta deuh a, eirukna erawh kan sawi bang thei dawn lo a nih hmel. Tun hnaiah sorkarin kan ram sum dinhmun siamṭhat nan kawng hrang hrangin hma a la mek a, sum dinhmun chhiat em em chhan pakhat chu eirute hi an ni.
State tin hian Cen-tral sorkar hnenah ṭanpuina pawisa a dil thei tih kan hria a, kan dil angin Central Sorkarin cheng chumi zat chu chumi scheme atan chuan mi pe tih thu te kan hre fo a ni. A tlangpuiin Central-in scheme a siam hian thingtlang mite hmasawnna tur emaw, naupang leh tarte emaw kuthnathawktute leh BPL te hamṭhatna tur hian scheme hi a siam zing hle.
Heng scheme atan hian pawisa tam tham tak a rawn dah fo a, mahse vanduai thlak takin heng scheme hrang hrang pawisa hi an siam chhan ber mipuite hnenah hi chuan a thleng tlem ṭhin hle. Sorkar Officer ṭhenkhat mahni pawisa ni miah lo tur lo it tlattu kutah heng pawisa hi a awm fo ṭhin avang hian scheme ṭha tak tak pawh a la hlawhtling tak tak thei lo a ni.
Mahni ta ni lo mi-dang thil lo la ṭhinte hi rukru kan ti a, rukru hrim hrim hi kan thil a ruk a zirin a serious dan teh a ni ṭhin. Tun laiah mi tam tak hian eirukna hi sawi nep kan tum a, "eiru thei dinhmunah ding ila kan ti ve awm tho e" ti tawk hi an tam hle. Mahse hetianga eirukna palzam taka sawi hi thil dik a ni lo, eirute tan chuan in sawithiamna ṭha tak a ni. Mi tam tak eiru thei dinhmuna ding eiru miah lo sawi tur hi an tam em mai.
Pu KL Liana hian a thuziak pakhatah chuan office kal tlaite hi eiru a chhiar tel chi an ni lo, hei hi eirukna sawi nep tumna a ni tih lam hawi zawng khan a sawi a, a dik hlein ka hria. Sorkar hnathawk pakhatin office thiltih khawm ni khuaa Rs. 50 bang vel lo hawn ta mai leh mipuite chan tur cheng nuai tel lo eiru nen chuan an pawi khawih kha a in pawi thui hleih hle a ni.
Mipuite chanai lo eiruktute hi ram hmasawnna daltu, sor-kar pawisa tihektute an ni. Chuvang chuan sorkar hian eirute hremna hi a practical thei ang bera a siam vat a ngai.
Mizoramin Lok Ayukta kan nei ve dawn ta a nih hmel a, mahse hei pawh hi alo hmang tawhte state ṭhenkhat sawi dan chuan eirukna tihrem tum nan chuan a ṭha tawk lo hle. A chhan chu Lok Ayukta hian eirute hrem na tur thu-neih-na a nei lo a, ei-ru-te hrem dan tur chungchanga thurawn lo pek (recommend) hi a thil tih theih chu a nih hmel.
Tuna kan sorkar hian Lok Ayukta hi Mizoram state-a eirukna tihtlem kawnga hlawkthlak thei ang bera kan hman theihna turin tumah hlau loa hman an lak ngei beiseiin mipuite hian kan lo thlir ṭhup dawn a ni.
- Zothansangi Hmar
College Veng, Aizawl