Written by

- Lalrammuana Sailo

Assistant Professor, Pachhunga University College & Dr. Maria Lalrinmawii, Assistant Professor, Mizoram Law College

COPYRIGHT, PLAGIARISM LEH YOUTUBE

19th September, 2020

Thuhmahruai

Copyright leh Plagiarism chungchang Mizo ṭawnga thu ziak hi chhiar tur a la tam lo mai thei a, amaherawhchu a dan tlangpui tal chu kan hriat ve a ṭul si. Tun ṭumah hi chuan Copyright, Plagiarism leh a kaihhnawih Youtube kalhmang ṭhenkhat kan hriat ve ang angte chu ṭangkaipui an awm takin tiin kan han puahkhawm ve a. Intellectual Property Right (IPR) chu mahni ngaihtuahna (idea) hmanchhuahna dikna chanvo a ni a. IPR hnuaiah hian Copyright, Patent, Trademark, Trade Secret, Geographical Indication vel a awm leh bawk a. He thu ziakah hian thumal tam tak chu Mizo ṭawnga han dah mai dan tur kan hriat loh, a sap ṭawng anga hman zui maite pawh kan nei a ni.

Youtube

Tun hnai (September 2020) maiah pawh mite chawk hlimtu leh mi hriat hlawh ber pakhat H. Rotluanga Youtube channel FTH chu Youtube lamin an tihtawpsak tih kan hria a, a pawi tak zet a. FTH channel-a video te kha FTH enkawltute siam leh an programme siama mite an ni hlawm a, Youtube-a an dah luh rualin album/ video siam a nih hunte fiah takin dahin copyright thlap se chu hetiang buaina hi an pumpelh a rinawm. Tin, an channel tihtawp chungchangah pawh FTH channel enkawltu lam hian copyright kalhmangte lo en ve deuh se, an email te en ngunin an channel setting lama hriattirna (copyright warning) a awm leh awm lohte en se chu hetiang buaina hi pumpelh theih a ni ang. Youtube lam hian warning pe loin an tihtawpsak ngawt a rinawm si loh.

Tin, Youtube-ah hian kan channel pawisa siamna atana kan hmang a nih chuan ‘Creator Studio’ kan lut ang a, chumi hnuaiah chuan Dashboard a lo awm ang a, Dashboard hnuaiah chuan Videos, Playlists, Analytics, Comments, Subtitles, Copyright, Monetisation tih te a lo awm ang a. Heta Copyright-ah hian lut ila, kan video dah hnu miin an upload nawn leh nawn loh (Matches) te, video paih tura ngenna a awm leh awm loh (Removal requests) te leh kan channel miin message an rawn thawn leh kan va thawn thlengin en theihin a awm a. Heng hi chhawr ṭangkai tur a ni.

Tin, kan hla youtube vela copyright kan tih thlap chuan mi dang pawhin lo sa vein cover video, lyric video te pawh lo siam pawh ni se, a pawisa lakluh kha a copyright neitu khawlbawm lama lut tur a nih tho avangin hla neitu tan chhiatna a awm hran lo a. Mi ngaihthlak tawh mang loh vawrh thar lehtu a nih theih bawk avangin hloh aiin hlawkpui lamah a kal zawkin a rinawm. Khawvel huap zai thiam larte pawhin an zaite lyric video lo siam an awmin remove turin an va ti lem chuang lo a, a sum lakluh kha anmahni khawlbawm lamah a luh zel tho avangin. Mizo tam tak chuan miin an hla lyric video te maw an lo dahin delete turin social media dang hmangin emaw youtube comment-na lam aṭangin emaw tibo turin kan va hriattir ṭhin a, kan boruakin tlang a thang tawh mai ṭhin a. Hetia ti kher lo hian youtube vek hmang hian langsar lutuk loin report theih a ni.

Tin, Facebook lamah pawh Youtube ang thoin Page-a video te hi sum siam nana hman theih a ni bawk a. Tun dinhmunah chuan Mizo zinga zai thiam leh hla phuah thiamte leh Youtube channel siamtu Youtuber te hian Copyright chungchang inzirtirna seminar neih an mamawh hlein kan hria a. Chuvangin tun ṭumah hian Youtube lam pawh kan han sawi thui deuh a ni.

Copyright chu thuziak te, rimawi te, lam te leh a dangte dan anga neitu, chhuah theitu, hmang theitu leh pe chhuak theitu, originality neitu nihna a ni. He copyright dan hian copyright neitu hnenah chuan lehkhabu ang chiin a ni emaw electronic ang chiin a ni emaw chhuah leh dah theihna a pe a, vantlang hnenah thehdarh turin thuneihna a nei a, vantlang hmaa chang (perform) emaw hrilh hre turin emaw thuneihna a nei a. A thu leh hlate chu film angin emaw sound record hmangin emaw a siam thei a. A thu leh hlate chu a letling thei a, version dang deuh emaw pawh a siam thei bawk.

India ramah hian Copyright Act 1957 siam a ni a, chu chu January ni 22, 1958 aṭangin hman ṭan a ni a. Hemi hnu hian vawi eng emaw zat copyright dan hi siam ṭhat a ni tawh a, chungte chu kum 1983, 1984, 1992, 1994, 1999 leh 2012-ahte a ni a. Copyright hi Department of Industrial Policy and Promotion, Ministry of Commerce and Industry hnuaiah an awm a. Kum 2012 a dan en nawn a nih khan tunlai (digital) khawvel milin copyright dante chu siam belh a ni a. Lehkhabu ziaktute, hla phuahtute leh eng emawa copyright neitute tunlai khawvel internet hmanga sum an lak luh theihna turin chanvo a siamsak a, hei hian mi hla phuahsak nawn (cover version) pawh a huam a ni. Tin, pianphunga rualbanlote chu anmahni hman tur bik atan a nih chuan copyright dan hian nasa takin a hum bawk (Chapter VI, Copyright Rule 2013).

Dan hnuaiah copyright bik kan claim dawn a nih chuan kan ngaituahna (idea) chauh ni lo, kan ngaihtuahna hman chhuahna (expression of ideas) hi thil ṭul hmasa ber a ni. Dan hian copyright neitu creativity leh originality a zahsak hle a. Chutiang bawhchhetu lakah chuan lung in tan mai bakah zangnadawmna pawisa pawh hmuh theih ala nicheu a, chuvangin mi copyright hi mahni thu thua lo hman ve chi a ni lo a ni.

Copyright tihtheihna thilte hi hetiang hian entirna ṭhenkhat lo siam dawn ila - Thu leh hla lamah chuan thawnthu te, hla te, ni tin bu (diary) te, essay, article, thusawi adt. te a huam a. Tin, rimawi lamah chuan rimawi phuah te, sava hram ri te, lui luang ri te, eng ri emaw record te pawh a huam thei a. Tin, lemziak te, lem ker te, chei mawi te, thlalak te, thil danga thlalak nem kai lehchhawn (photogravure) te, lemchan, film leh video ang chi te pawh copyright a tihtheih a. Computer programme, map, drawing leh chart pawimawh bik, hlutna bik neite pawh copyright tihtheih a ni bawk. Tin, mi thu leh hla kan letling duh a nih chuan Form VI hmangin Registrar of Copyright hnenah dilna kan ziak ang a, anni'n official Gazette hmangin hriattirna (notification) an siam ang a, author an hriattir bawk ang.

India ramah chuan copyright-in a huam rei zawng hi a tlangpuiin thil a neitu (author/owner) dam laia chhuah a nih chuan a neitu dam chhung bakah a thih aṭanga kum 60 thleng copyright neitu nihna a nei ang a, a neitu boral hnua chhuah (published posthumously) a nih erawh chuan chhuah a nih aṭanga kum 60 thleng a huam ang.

Tun hnaiah P.L. Liandinga lehlin Sherlock Holmes chu mi tuin emaw Youtube lamah a lettu phalna la hmasa loin a lo chhiar a. Hemiah hian Sherlock Holmes bu hi a copyright huam chhung a pelh tawh avangin vantlang ta (public domain) a ni tawh a, chuvangin P.L. Liandinga hian Sherlock Holmes neitu aṭangin phalna dil kher a mamawh tawh lo. Chutihrualin a lehlin sa, a lettu damlai ngeiin a phalna la hmasa lova an lo chhiar mai erawh dan bawhchhiatna a la ni a. Hetiang lam buaipui tur hian Mizoramah pawh Cyber crime Branch, Aizawl Police station a awm tawh a ni.

1. Mahni ta tur, mahni hman tur atan chauh a nihin emaw research atana kan hmanin.

2. Bihchianna (criticism leh review) atana tu thil/lehkhabu emaw kan hman leh, a puibawm tura thil dang hmante.

3. Current event leh current affairs sawi nana kan hmanin leh chutiang atana mipui hmaa thu kan sawi tein.

Copyright dan bawhchhe loa mi thuziak kan ziak chhawng duh a nih chuan ziah chhawn dan dikin kan ziak chhawng tur a ni a, tu sawi nge tih leh eng lehkhabua a sawi nge tih te hriat theih ngeiin kan ziak lang tur a ni. Ziah chhawn dan kalhmang erawh chi hrang hrang a awm a. Entir nan, tun dinhmunah Mizo Department, MZU chuan research thu leh hla ziah nan Modern Language Association buatsaih MLA Handbook for Writers of Research Papers thu ziah dan kaihhruaina bu an hmang.

Tin, hei bakah hian mi nawlpuiin an hriat thil (common knowledge) leh vantlang bungrua (public domain) a awm thei bawk. Entirnan, ‘Kum 2020-a Mizoram-a District awm zat chu sawmpakhat a ni’ tih hi mi tam takin an hriat belsa a ni a, mi tuin emaw lo sawiin lo ziak tawh pawh ni se chu chu khar chhawnsak (quote) kher a ngai lem lo. Tin, copyright chungchangah pawh mimal ta ni bik lo, ram pakhat bial chhunga mipui vantlangina kan inṭawm thil (public domain) a awm leh a, chungte chu mimalin copyright hauh a rem lem lo. Entirnan, Mizo hla hlui Lalvunga zaite hi lo sain cable TV leh internet lamah dah ta ila, mi dangin he hla an sa ve tur hi kan dang thei ngawt lo. Kan ta a ni bik lo a, vantlang ta, kan inṭawm thil a nih vang a ni.

Mizo-ah hian tun dinhmunah chuan lehkhabu leh hla tam zawkte hi dan ang thlapa copyright tih ni lem lo te an ni a. Kan lehkhabu siam chhuahte a bu hralh chhuah zat a la tlem tham avang leh copyright tih nan hian sum a lo ngaih ve bawk avang te, kan ngaihven lem loh leh kan la hmel hriat tawk loh avangtein copyright ti hi an tlem hle awm e. Mizo zingah Mizo ṭawng lehkhabuah chuan Mizoram Science, Technology & Innovation Council lama an hotupa R.K. Lallianthanga’n a lehkhabu Scientist Hmingthangte tih chu dan angin copyright a ti a. Anni Department lam hian copyright leh patent tiduh pawh an pui ṭhin.

Thu ruk (Plagiarism) :

Mi thuziak, mahni thuziak anga chhuahtu, mi thusawi mahni thusawi anga chhuahtu, mi idea mahni idea anga sawitu, danin a phal dan ang ni lova mi dang thu leh hlate la chhawngtu chu Plagiarist a ni a, rukru chi khat a ni. Chutiang thiltih chu plagiarism a ni. Thu ruk hi mi copyright bawhchhiatna a ni a, mi dikna chanvo palzutsakna a ni bawk a, dan anga hrem theih an ni. Zirlai naupang tam takina kan hman fo internet aṭanga copy/paste te, sentence-a thumalṭhenkhat tlem kan thlak a, mahni ziah anga assignment kan ti mai ṭhin te leh thu kan lakna (source), reference, footnotes emaw quotation awm miah loa kan ziah anga kan tih ṭhinte hi plagiarism hian a huam tel vek a ni. Kum 2012 khan Delhi University Vice Chancellor (2005-2010) Deepal Pental pawn plagiarism chungchangah buaina a lo tawk tawh a. Biotechnology chungchanga Prof. P.Parthasarthy thuziak ru anga puh a nih bakah dan phal loha chemical chi khat Cobalt University Science lab hmang ru anga puh a ni.

Khawvel thiamna sang zelah thuziak lak chhawn a nih leh nih loh endikna khawlte an siam chhuak ta zel a. Internet-ah hian lehkhabu tam tak leh thuziak tam tak dah luh a ni tawh a, tin, zirchianna thuziak (research paper leh thesis) te pawh tam tak dah luh zel a ni a. Tun dinhmunah Mizoram University-a department tam tak chuan thu ziak endikna atan Turnitin software an hmang mek a. He khawlah hian thuziak chu a soft copy kan barh lut ang a, khawl chuan thuziak chu en dikin, mi dang ziak lak a ni nge ni lo tih te, mi dang ziak a lo la tel a nih chuan a lak tam zawng percentage zat te a lo sawi dawn a ni. Hei lo pawh hi en dikna khawl dang pawh a awm tho.

India ramah chuan lehkhabute copyright ti tur hian copyright website http://copyright.gov.in/-ah kan lut ang a, account kan siam ang a. Heng account siamna atan hian PAN card, voter’s id card, aadhaar card, bank account thlalak, cancelled cheque thlalak te hman ṭul hun a awm theih avangin inrin lawk a ṭha. Tin, lehkhabu chu mi dang kan chhuah (publish)-tir a nih chuan a publisher hnen aṭangin No Objection Certificate (NOC) lak a ngai bawk. Account siam hnuah online hmangin form hi fill-up theih a ni a, online hmang vekin fee chawi ngai pawh pek nghal theih a ni a, bank office lamah pawh a pek theih bawk. Lehkhabuah chuan copyright tihna man hi tun 2020-ah hian lehkhabu pakhat zelah Rs. 500 a ni. Form kan dah khah, online-a kan thehluh hnuah chuan lehkhabu bu hnih leh kan fee pekna leh form kan fill-up-na lehkha (acknowledgement slip) nen a hnuaia office address-ah hian dak hmangin kan thawn tawh mai dawn a ni.

Office of the Registrar of Copyrights

Ministry of Commerce and Industry

Boudhik Sampada Bhawan,

Plot No. 32, Sector 14, Dwarka,

New Delhi-110075

Email Address: copyright@nic.in

Telephone No.: 011-28032496, 08929474194

Biakrawn :

1. The Copyright Act, 1957 (14 of 1957)

http://copyright.gov.in/Copyright_Act_1957/index.html

2.The Copyright Rule, 2013

http://copyright.gov.in/Copyright_Rules_2013/index.html

3. Copyright office Govt. of India

http://copyright.gov.in