MNF mu tan Chalfilh

Ruling Party meuh MNF chuan Candidate an la set zo ve thei lova an mu tan chu Chalfilh bial a ni. Chalfilh bial hi Speaker Pu Lalrinliana Sailo bial a ni. He bial hi Speaker hi chhuhsak an tum a, an tih fel tawh hnuah Speaker hian 'MNF hi ka puan ang che u' tia vauna a phuh chhuah avangin an puang ngam lo va, MNF hian Pu Rinliana dintir hreh si; dintir lo ngam si lovin an awm ta a. Pu Rinliana an tih dan hi a khawngaihthlak zozai a ni.

Pu Lalduhoma bàn chungchang an sawi khan Pu Rinliana hi a bàntu a ni a, MLA hektu mi 12 an awm bawk a. Bàn tur tura nawrtu chu mi dang an ni a, mipui pawhin kan ringhlel tawh hle a ni. Pu Rinliana hi Chalfilh Bial an pek dawn loh chuan a thil hriat sawi chhuahah a vau an ti a, a dik a nih chuan hriat chakawm tak a ni.

Chalfilh Bial MNF hruaitute hian Candidate tur an lo zawng hmanhmawh an ti bawk a. Pu Zoramthanga pawhin a bial hnihna atan a hauh an ti phawt a. Pu Lalruatkima hming pawh a lang ve zawk hman a. Minister lo zingah hian MNF party hruaitu 5 vel an hming a lang an ti bawk a. Chalfilh hrim hrim hian Pu Rinliana ni lo hi an zawng an ti a, a dik a nih chuan bialtu tán chuan thil ngeiawm a ni.

Pu Rinliana paih tum chhanah hian USA a zina a thu sawi vang kha niin an sawi a. Chu bakah chuan Assembly hnathawktu lak danah khan a chhungte a thun nasat avangin MNF a tihmingchhia an ti. Chhungte thun kan tih dawn chuan Khawzawl DC Office thawktu hi X Ray ve mai ila, tu chhungte nge tam? tih chu kan hre mai ang. Advertisement tel lova Home Department hnuaia police lak pawh hi a tam tham a, I&PR ah pawh bial pakhat mi leh sa an hnawhkhawm a, AH & Vety pawh hi Minister an chawlh tur tak khan a sawp nasa a, Lengpuia Bike intlansiakna siamna CSR aṭanga pawisa lo kal pawh hi mi dang hminga tu fapa hnathawh nge? tih te zawt ve ila, Pu Rinliana aia che na hi an va tam ve.

Pu Rinliana hi 2018-a MNF boruak vaw sang tura an lakluh kha a nia, tuna taka paih tumna awm hi a khawngaihthlak hrim hrim. Chutih lai chuan MNF hian Candidate an set theih loh chhan hi Pu Rinliana ni kher lo pawhin chhan dang vang a ni thei tho a, Ruling Party Candidate set buai map hian kum 5 chhunga Ruling chet buaizia a nemnghet a ni.

- Lalremliana, Bethlehem Veng