LEHKHABU PHO RUNPUI – 3

Mizo Writers Association (MWA) huaihawtin Vanapa Hall Hulhliapah Sept. 11 – 16, 2023 chhung khan Lehkhabu Pho Runpui Vawi thumna neih a ni leh ta a, lehkhabu chi hrang hrang sang chuang tehmeuh pho chhuah leh a ni.

Lehkhabu Pho Runpui (LPR) hi ṭangkai leh hlawk taka buatsaih a lo ni tawh ṭhin a, a buatsaihtute lam chuan hlawkna nei lo mah se la, lehkhabu ziaktute leh photute lam chuan hlawkna nasa tak an nei thungin; chutiang tura buatsaih chu a ni bawk a. A ṭan ni, a hawnna niah hian Lehkhabu 17 chu a hlawma tlangzarhna hun buatsaih a ni a, chu'ng Lehkhabu tlangzarh tharte chu hengte hi an ni;

1. Ka hla phuah leh lehlinte - Rozama Chawngthu

2. Thinlung Tuihna - Tharbawihi Colney

3. Ruam Rai Thuruk - C. Lalnunchanga

4. Mizo Culture - B. Lalthangliana

5. Tales of Man Singh - Lalzarzova Khiangte (Letlingtu)

6. Sunsets and Lovers - Debbie Rinawmi

7. Lo neitu fapa - R. Vanhnuaithanga

8. Ka rawn fang leh - C. Laizawna

9. Krismas Drama - Mamawii Colney

10. Manipur Rambuai - Tluanga Chhakchhuak

11. Kei leh Salem Boarding - C. Rochungnunga

12. Ziakfung Zalen - H. Lalawmpuia

13. Naupang enkawl leh kaihhruai dan - C. Lalrinchhana

14. Zukbual - R. Nelson

15. Mizote Thlang Tlak dan - C. Chhuanvawra

16. Khawhar hla bu - C. Chhuanvawra

17. Tuipui ral fan thu - Mizo Writers Association

Heng Lehkhabu bakah hian mi dang ziak leh buatsaih Lehkhabu ṭhahnem tak pho chhuah a ni bawk a, hriat theih chinah MWA (Mizo Writers Association) member 115 lehkhabu pho chhuah a niin Lehkhabu hi chi hrang hrang 1200 vel ni bawka hriat a ni.

LPR-3 chhungah hian ni tina Lehkhabu hralh tam dan chhinchhiah zel a niin; ni ruk chhunga Lehkhabu pho chhuahah khan hengte hi Lehkhabu hralh kalzual Top Ten –te an ni a;

1. I Thu ber lo - Dr. C. Lalhrekima

2. Mizoram Politics Bihchianna - K. Remruatfela

3. Mala Malna - Loretta Khawlhring

4. Ram Kalsiam - Mahmuaka Chhakchhuak

5. Manipur Rambuai - Tluanga Chhakchhuak

6. Theih Ni Se - Zosangzuala (Red Wheelchair)

7. Pherzawl Titi - L. Keivom

8. Ziakfung Zalen II - H. Lalawmpuia

9. Thinlung Tuihna - Tharbawihi Colney

10. Ruam Rai Thuruk - C. Lalnunchanga

Organizing Secretary report-a kan hmuh danin LPR-3 chhung hian Lehkhabu zawrhna aṭanga sum leh pai hmuh hi a vaiin Rs. 1,022,178/- a ni a, a lawmawm hle a ni.

He LPR-3 hi thil lawmawm tak a niin Lehkhabu ziaktute tan phei chuan lawmna tur hi sawi tur tam tak a awm thei ang. A bik takin Lehkhabu ziaktu kum lama naupang zawkte tan a vanneihthlak ngawt mai. A leitu lam tan pawh hetianga hmun khata Lehkhabu sang chuang pho chhuah hi thil lawmawm tak a niin, man tlawm zawka lei tur a ni lehzel hi a vanneihthlak. Kum upa lam leh zirlaite tana Pu B. Lalthangliana kutchhuak lehkhabu chi hrang hrang pho chhuah tur a lo awm hi a lawmawm hle bawk a, Lehkhabu thar ber ber leh hlui tak tak, chhut nawn leh pawh beiseiawm loh tak tak tur pho chhuah a niin hi thil lawmawm tak a ni. Pakhat chauh han sawi lang ila: ZORAM ENCYCLOPEDIA (Zoram Tinreng Bu) Pu B. Lalthangliana ziak kha kum 2003 daih tawha ziak ni mah se la, man tlawm taka zawrh chhuah a ni a, hralh a kal hle mai. A bu lah chu an dahna lam a zir loh avangin a hmelhem deuh a, ṭhenkhatte tan chuan zawrh chhuah tlak loh tur ang hiala ngaih tur pawh a ni thei ang. Nimahsela, a chhung thu avang zawk chuan an duh hle mai thung a, pho chhuah ang ang chu hralh zawh a ni hialin ka hria.

Pawn lam aṭanga Lehkhabu pho chhuah thlir tura rawn kal tam tak zingah zawn bik neia rawn kal an awm rualin a hmuna duhthlang chawp tam tak an awm bawk. Chungte chu a zuartu lamin an lo dawnsawn dan azirin an lei chawp mai deuh ni pawhin a hriat. Lehkhabu hi thawmhnaw zawrh anga zawrh chi a nihna lai a awm a, hriat chiansa loh phei chu hmanhmawh lo taka thlir hmasak ngai ve tak a ni. Lehkhabu ziaktu hming langsar tak tak an awm a, anni kutchhuak chu hralh pawh a kal nge nge a, a zuartu lam tan pawh comment hran an ngai lem lo. Ziaktu hming langsar lem lo leh hriat lar loh tam tak an awm bawk a, anni tana hetianga an kutchhuak Lehkhabu phochhuahna hun remchang a awm hi a vanneihthlak ngawt mai. MWA hruaitu zingah ni tin uaptu an awm thei reng kha a lawmawm ngawt mai bawk a. Hmun hrang hrang aṭanga rawn kal zingah thlalakpuitu eng emaw zat an awm bawk a ni.

Lehkhabu chhiar hi kan peih tawh lo han ti bawk ṭhin mah ila, ṭhalai zingah lehkhabu ṭha ngaihven kan la tamzia tun LPR-3 ah hian hmuh theihin a lang a, a lawmawm hle a ni. Cheng sang tam tak senga pawm haw tawn tawn tur khawp lehkhabu lei hmel hmuh chu thil lawmawm tak a va ni em. A buatsaihtu MWA hruaitute hnenah lawmthu sawi tur tam tak a awm a, hetiang thil buaipui tura an ngaihtuahna an seng leh, Chunglamin min hlawhtlintir zel bawkte hi lawmthu sawina tur ber a ni bawk.

- Mahmuaka Chhakchhuak