Kelkang aṭanga ka thil hawn

Chanchinbuah hian ka la ziak ve ngai lo a, Pu R.Vanlalzauvaten min cho chhuak taah ka ngai.

2015 khan Kel-kangah kan kal ve a, ka thil hawn chu kan Synod leh Central YMA te pawhin an ngaih pawimawh em em, kan hnam intodelhna tura Cement Mistiri an zirtir chhuah, a hlawhtlinna Kel-kangah ka han hmu daih mai. Anmahni ngeiin an Biakin an sa a, anmahni ngeiin an chenna In an sa hi ropui ka ti a ni.

Kelkangah hian tisa lam thil, hnam anga hmasawnna turah pawh hlawkpui tur kan nei tlat a ni. Aizawlah chuan, vai Mistiri an indaih lo a, Mizo mistiri-in hna thawh tur an hmu zo lo tia sawi an awm tlat.

Miten kan Mizo Mistiri te hi eng tin nge an sawi, "An lo thleng tlai ṭhin a, an chawlh chhung a rei a, an mei zuk chhung nen, hauh an haw bawk si, vai Mistiri rawih a hlawk zawk, an ti ṭhin.

Kan Synod leh YMA te hian heng ang zawng zawng hi hre vekin tlangval tha zual thlante an trained tir tlangpui a. Mizote work culture - in lawm a, a huhoa hlim taka hnathawk ṭhin kan nih avangin in hauh leh in sawisel kan la pal zam thei chiah lo a ang khawp mai. Keiniho hi chu, "chawl rawh, chawl rawh” in hah lutuk ang, inti ṭhin kan nih miau avangin.

Hnam dangho chuan thuneitute an hlau thiam a, hna-thawhna hmuna an kal chiah ding mai mai hmuh tur an awm ngai lo. Mizote erawh min ruaitute tih lawm kawngah kan pachhe hle.

Kum 2002 khan in sak ve ka tum a, Mizo mistiri ngei ka zawng a, a fel khawp mai a, vai zingah kum tam tak lo thawk tawh a ni. Kan hnampui Mizo mistiri ngei hi ruai ila kan hnam tan kan hmasawnna tur a ni ang.

Vaiho hi chu an fing a, a ruaitute min tilawm a, nei leh nei lo hian rawih reng kan duh mai a ni. Vawi khat chu ka vai hian min bum ni hian ka hre tlat a, Ka leilet-ah buh tin 150 ka hauh laiin ṭin 100 chauh min pe fo a, ka hau va, a ngawi reng. Ka in ngaihtuah harh a, buh lak laiin hlawhfa ka ruai a ka hauh zat ka la kim thei ṭhin. Anni aia fing zawka awm tum ang u.

A tawp ber atan chuan thlarau lam leh tisa lama min hruai harh tum a, ram hmasawnna tura kan hruaitute thu hi zawm ila, thlawp bawk ila. Mahni chenna tur in leh kan Pathian Biakin sa tur hian kan pute trained chhuah ngei Mizo mistiri-te chauh hi hnam dam nan i chhawr ang u.

- H.D. Pachhunga, Chaltlang