PATHIAN LEH KAN RAM TAN

Mizorama chengte zinga tam zawk hi kristian kan ni a, 'Mizo’ inti chin zingah phei hi chuan Kristian inti lo an awm a nih pawhin an tlem ngawt ang. Kristian innghahna bulpui chu Lal Isua leh a zirtirna zuitu nihnaah hian a ni. Thildang a tel thei lova, kan rinna innghahna foundation pawh a ni. 

Kan rinna innghahna bulpui chu Doctrine ti pawhin a sawi theih nghal bawk. Chumi zir zau leh zirchianna subject lam chu theology kan ti thei ta bawk. Kan thurin kan zirna leh innghahna chu Isua leh a chanchin, a zirtirna kan hmuh theihna Bible aṭangin kan teh tur a ni. 

Isua zuitute ni-a inchhal­te chuan Isua nihna leh a zirtirna kan pawm a, kan vuan a, kan nunpui atan kan senglut thlap a, a thusawi te pawh innghahna berah kan neih ngei pawh a ngai. Chutianga Isua zuitu leh a thusawi ringtute chu Krisian tih kan ni. 

He thu Pathian leh kan ram tan tih pawh hi khaw­vela kan awm a, Isua kan ringa kan zuina kawng khawih leh nghawng awmze nei thei a nih avang hian, chik taka Bible zirtirna eng aṭangin zir ni sela, a nih ang anga mihring nun chawktho thei, thumawi, thu lungkuai a nih theihna lai chauh innghah nana hmang a, phehthlak emaw sawimawi emaw ngawt chi a ni hauh lo. Ṭawngkam thiam leh sawitlawr thiam vanga dik leh dik lo tih ṭanfung suihmam ngawt chi lah a ni hek lo. Kan enchianna tur ber chu  kan Bible a Isua zirtirna kalhmang a ni em a ni lo em, tih ni sela a ṭhain a ziktluak ngei ang. 

Pathian tih dawtah hian leh tih a awm avang hian, belhtu a awm a, Pathian chauh chu a ni ta lo phawt. Thildang telve, belhchhahna a awm ta hi enzui a ngaihna a ni bawk. Leh tih dawt chiahah hian 'kan ram tan' tih a ni leh. Chumi awmzia nia lang ta chu Pathian tan leh kan ram tan tihna a lo ni thei ta a, pahnih (2) rawngbawl tura inpekna a ni a tih theih ta bawk ang chu. A sapṭawng chuan 'For God and our country' ti pawhin kan sawi thei ang chu. 

Pathian hian zakkep neih tel a duh lova, amah zuinaah hian belhchhah emaw, ngaih pawimawh dang neih emaw hi a duhdan a ni lo ngei chuan a hriat a ni. Sum rawngbawl leh Amah Pathian rawngbawl kawp a theih loh e, tih a sawifiah. A thilsawi tifiah turin, khatih laia mite man thiam tur khan, Amah ngeiin a thilsawi tur tihfiah nan a milpui chiah a rawn phawrh hmasa bawk. 

Chu chu Chanchinṭha Luka ziak 16:13 ah , chhiah­hlawh tumahin hotu pahnih rawng an bawl kawp thei lo; pakhat huain pakhat a duh ang, a nih loh leh, pakhat ṭanin pakhat a hmusit ang. Pathian leh sum rawng in bawl kawp thei lo ve,  a ti a, tiin ziah lan a ni ta a ni. 

Hemi aṭanga lo lang chu, Pathian leh kan ram tan tih chu thu inkalh, Isua zirtirna eng aṭang chuan, a him ta hauh lovin a hriat theih ta a ni. Hotu pahnih, Pathian ... leh kan ram  rawngbawl tura infuih leh zirtirna anih miau avangin. 

Tichuan, hei hi zirtirna dik lo, inkaihhruaina kawngbo a lo nih hlauh theih avang te, Kristian ramah Kristian doctrine kalh let tawpa inawih tleina a lo nih theih avangin he thu hi chu in hnuhkhawmna thumawi atan pawh hian hman ni tawh lo ta se. Chumi aiah chuan, Amah Pathian hming kan lam tel duh a nih rau rau pawhin Pathian leh A ram tan tiin au ta ila. A sapṭawnga kan sawi duh a nih pawh in 'For God and His Country' ti ta ila, Kristian thurin chu a kalh theihna lai a bo vek zawk bawk ang. 

Kum tam tak, mi tam tak lo in awihtleina leh ṭhenkhat chuan ngaihtuah chik hauh lova kan lo ṭahpui hial tawh ṭhin pawh a ni thei.  Chuvang chuan, ṭawngkam thiamna leh thu chheh kual thiamna tlawhchhana la humhim hram hram duhna te pawhin zung a kaih thuk viau thei tih pawh a hriat theih. 

Nimahsela he thu hi kan pawm dawn emaw kan hnawl dawn a nih pawhin a Biblical em tih aṭang chauh a en ni teh se. Hnial pahrat chhuah a, a sawitu nen lama chirhtheh zui chakna thinlung pawh a lo piang zut zut thei. Mahse Isua sawi hian a mil zawk a nih chuan Kristian, Lal Isua zui duh a, a zirtirna pawm emaw, pawm tlat tum tan chuan sawiselna leh chirhthehna karah a awmzia a dang lam chuang hek lovang. 

He thu hi han chhutzui a, rilru te senga an mipuiten thurin leh kaldan tur an hriat theih nan Kohhran hruaitu te, Theology lama degree nei ṭha tak takte pawh hi luhchilh thuk turin ka ngen bawk a. Chutih laiin  uar taka khawlaia sawi ṭhin te pawhin kawngbona aurawl an chhuah palh thei tih inhria in ngaihtuahna lo seng nawn ve thei sela a duhawm khawp mai. 

Chuti a nih loh a, Isua zirtirna kawng kalh zawng a ni tih hriat hnu a, an la au zel a nih erawh chuan chutiang mite chu Isua avanga Bak lenga tlanchhiatsan emaw hial pawh Kristiante chuan kan tih a la ṭul thei hial ang.