HRIPUI LEH CHHIAT NI ṬHAT NI

Mizote hi chhiat ni that ni-ah in lenpui tel tel ṭhin kan ni a. He kan thil chin than hi vawi lehkhata sim thut chu thil har tak a ni ngei ang. He hripui COVID-19 boruak avang hian kan Mizo tlawmngaihnaah te, chhiatni ṭhatni chung changah te hian kan inher rem hret hret chu a ngai ta niin a lang. 

Mitthi chung changah vui huna kal thei zat tur LLTF/ VLTF ten an ruahman sak ṭhin a, sorkar thuchhuakah mi 50 bak kal khawm phal loh tih a ni. Heti chung hian kan thahnem fu zel mai si, duty te tan lah lo inhnar ngawt kha thil nuam a nih si loh chuvangin, mahni ṭheuh hi kan in siam rem a ngai ta. 

Veng dangah mitthi kan chhungte hnai vai tak tak an nih chuan kal ngei chu a ṭha alawm, mahse hmelhriat na zawngah chuan kal lo ngam ila, kan veng chhungah pawh veng dang aṭanga an chhungkhat hnaivai tak tak lokalte kian ta ila. Thangṭhat lak lo tum phet te pawh sim a hun, kan ngaih pawimawh tak pawh thi se boruak en a kal chi nge chi loh tih thliar hram hram zel ila. An ṭhenawm hnaivaite phei chu nakinah an kalsan an chhungte hnem tur khan kan la pawi­mawh daih zawk. 

Tunlai phei chuan Aizawl veng tin fimkhur kan ngaih hunlai a ni a. khawhar chhungte ina kan len a, hnem anga kan inngaih lai te leh inneih kan va lawmpuina aṭang te hian, he hripui hi tu chungah nge tla dawn a, tunge kai dawn tih kan hre tlat lo. Thil ṭha ti nia kan inhriat laia kan thiltih vanga hri kan kai a, a theh darhtu kan nih hlauh chuan pawi tak tur a ni. 

Keimahni vanga vanduaina (thihna) hial lo tawk ta se eng nge kan thiltih khan awmzia awm ta ang le? tlawmngaihna te pawh tlawmngaih loh a ngaih chang a awm lo thei ta lo a nih hi. Kristian kan ni a, inkhawm loh tur tia kan ‘Amen’ rual dual ṭhin ang khan, chhiatni ṭhatni ah pawh LLTF/ VLTF ten zawm tur an tih te kan zawm a, sor­karin hripui laka kan himna tura thu chhuah a siam te hi zawm ang u. 

Inkhawm loh tur ti a, thuawih taka kan ‘Amen’ tliar tliar ang khan LLTF / VLTF te sorkar thuchhuah te hi ring takin Amen in pe zel teh ang khai.