MI THU ZIAH RÛK HI

1. Khawvêlah hian hmasâwnna chi hrang hrang a lo thleng ṭhin a, a lâwmawm hle. Tunah chuan Mizote ngei pawhin Youtube lamah te, kawng dangah te pawh, mi thu ziak ngaihnawm tak tak an rawn chhiar ri ta ṭhin a, mi tam takin an lo ngaithla ṭhin.

2. Hetia mi thu ziah sa, khawi laiah emaw an lo chhiar rik hian, a chhiartu chuan a ziaktu/letlingtu hnênah an dil hmasa turah ka lo ngai ve ringawt a. Dil hauh lo pawhin an lo chhiar mai ṭhin em ni le?

3. Dil sateh mah se a ziaktu/phuahtu/letlingtu chuan a phal lo thei a. A phal loh miau chuan chhiar loh mai âwm tak a ni.

4. Mahse tunlai ṭhangthar ṭhenkhatte hian mi dang zahna hi kan nei ta vak lo nge, inbakkaih thâwm kan hre ta zauh zauh mai.

5. Ram kilkhâwr taka kan awm avang hian copyright lamte hi kan lo ti meuh lo ṭhin a. Miin dân ang thlapin copyright reserved a ti lo a nih pawhin, mi kutchhuak chu kan inzahsak viau ṭhin a nih kha maw le.

6. Kan ri te thlawhlaia maian chu zâm dum dum mah se, a neitu hriat lohin Mizo pângngai chuan kan sik ngawt ngai lo a nih kha. Kha lo kha, a neitu khan kum khat bâk a nei dawn lo tih kan hria. Kha lo kha, India ram dân ang thlapa a ta bil a ni lo tih kan hria. Maian chu lo sik mah ila a chawr no leh mai dawn tih kan hria. Mahse Mizo chuan a sik ru ngai lo.

7. Hetiang thil hi, a ziaktu/phuahtu phalna la hmasa hauh lova mi kutchhuak sum hmuh nana lo hman sak hi, he ram zimteah hian a thleng ta fo mai. 

I chungah pawh a thleng ve thei.

Keia kâr pawhin ka tawng tawh. Hmanah, F.Rokima hla ka zir chianna paper chu mi pakhatin ama ziah angin a lo ti kual kawi chiam tawh. Zirna in sâng lam lamahte a thehlût a ni awm e. Mak tak a ni. Mak tak.

8. Engtin nge kan tih ang? I ṭangrual ang u. Mizo Academy of Letters an awm a, Mizo Writers Association an awm bawk. Hetianga ziakmite'n harsatna an tawh hian pâwl anga thlavâng inhauhsak thâwm hi kan hre khât viau. Pâwl ang hian i ṭangrual ang u. A ṭul chuan pâwl thar pawh i din mai ang u.

A tlâk tlâk vanduai ti ang zia zanga in mal tawrhtir ngawt ngawt mai hi mak deuh a ni. Mak ti lo kual vel suh. A mak tlat.

9. Tunlaia ziaktu lâr C. Lalnunchanga pawhin beih a hlawh viau mai.  A phalna la hmasa hauh lova a thu ziak Youtube lama lo chhiar ringawttute nen an inchapchar zauh zauh. Tunah PL Liandinga. A dawt lehah tu nge? Nangmah i ni thei.

10. Hetia mi ngaihthlâk tura a ria an chhiar hi a ṭhatna nge tam ang, a ṭhat lohna? Lehkhabua mi a nih chuan, chu lehkhabu chu miin lei se, a ziaktu pawh a lo hlâwk ve deuh ang. Mahni sahmim ip tihpuar nana a ziaktu phalna la hawt lova mi thu ziak lo ta neih hmiah hmiah hi a mak.

Eng danah mah inziak lo mah se Mizote chuan hmai êng kan inzahtawn ṭhin a nih kha maw le.