Rev. Vanlalbela 'Ka hmaah dawhkan i buatsaih ṭhin' chu hei le

Zofate zingah hian Rev. Vanlabela hi hre lo kan lo awm palh a nih pawhin mi tlem zawk kan nih a rinawm a; amah chiang taka hre lo pawhin rawngbawltu ropui tak a nihna hi amah kan hriat dan tlang lawn ber a ni ang. Chuti ang taka Pathian mi hman leh rawngbawltu ropui tak chuan ama chanchin a ziahna lehkhabu ‘Ka hmaah dawhkan i buatsaih ṭhin’ tih chu September ni 5, 2020 khan a tlangzarh a. He lehkhabu hlu tak mai hi phek 350-a chhah niin thlalak hlu tak tak phek riat a inzep tel bawk a; cheng 250/- man niin chhiar a man hla hle. 

He lehkhabuah hian thupui sawmthum leh pasarih (37) awmin Mizo ṭawng thiam kan neih zinga a ber pawl C. Chhuanvawra endik niin hawrawp chhut sual pahnih khat erawh chu awmin chhiar a nuam hle a; C. Chhuanvawra hian thuhmahruai pawh a ziak nghe nghe a. He lehkhabu hlu tak mai aṭang hian kan ngaihsan rawn leh kan hriatchian chak Rev. Vanlalbela hi tu nge a lo nih chiah tih chiang takin kan hre thei awm e. 

Rev. Vanlalbela te inah hian kum 2018-a BD 2nd Year kan zirlaia Bawngkawn Presbyterian Kohhran kan tlawh ṭumin an inah mikhual ka ni a. Tukṭhuante eiin Rev. Vanlalbela nupui C. Vanlalfeli hian cheng 500/- zet mai min pe a, ka zakin ka lawm hle a. Chumi hnuah kum 2019 December ni 16 khan BD Final Year Thesis chungchangah ‘interview’ tawi te ka neihpui leh a. Hemi ṭum hian tuna a lehkhabu tur hi a endik lai mek niin ka thil hriat duhte pawh hemi lehkhabua a ziah ṭhenkhat hi a thla ka la nual nghe nghe a, chu chu kan inhriat ve dan awmchhun a ni mai awm e. 

Kan Pastor ngaihsan leh Pathian rawngbawltu ropui Rev. Vanlalbela hi a lehkhabu ziah aṭang hian tu nge a nih i lo belchiang dawn teh ang -

Chhungkaw harsa ve tak aṭanga lo chhuak a ni: He lehkhabu ziaktu leh Pastor ropui tak mai hi chhungkaw harsa ve tak leh sum leh paia hmachhuan tur nei bik miah lo aṭanga lo chawrchhuak a nihzia a lang chiang hle a. Mahse chuti chung chuan retheihna hi a inhnehtir duh miah lo a, tun hun hi Pathian zarah a lo thlen phah a ni tih kan hre thei a. He lehkhabu chhiartu zawng zawngte pawh hian Rev. Vanlalbela aṭang hian kan retheihna hi kan hmalam hun daltu chhuanlam atan a tling tawk lo tih kan hre ṭheuh awm e. 

Mi tumruh tawpkhawk a ni: He lehkhabu aṭang hian Rev. Vanalbela tumruhzia hi hmuh hmaih theih a ni lo a; sum leh pai hman tur a nei lo chung leh pawl thum lek chauh sikul pangngai a kal chunga vawiin a thlen theihna chhan hi mihring lamah chuan a tumruhna vang liau liau a ni tih a lang chiang hle. 

Ebenezer Bible College-a sum leh pai hman tur mumal neih loh vanga inbualna sahbawh tel loa vawi tam tak a inbual thu te, ha nawhna ‘tooth paste' a neih loh avanga meihawl a hman dante, Vaihoin sum leh pai dawn tur a neih ve loh avanga an hmusitna zozai te, Hindi kawi khat pawh thiam lo chunga sam ṭuak ṭhawt khawpa a inzir chhoh dan te - kan sawi vek seng lo ang -  heng aṭangte hian keini hian entawn tur kan va ngah em! Nuamsa taka lehkha kan zir chunga kan tiṭha peih lo hi chu Rev. Vanlalbela aṭanga inteh hi chuan zak ngawih ngawih tur kan lo ni!

Mi thuawih thei tak leh mahni inthunun thei tak a ni: Rev. Vanlalbela chanchin aṭanga kan hmuh chian em em chu thuawihna leh mahni inthununna hi a ni awm e. Ebenezer Bible College aṭanga Pathian thu a zir chhuahna hi Kohhranin a pawm College a ni lo a. Chuvang chuan a rawngbawl zelna turah pawh harsatna neuh neuh a tawk a. Chuti chung chuan thuawih takin Kohhran duh dan leh pawm dante ngaichanga zawm zel chungin a awm a. Pastor a nih hnu thleng pawhin hotute thuawih takin a nuam leh hrehawmah pawh Pathian rawng a bawl mawp mawp mai a ni. 

Tin, ama tana ṭha lo tur leh a nun tichhe thei thil lakah chuan mahni hrehawm pawisa miah loin a inthunun zel a. Nulat tlangvalna kawngah te, sum leh pai thuahte pawh nasa takin a inthunun a, chu chuan vawiin hi a hruai thleng kan ti thei awm e. Vaihoin an hmusit em vang te, an retheih em avang tea Pathian thu zir zawm a duh tawh lo lai pawhin Pathianin zir zawm leh tura a tih avangin thuawih takin a kal leh mai a ni. 

A hmasa berah Pathian a dah: Hei tak hi Rev. Vanlalbela nuna langsar leh vawiin a thlenna chhan bul ber a ni kan ti thei awm e. A duhna leh a chak zawngte aiin Pathian duh dan leh remruatnaah a innghat tlat a. Engkimah ṭawngṭai leh Pathian rawn chung zelin a hun a hmang a. Mizoram buai laia ramhnuai mi a nih lai aṭangin Pathian thu a awih ṭang ṭang a. Chu chuan amah leh a bula mite rin a hlawhin Pathianin amah ring tlattu Vanlalbela chu vawiina Mizo Pastor ropui berte zingah a hlang kai tih a taka hretute kan ni. 

Mihring a nih avanga a tihsual leh a dai pelh ve chang te, a duh dan vek loa thil a kal chang leh a thlen changte pawhin vuivaia la loin Pathian tih tlat chungin a hun a hmang a. Kawng engkimah Pathian chu rinpui berah a neih tlat avangin Pathian pawh atan a chhe chhuak lo thei lo a. Chu chuan rawngbawlna kawngah nasa taka rah chhuahin hnam dang zinga a rawngbawlnate pawh hmuh theih khawpin a ropui a nih hi. 

Pawl thum lek zirna pangngai zawha heti khawpa Pastor ropui leh Pathian hman rawngbawltu ropui a nih theihna chhan bul ber chu Pathian thuawih tawp mai leh ring tawp mi a nih vang hi a ni. M. Th te pawh zir ve leh an tum thut thut a, mahse Pathian aia ama ropuina zawk tur ni dawna a rilru lama a lan avangin chawpchilh tak maia a ṭhulh leh ngamte hi Pathian thu a awih vang a ni. Khawvel ram ropui ber pawl USA thlenga a kal theihna chhante pawh eng dang vang ni loin Pathian thu a awihna rah zel a ni. 

Chanchin Ṭha hril veitu a ni: Rev Vanlalbela chanchin kan chhiar aṭanga hmuhmaih theih hauh loh chu Chanchin Ṭha hril hi a rawngbawl chhan bul ber a ni tih a lang chiang hle. Masihi Sangati (tun hmaa Non–Mizo) rawngbawlna hlawhltinna kawnga a hnathawh zo zaite hi vawiin thlengin kan la hmu thei awm e. Ramhnuai mi a nih lai aṭang tawhin Chanchin Ṭha hi a vahvaihpui nasa a. Pastor a nih hnuah pawh chu chu a rawngbawlna pui ber niin Lucknow leh Delhi Mission Field-ah te rawngbawlin vawi tam tak Mizoram chhung leh pawnah Speaker a ni tawh a. Synod Mission Board Secretary te niin Pastor ang phei chuan Mission Veng chauh bial neiin kum khat chauh a hun a hmang a nih kha.

Pathian awm ring lote pawh hian he lehkhabu hi chhiar teh u!:  Khawvel changkang zelin a ken tel langsar tak ‘Pathian awm rin lohna’ hian keini Mizote zingah ngei pawh langsar ang reng takin hmun a chang tawh a. Hengho zawng zawngte pawh hian he lehkhabu hlu tak hi chhiar teh u. Rev. Vanlalbela cancer dam leh dan te, damlo a ṭawngṭaisak damna chang te, harsatna leh manganna tam tak a tawh laia Pathian hnathawh a chunga lo lang tlat zelte hi thil thleng satliah mai ni loin Pathian nung hnathawh ngei a nihzia hi Rev. Vanlalbela hian chiang takin a lo hrilh thei ang che u. 

He lehkhabu hi neih dan lo ngaihtuah ve la, lo chhiar ve ngei teh. Tisa leh thlarauah hlawkna pakhat tal i chhar dawn tih chiang takin ka sawi thei a, i mittui a tlak dawn bawk avangin i mittui hrukna tur inchhawp ang che.

 

Lalpa chhiahlawh, rawngbawltu ropui Rev. Vanlalbela, lo dam zel ang che.