Tunah chuan AMC tak tak aw

Kan hre vek, AMC chu Aizawl Muni­cipal Council tih a nih hnu-ah Aizawl Municipal Corporation tih lamtawi a ni. Aizawl khawchhung enkawl tura din a ni. Mahse, fiamthu titak deuhin Aizawl Musical Chair tiin kan sawi luih luih si a nih hi!

Ni e, AMC term hmasa, kum nga liam ta chhung khan vawi thum ngawt sawrkar hran a ding a nih kha. Chuvang tak chuan AMC hi Aizawl Musical Chair tihin fiamthu nan tak kan hman phah reng a ni. Councilor-te tan pawh khan zahthlak tak niin a lang - zah nachang an hriat leh hriat loh phei zawng ka hre law!

Khati taka sawrkarna a pian ngun chhan kha, party kan ruih chilh lutuk vang te, a fawng vuantu nih kan thlakhlelh lutuk hlawm vang te, inlungrualna kan tlakchham vang leh rilru nghet kan put tawk loh vangte pawh a ni ang. Mi
ṭhenkhatin, AMC member-te hian Aizawl khawpui chei ṭhat aiin thuneihna fawng vuantu nih ringawt an buaipui a ni, pawh lo ti se, thil àwm lo lutuk niin a lang lo!

AMC term liam ta avang khan District dang tan pawh Municipal Council/ Corporation neih ve a tichâkawm loh hialin ka ring rum rum ṭhin! Khawpui chei ṭhaa tithianghlimtu nih aiin politics hmanga hleihlenna tihchangtlun tumna game pawh a ang lek lek alawm le. Ka sawi nâ lutuk mah mah lo ang chu maw!

Kei mimawlin ka lo ralkhat thlir ve mai mai dan chuan, tun AMC inthlana party pahnihte chauhin councilor an neih chhan chu, AMC kal tâah khan party pakhat chuan duh hun huna sawrkarna
ṭhiata din thei ni-a an thuneihna an chelek vangin hrem an ni! Aizawl mipuite hi kan â lutuk bik lo a nih hmel.

Tunah chuan party malin sawrkarna an siam thei ta bawk a, term hmasa ang em em kha chuan sawrkarna inchuhin kan councilor-te an hmanhlel tawh lo turah ngai ila, hna pawh an thawk sawt deuh tawh em ang chu maw. Mahse, mi pahnih rinawm loh avangin sawrkarna a la inthlak thei tho; an lo tih thlabar tawh mipuite hi kan thla a la muang fel chiah lo a nia!

Chuvang chuan, sawrkarna chang MNF party hruaitute leh an councilor-te paw’n theihtawp an chhuah a ngai. Rinawm takin thawk se, inlungrual takin awm se tih hi mipui duhdan a ni. Tichuan, AMC tak tak an rawn par chhuahtir thei ngei ang. Tuna an chanvo ṭha chan hi an hmang ṭhaa an hmang thiam a nih ngat chuan, kum 2018 MLA inthlan hunah pawh an ṭangkaipui ngei a rinawm.

AMC hnathawh ṭhat leh ṭhat loh chu councilor-te kut a nih laiin sawrkar-pui (Mizoram sawrkar) kutah pawh thui tak a innghat tih chu tlang hriat a ni. Tute’n emaw sawi tet tumin, ‘AMC-te chu VC/LC u awrh alawm...’ tih ṭawngkam an cheh leh ṭhin! Hei hi a zia lo ka ti. VC/LC u chiah a ni lo phei chu kan ti law; mahse, MLA chhang chiah a ni tih pawh kan hre tel tur a ni.

Sawrkar hian AMC thuneihna hi hup ṭhen lovin pe vek se, zalen taka hna an thawh theih nan thlah zalen ngam se a ṭha khawp mai. An din ta sa sa, ring ngam se, an hnathawh kawngah inrawlh nasa lutuk lo deuh se kan ṭhatpui zawk ngei a rinawm. Chutih rual chuan, an dik lohnaah chuan an khak fawk fawk tur a ni.

AMC hmasa zawk kha sawi leh ṭhin ila, hna phei zawng an thawk ve tehmeuh mai. Mahse, mi tin hmuh theih leh hriat tura an hnathawh lian tham leh sawi tham phei chu a awm meuh lo a ni ber e. Music video an siamte kha a langsar pawl chu a ni mai lo maw aw, ka ti rum rum! A chhan chu, sawrkarna a ngheh loh lutuk vang te, Sawrkarin a rin tawk loh vangte a ni, ti ila kan sawisual tam viauin a rinawm loh.

Tun ṭum AMC erawh chuan hma a sawn tawh ngei kan beisei a, hmasawnna hmel thar tih tham deuh tak pawh kan hmuh tawh ngei kan beisei. Chu mi tur chuan theihtawp chhuah se, party-ah buai lovin Aizawl khawpui hmasawnna tur bauipuiin hna thawk se tih hi mipuite thuchah a ni. AMC dik tak - ‘Aizawl Musical Chair’ ni lovin ‘Aizawl Municipal Corporation’ hmuh ngei kan beisei tlat a nia.

Thilsual titute do kawngah te, khawpui thenfai kawngah te hian NGO hrang hrang hi thurualpui thiamin hmang
ṭangkai thiam se, an hnathawh pawhin a sawtpui ngeiin a rinawm. Sawrkarna siam lo zawk (Congress) lam pawhin sawrkarna sâwi ṭhiat tum ringawta hma la lovin, theihtawp chhuahin thawhpui se. Mizoram sawrkar pawhin mahni party sawrkar siam a nih loh avangin ngaihthah kher lovin, ram hmangaihna aṭangin engkim ti se a lawmawm khawp ang.

Kum 2013-a MLA inthlanpui kan neih dawn khan, tuna kan CM hian media hmaah, “Manifesto hi mipui ten an chhiar tak tak pawh ka ring lo...” a ti mauh mai a! Mak ka tiin mipuite hi min van lo ngai mawl em em ve aw, ka ti hial a ni. Politician ṭhenkhat lahin, manifesto-te chu kan inziah ṭhat siak vel mai mai alawm, tiin holam takin an sawi bawk ṭhin.

Mi zawng zawng chuan an manifesto hi kan chhiar lo ngei mai; mahse, mi tam tak chuan kan chhiarin kan lo chhinchhiah ru ve ṭhin a ni tih hi hre rawh se. Chik taka lo zir chiang a, an ti hlawhtling tak tak em ti-a lo chhinchhiah pawl pawh kan awm ve a sin. Kan politician-te hian an hruai mipui hi min ngai mawl lutuk reng teh suh se. A intham loh thlak ṭhin emai!

Tun ṭuma councilor thlan tharte pawhin lo hria se kan duh chu, an manifesto angin an awm em tih hi mi tam takin kan lo ngaichang dawn. Inziah ṭhat siak, ti-a namnul kual mai mai lo turin kan duh takzet a ni. Chhuanlam siam reng rengin kum nga min then liampui mai ang tih pawh kan hlau hle tih hi lo hria se. Mahni thutiam hlen thei lo nih ai chuan, ban ngam mai hi a ram hmangaihzia zawk!

Mahni leh lamhnaite inhaivur nan leh lal taka khawsa turin kan thlang tling lo a, Aizawl khawpuiin hma a sawn ngei theih nana thlan tlin an ni zawk. A nihna takah phei chuan, hnathawh kawr kan haktir a ni zawk mah, tih hi intheihnghilh lo hram rawh se. An nihna hi a ropui tawha, intih ropui leh hranpa an mamawh lo tihte hi an lo theihnghilh palh hlauh ange.

Ward tin aṭanga councilor tling tharte hi politic tuinu la hak lo hlir, ram hmangaihna avanga rawn pen chhuakte niin an lang bawk a, beisei a sang khawp mai. A tlangpuiin an la ṭhalai hlawm bawka, hna pawh an thawk chak turah ngai ang. Tunah chuan AMC tak tak aw.

- Rindika Mizo, Chawlhhmun

Hmun Thengthaw Rûn