Kut hnathawktute hamṭhatna - Hmunphiah
Buaipui nasat lutuk ngai loa a hlawkna kan tel theih mai chu hmunphiah hi a ni. Mizoram dung leh vangah a chin theihin a tualṭo ngawt pawh a tam hle a, mi tam takin sum lakluh nan an hmang mek a ni.
Hetih lai hian Forest department-in hmunphiah auction/ mahal turin division hrang hrangah advertisement an chhuah leh ta tlat mai hi kut hnathawktute ham-
ṭhatna sawh hekna nasa tak niin a lang.
Central sorkar chuan scheduled tribe te hmakhua ngaiin dan a siam thar a, chu chu 'The Gazetted of India' ah January ni 2, 2007 khan a chhuah vek tawh a. He dan Chapter-II Section 3-in a sawi angin kut hnathawktute hian neitu nihna, hmunphiah etc. lakkhawm a hman leh hralh theihna an nei a ni.
Hemi a nih laia Zoram dung leh vanga hmunphiah lak leh hralha hlawkna tur mi tlemte (Mahal-tute) hnena pek hi thil dik ni theiin a lang lo.
Zo khuaa hmunphiah te hi kut hnathawktuten an la in, man man thei ang berin an hralh mai tur a nih laiin Forest Department-in mi tlemte pumhmawm tir tura auction notice a siam leh ta mai hi thil dik ni theiin a lang lo a. A rang thei ang bera he auction notice hi sut leh turin kan beisei a ni.
Mipui chanvo rah beh aṭanga bul ṭan hi Chief Minister kumthar thuchah nen pawh a inmil thei lo a, India Gazetted kalh a ni bawk.
Heng Mamit, Aizawl, Kawrthah, Kolasib a Forest Division te hian an auction notice hi an hnuk kir lo a nih cuan Court inrawlh pawh a ngai hial ang tih a hlauhawm hle a ni. Democracy ramah chuan mi tlemte hamṭhatna aiin mi tam zawk hamṭhatna hi sorkarin a ngai pawimawh zawk tur a ni ang.
Court-a zualko a nih chuan Dan kalha thupek chhuahtu leh chhuahtirtu tan chuan in sawi fiah a la ngai ngei ang.
- Rualkhuma Hmar