Khapna hlawhchham

Mipuiin ṭha tak maia khawtlang hruaitute leh media kaltlanga Krismas leh kumthar vuakveta halpuah leh halmawi hal lo tura inzirtirna kan zawm ṭhat em em a, hahdam siaia kumthar kan lawm hnuah, sorkar meuhin halpuah leh halmawi nen kumthar a rawn hawng a, chumi hnu zelah chuan kan inkhap chungin kan inkhap hlawhtling ta lo. Sorkar hian a thil tih kha pawi a ti ang em aw tih ka ngaihtuah lêt a, tih loh loh tur rawt chhuah a thiam ngei mai.

Mizote inzirtir kan nuam kan ti a, inhruai sual pawh kan nuam hle. Nikum Krismas leh tun kumthar lawmna velah khawtlang hruaituten halpuah leh halmawi te hal lo turin mipui min ngen a, khap a nih thute puan chhuah a ni. Mahse sorkar berin a hma kuma bul a lo ṭan thar leh kha a nih avangin kan inkhap hlawhchham a, hun dang zawng aiin Aizawl khawpui boruak pawh a chhe leh a nih kha. Kan sorkar hi a chak kan tih rual hian mipuite thil ṭul lem lo leh thil lo ti tura zirtir kawngah pawh a lo chak hle tih a lang chiang hle.

Halpuah leh halmawite hâl loh turah mipuiin kan ngai ṭan tawh a, a tel loin kan hlim theiin, kan thla a muang thei zawk tihte pawh kan hre ṭan a, mahse sorkar berin, sorkar sumin bul a rawn ṭan leh ta si a, boruak chhe zawk hîp tura kan inbuatsaih chhoh zelte pawh a ngaih ka ring. Sorkar hian thil ṭha hi a duh tak tak lo nite pawhin a lang thei dawn dawn mai. A ṭha lo hle a, hemi chungchangah hi chuan kan sorkar ber hi a mawhpuh loh theih loh a ni.

Nikum kum tawp aṭang khan kan han inkhap ngial a, veng chhung information mike hrang hrangah te pawh au a ni a, mahse khapna thupek tihchhuah bawhzui tur tumah an awm lo. Khap chuan zawm mai tur alawm tih mai âwm tak a nih laiin, sorkar berin mipui hmuiah a tah tawh tlat avangin mipui rilru a hneh tak tak tlat lo. Khap a nih chuan khapna kengkawhtu an awm a ngai a, hmun
ṭhenkhatah chuan an awm pawh a ni mai thei, mahse chu chu a tlêm zawk daih a ni ang. Khapna tihchhuah a hlawhtlin nana kengkawhtu an awm loh avangin kumin kum a thar chiah khan namen loin kan hâl ta ruih ruih mai a ni.

Mi ṭhenkhat chuan Hindu-te hunpuiah kan khap leh chuang lo an ti a, a dik tho mai. Hindu pawh nise khapsak a
ṭha viau. Chutihrualin Hindu chu an tlem a, an hâl khu hi a tam tham loh avangin mihring hriselna atana pawi a khawih theih chin a tlem zawk tihna a ni. Hindu awmna lai deuha an hâl leh kum thar zana Aizawl khawpui puma an hâl inthlauh theih dan tur kan chhut a ngai. Aizawl khawpui puma halpuah leh halmawi kan hâl chuah chuah hi a lêtin a tam zawk a, a tam na na na chuan boruak leh mihring hriselna a tihchhiat theihna kha a tam zawk daih a ni; hei tak hi a pawina lai a ni.

Lammuala inkhelh zanah te pawh an hâl fo a, a tam tham lem lo e. Eng eng emaw huna mi tlêm têin an hâl hi Aizawl khawpui boruak tichhe tham a ni hauh lo ang. Mahse Aizawl khawpui puma han hâl chur chur hian kan khawpui boruak chu a tichhe khawp ang.

Thupek emaw, khapna emaw kan chhuah a nih chuan tihhlawhtlin a nih ngei theih nan hma lak a ṭha khawp mai. Thupek tihchhuah a, tihlawhtling tura hmalakna awm mumal leh lo ṭhin hian mipuiah hnu a hnutchhiah a, thupek leh dan pawisak lohna leh ngaihzamna a hring. Mipuiin dan kan pawisak a, thupek tihchhuahte kan zawm theihna tur chuan a hlawhtlin nana kengkawhtu kan siam a, kan tirhchhuah ngei a ngai a ni.

- Ramropuia