Lirthei khalhtute leh kan khawpui

Mizoram zim te, kawng chep em em leh rualrem lo takah a khawpui phu loin lirthei a tam a, Aizawl khawpui ngat phei chu engtiklai pawhin traffic jam a awm reng tih theih a ni. Heti chung hian kan lirthei khalhtute'n hawihhawmna an neih len em avangin accident lian tham awm loin kan hunpui pawh kan hmang zo leh ta a, a lawmawm ngawt mai.

Khawpui dangah lirthei horn hmeh rik a nasat tehreng nen, Aizawl khawpuiah chuan horn hmeh rik vak vak a awm lote hi khawpui timawitu a ni a; mikhual lokal
ṭhinte pawhin zahawm an ti a, tlawhtu pawh kan ngah phah viau a ni. Hei hi kan lirthei khalhtute hawihhawm vang a ni.

Hetianga khawpui reh leh motor horn ri chuah chuah a awm loh chhan hi hriat a har fu mai.

Engtik aṭanga hetiang hi ching ṭan nge kan nih? Tunge horn hmet vak vak lo tura min zirtir tih pawh a hriat loh a, ngenna emaw pawh awm miah si loa hetianga kan khawsa ringawt pawh hi Kristian ram khawpui nen pawh a inhmeh em em a, i ching zawm zel ang u.

Kan city bus driver-te khalh thiamzia mawlh mai hi an fakawm ngawt mai. Heti khawpa chepah si hian kum engemawzat chu mi sut palh emaw, chil palh emaw an nei ta lote hi a lawmawm a, an khalhthiamna mai bakah an hawih-hawmna hi chhawm nung zel se a ṭha ngawt ang. Kan taxi driver-te pawh an fakawm e.

Driver ṭhenkhat polite lo deuh pawh awm se, polite tak tak an tam em avangin duhdah deuhte pawh an hliahkhuh ṭha fu mai.

City bus leh taxi khalhtute hi an lirtheia thil theihnghilh chungchangah pawh an fakawm thlawt. Bus a ni emaw, taxi a ni emaw, miin an lirtheiah thil theih-nghilh se an office-ah an dah loh vek pawhin a theih-nghilhtu zawn hmuh an tum hram
ṭhinte hi a va mawi em! I ching zel ang u.

Kan two wheelers khalhtute pawh inzir zel i la, kan khawpui chep tak karah hmaa mite tlan pelh tum hram kan la awm nual mai. motor sirah kan intlar dul a, chumi karah chuan double over-take tuma tlan ta vak vak ho hi fimkhur deuh se a duhawm hle.

Hmanhmawh em emna pawh nei loa hmaa mite rem leh rem loa tlan pelh hram tum hi a mawi lo mai ni loin, intihpalh pawh a hlauhawm a, kan tlan pelhte ke emaw, an lirthei tai palh pawh thil awm thei leh awm zeuh zeuh a ni a, i fim-khur tlang zel ang u.

- Lalkhirhvela