Beihrual thlaah eng nge kan beih chhuah?

Mizo thla chhiar dana Mimkut thla kan chuan kai hian Mizo Kristiante rilruah chuan Beihrual inkhawm hian hmun a luah thuk hle awm e. Kohhran hrang hrangin kan hman dan chen a inang lo deuhin a lang a, amaherawhchu, kan hman chhan erawh a inang vek awm e.

'Mizo Kohhran Chanchin' Rev. Saiaithanga ziakah chuan hetiang hian Beihrual lo chhuah chhan a ziak. Kum 1913-a harhna a thlen hnuah hun eng emaw chen chu harhna boruak a han reh a, chutih lai chuan kohhran pawh a lo nguiin rinnaa la nghet lo tak tak Mizo kristiante nun pawh a nghawng nasa hle a, kristian aṭanga han ban lehna hial a thleng a ni. Kohhran a lo ngui leh kristian an ban ṭhen avangin thawhlawmin a tuar a, kum 1917-a Tirhkoh pasarih tirh chhuahte hlawh tur pawh an tihtlem a ngai ta hial a, amaherawhchu hetiang boruak karah hian kristian nghet leh rinna chak tak tak awmte chuan chu nguina chu an beih let ngaiin an hre ta a, ringtute intihchak tawnna leh ringlote beihna chu hnapuia neih an duh ta a ni. Tichuan, beihrual hmasa ber chu (Presby. 1918, No.10, Kristian Tlangau - May 1918 phek 94)-a a inziak angin, 'Kristian Beihrual-na hi June, 1918 a hian lo awm tan turin kan ruat a. Thla chawhma lam chu mahni Kohhranho tan a, intihchakna tur leh intihthianghlimna leh intihngah lawkna atan kan hmang ṭheuh ang a, tin, thla chawhnu lam chu ringlote tana hman tur a ni ang, mi hruai hram turin. Tin, Kohhran tinin an thawh-zia dan ṭheuh tur an ngaihtuah ang” tiin. Hei hi Mizo kristian hmasate'n beihrual an lo hman chhan leh a ṭobul kan hmuh theih a ni.

Vawiina kan dinhmun thlirin beihrual kan hman hian kan rilruah eng nge awm a, eng nge hlen kan tum tih hi kan inzawh leh a ngai niin a lang. Ringtute intihchak tawnna atan a nih angin zan tin Biak Inah kan inhmu khawm a, Pathian thu zirin kan sawiho a, a boruak chu a nuam ṭhin, kan hlawk ṭhin, a kalte chuan tisa thil tak pawhin hlawkna an nei ngeiin a lang. Ringlote tan erawh kan hmang lo niin a lang. Kan beihrual hun hmanah hian a eng lai tak hi nge ringlote tana kan beihna ni ta? Thupui ṭha tak zirin kohhranho chu thu khat vuain ramthim dai dar ang maiin zan thimah kan chhuak a, thupui kan han sawi khawm a, a hre ber dawttu aṭanga a hre lo ber thlengin sawihona chuan kan beihrual inkhawm a chawi a, nuam kan ti ṭhin, hlawk kan inti ṭhin.

Kan beihrual aṭang hian Missionary tirh belh duhna kan nei em? Kan bula cheng rinnaa chak lo tak takte ṭanpui duhna kan nei em? Kohhran tana ṭhahnemngaihna thar min pe em? A eng ber hi nge kan beih chhuah hi kan hre ṭhin lo. Thupui kan zir meka sawihona aṭanga midang thusawia a ngaithlatute'n hlawkna kan chhar paih lamah hian kohhran leh mimal angin kan nun leh khawsak phungah ṭha zawk a awm em? Nge kum tawp camping-ah luh leh tho kan ngai? Kum tina ringtute, kohhranhote kan intihchak tawnna hunah hian thupui zir sawihonaa tawp mai lo hian beih chhuah tum kan neih chu a ngai a ni.

Greenday frontman, Billie Joe Armstrong chuan a pa a ngaih avanga a lunglenna hneh turin September thla mut bo mai a duh a,'Wake me up when September ends' tiin hla a phuah hial a. Mizo kohhrante hian eng nge beihrual thla kan tiha beihrual kan hman apiang hian beih chhuah kan tum tih hi kan inchhut a ngai ta viau mai. Beih kan nei nge 'Bar' thla ninawm aṭanga tal chhuah hram kan tum chauh zawk?

- Lalrinfela