In duh angin kawn an chei tak kha!

Kawn chei duh hoin an campaign nasa malh malh bawk a, in duh ang zanin kawn an chei a, Aizawl leh Aizawl pawna kawn chei thlalak tam tak ka lo hmu ve a, kei kawn chei hi chhunzawm zel tlak a ni tih ka han tuihnih ve ang e.

Tun hma kha chuan veng ṭhen-khatin Aizawlah kawn an chei a, a en tura chhuak awm lem lovin a veng chhungah a bikin naupangin an lawm a, thlate an la a, a bul velah an infiam ve nak nak ṭhin a, kha kha kawn chei ṭan tirh lama thil awm dan a ni.

Hun a kal zel a, kawn chei kan uar tawlh tawlh a, kan cheina senso a to tawlh tawlh a, kan chei thiam tawlh tawlh a, kan hlut tawlh tawlh a, camera a lo ṭha tawlh tawlh ve leh chiah a, chu mai bakah phone camera a lo ṭha a, whatsapp a lo awm a, facebook a lo awm bawk nen kawn chei hi kan chei lo ang tih ka hlau ta tawlh tawlh mai a ni kei hian.

Sawi ta zel ila, kawn chei kan tih hian intihsiak kher tawh lo ila, lawmman sem a nih hi chuan lawmman la ve lote hian, "Lawmman lam hi kan ngaihtuah lo," ti mahse an vui ru
ṭhin a, kan zavaia kan hlim tlan zawkna turin kawn chei lawmman hi tihtawp ni se, kawn chei erawh uar deuh deuh tur niin ka hria.

Naupang lawm kan han ti tak naa puitling hlei hlei hian kan lawm a, a lawm lo ber tura ngaih kan tlangvalte hlei hlei hi an in pose kual nasa a, tunlai tlangvalte leh rawlthar hi chu Korean serial lo chhuah hnua mi an nih hlawm avang hian hmeichheho ai maha camera lawm, hmui tisawi leh in pose peih an ni a, kawn chei generation tlangvalte tan chuan nuam ve tak tur a ni.

Intihhlimna thiang-hlim a lo ni ta daih a, Krismas boruak kengtu hlim-awm tak a ni a, a thlarau zawngin a hlawkna hre lo mah ila a hlawk lohna pawh a awm chuang lo.

Tisa taka kan hlawkna a tam em avang hian kan duh angin kawn chei zel ila, uar deuh deuh ila, kan duhnaah chuan pawisa pawh a awm zel a ni tih chu kan hriat vek tawh avangin kawn chei hi 100% ka support zel ang.

- Lalremmawia