CHAWHMEH KHAR CHHAWN HI

Chawhmeh kharchhawn vel hi sumdawnna laimu tak chu ni ve hial awm a ni. Thenkhatin thil an siam chhuak a, an hralh leh a; thenkhatin thlai an ching a, an hralh leh a; mahse chung mite chu sumdawng an nihna ai mahin a siam chhuaktu leh a thar chhuaktu an nihna chu a langsar zawk thei ang. Mahse kharchhawngtu chu sumdawng liau liau ni berin a lang. Chuvangin kharchhawn thil hi chu sumdawnna tak tak a ni tawh a, a pawisa tam leh tlem thu a ni lem lo. A nihna hi sumdawnna liau liau a ni. Chuvangin kharchhawn hi sumdawnna kalphung leh nihna hre thlapa kan tih a ngaiin a lang.

Covid19 len atang khan he kharchhawn thil hian Mizo rilru a luah nasa lehzual a tih theih ang. Covid leng khan thil eng eng emaw a rawn hring chhuak a. Chung zinga pakhat chu kharchhawn hi tunhma a ngaihtuah ngai lem lo pawhin kan ngaihtuah ta hi a ni ve thei ang. A chhan pawh Covid len lai khan thil thenkhat kha a to uchuak ta lu deuhva, chutih laiin thingtlang unaute lam atangin a thlawnin chawhmeh kan dawng a, a kalhmang kha a inpersan ta em em a. Chubakah thingtlang lam atangin Covid vangin sorkar Department (a bik deuhvin Horticulture) lamah man neiin ei tur an rawn dah a. Chutah chuan thingtlang mi thenkhat chuan sumdawnna kalphung pangngaia an tih ngam loh leh an tih theih loh tur, ei tur chhe tak tak an rawn telh nual a. Mipui hnena hralh tlak a nih loh avangin Department-in a hek phah a. Kan Mizo mize pawnlang leh rilru retheihna a lo lang tel kha a pawi khawp mai.

Covid len lai atang leh tunhnu thleng hian kan chawhmeh kharchhawng a sumdawng te tihdan thenkhat a lo lang a, a pawi te pawh ti hial ila a sual lovang chu. Hlawk lutukin kan kharchhawngtute hian chawhmeh an zuar a, thlai thartute tan thanat rawihna turin thil an ti hi a pawi hlein ka hria. Tumkhat chu khaw lian ve tak pakhatah hian kan kal a. A khaw thenawm khaw tê penhleh deuh atangin chawhmeh, antam an rawn zuar a. Kharchhawngtu chuan tel khat cheng 20-in a lo laksak a. An inlaksak lai mek chuan a lei duhtuin a rawn bia a, hmun leh hmunah kar awm lovin kharchhawngtu chuan cheng 40 a lo chhiar a. Thlai rawn petu chuan, "A va rilru natthlak e, keinin kan ching a, kan thlova, kan la a, helai thleng hian kan rawn phur a. Hmun leh hmunah kan hralhna zat hlepin an han hralh leh a nia," a ti a. He nu rilru natna hi a tak riauvin a lang.

Hetianga a thlep hlepa thil zawrh chhawn te hi chu a lutuk deuhvin a lang a. Chu ai mah chuan a thlep aia tam hlepa thil hralh hi a awm nual bawk. Thenkhat chuan tel khat kha tel thumah an chhuah a, a tira tel khat an lakna ang rate vekin tel thum chu a mal malin an hralh leh a. Chu ai pawh chuan Serchhip vela cheng 6 a an lak, Aizawla cheng sawmnga a an hralh te hi chu uchuak tak a la ni leh ta zel.

Heti a nih avang hian hmun thenkhatah chuan mahni thlai thar zuartute thutna bik an han siam a, mahse a daih zo lo fova, a chang leh a zuartu tur an awm leh lova. Kharchhawngtute nen an inpawh zawm leh tho tho zel a. Dik deuh leh awmze nei deuhva thiltih a harsa angreng phian mai. Mahni thlai thar, hla tak atanga rawn kengtute tan Aizawl khawpuiah hian hmun a awm mang loh chang a tam ta mai a. He hringnun hi a nuam lo ta hle thin zawng a ni.

Hei chauh hi a ni lo, khaw thenkhatah chuan kharchhawngin kha khaw thlai thar kha an han luhchilh a, midang tan lei ve hleih theih lohvin an lei zo vek a, a zuartu lamin phal mah se a khar chhawngtu chuan zahna tel lovin a lo keipui sa hauh a. Hun tam takah chuan hetianga kharchhawng, sumdawngte hi an duai lo angreng viau zel ni te pawhin an sawi a. A zia lo angreng ngawt mai.

Heng thil te tham deuh anga lang hi engemaw tia kan inhrilh a kan inzirtir loh chuan khawilai nu huaisar deuh thu thu emaw hian thui tak kan awm thei tlat a. Tihdan ngaihtuah a ngai viauin a lang. Kan sorkar hian heng thil te hi zahawm zawk leh hawihhawm zawk a kan kalpui theih nan thil zawrh dan kalphung engemaw hi ngaihtuah se a that viau laiin kan sorkar hrawn tawh te chu an ngawi thei angreng viau mai.

Mipui harsatna denchhen a tu nu huaisar deuh emaw rorelna hnuaia awm mai hi a fuh chiah lovin a lang.