LENGPUI AIRPORT TROLLEY

Tlem lai khan Lengpui Airport-ah bungraw nawrna tawlai (Trolley) a bo zawh duak thu kha kan hria a. Han en chian deuh khan Lengpui Airport tihdanglamna tur siamtu contractor, Kamrul Lasker-a khan an hnathawhna a Cement chawhpawlh sa nawr nan te, thir rit deuh deuh dah sawn nan te leh a tul an tihna ang angah khan inthlahrung hauh lovin a lo hmang a. Chutia a hman lohna tura an hman takah chuan a chhe zova, a then chu Cement khâwnin a ke virna lai tur a hnawh avangin a lir hlei thei lova, a riral zo ta a ni tih hriat chhuah a ni a. State pakhata Airport awm chhun ve riang ruanga nawrlirh khati zozai contract hnathawhna atana han hman chhiat vek mai kha a mak em em a. Kan Airport kan ngaihhlut lohzia te, mipui kan zah lohzia te, contractor an huangtau theihzia leh thildang tam tak kha khan a kawk kan ti thei ang.

September ni 5 a Lengpui Airport a kan zu kal chuan nawrlirh a lo awm leh teuh tawh mai a. A lan danah a thar ni hlawm ngeiin a lang a. Airport nawrlirh nei lo khan nawrlirh thar a lo nei ta chu lawm ve viau mai awm tak hi a ni a. Mahse mihring hi kan inrin tawh loh laklawh chuan ngaihtuahna a la kal reng thova, khang nawrlirh thar te kha engtia kan neih nge ni tih ngaihtuah loh theih a ni lo. A hmang chhetu khan a rawn thlak leh ta em ni tih kha rilruah a lo lut nghal vat mai. An lo hmang mai ngam kha a mak tawh em avangin a thlakna chu contractor tum tur liau liauvah keini chuan kan lo ngai a.

Mak angreng tak maiin Civil Aviation Department, Mizoram sorkar hnuaia mi hian nawrlirh za lei nan cheng nuai 30, an budget-ah an lo dah tlat mai a. Chuti a nih chuan contractor thil tihchhiat kha Mizoram mipuiin a kawp a thuahin kan tuar ta tihna ni ngei tur a ni. Airport hi Mizoram sorkar ta a ni a, a chei thatna tur te leh thildang pawh Mizoram sorkar kuta awm a ni a. Civil Aviation Department pawisa hi mipui pawisa, sorkar pawisa a ni. Airport chei vel hna thawktu contractor hian he hna a thawh dawn hian, "Sorkar bungrua awm ang ang chu kan remchan dan angin kan ban phak hnaivaia awm te chu kan hmang ang a, kan tihchhiat pawhin sorkarin min hrethiam a ni ang chu," tih thu indelhkilhna nen hian he Airport chei hna hi a thawk hauh lovang a. Nawrlirh an han hman chhiat a, mipui kan phun luai luai te kha chuan a tichhetu khan a thil tihchhiat zawng zawng kha a rul leh mai turah kan lo ngai a. Mahse Civil Aviation Department budget lamah sorkarin a lei lehna tur a tum tur thu kan hmu ta mai a, a mak em em a ni tih loh theih a ni lo.

Lengpui Airport chei hna hrim hrim hi a mak tih loh rual a ni lova, a tir phat atangin thil dik lo dah khawm hmanga Lengpui Airport hi chei chhoh zel niin a lang. Trolley pakhat hi cheng 30,000 zelin kan Mizoram sorkar chuan a lei ta tihna a ni a. Han ngaihtuah mai pawhin a lei to hle niin a lang. Google lamah te han en ve ula, hei aia tlawm a lei theih awm tak hi heti zat hian kan han lei ta chu a nia. Zah theih lohna chungah zah theih lohna dang a chuang a, mipui pawisa ren lohna chungah pawisa ren lohna dang a chuang leh ni berin a lang. Keini ngaihah chuan Lengpui Airport enkawl hi mipui tan a hautak ta lutuk deuh. Airport Authority kuta hlan ve hle hle mai a, kum tina Mizoram sorkarin Airport enkawlna tura sum tam tak a khawhral thin hi tihbo mai a that tehlul nen Trolley supply hna thleng hian tute emaw hi chuan an lo it ngawih ngawih ta mai em ni a tih loh hleih theih loh.

Kan Airport chungchangah hian a tir phat atangin thil hi a nihdan tur lo ang deuh hlirin a kal niin a lang a. A lungchhiatthlak angreng ngawt a ni. Hengte hi i lo ngaihtuah ve ngai em?

(1) Lengpui Airport chei hna hi tihdan pangngaia tender chhuah hauh lovin hna hmanhmawhthlak hauh si lo kha tender pangngai chhuah hauh lovin thawh a ni phawt a.

(2) Hna thawh theihna tura Work Order chhuah hma, thla nga laiah hna thawktu hian a hna a tan mawlh mawlh a. A thawktu leh a thawhtirtu hi an inbe thiamin an inhre pawh tawn hle tih chu sawi ngai lovin a chiang. Sorkar kalhmang pangngai piah lamah inbiakremna te, induhsakna hlei hluak te, tihdan dik lo te a awm chiang tih hi mi pangngai tan chuan hai rual loh a ni.

(3) Hna thawktu hian hetiang hna lian leh pawisa tamna thawk tur hian thawh theihna (qualification) a lo nei reng reng lova. An hnathawh a chhiat avanga a chim fel vek hnuah hetiang hna thawk thei tura Class I contractor nihna chu pek chawp a'n ni a. An hnathawh chhiatzia a lan fel vek hnuah lawmman atan ti ni awm takin Class I contractor-ah hlan kai a ni ta mai ringawt pawh hi mi tam tak rilru a na ngawih ngawih a.

(4) Airport a bungraw nawr nana hman nawrlirh chu an hnathawh awlsam zawk nan an han hmang bawrh bawrh mai a, a chhe zo ta deuh vek a. Thlawhnaa zin tur leh lo haw tam takin harsatna kan tawh phah a.

(5) An bungraw tih chhiat ai chu mipui sum, sorkar pawisa cheng nuai sawmthum zet sengin kan han lei thar leh ringawt mai a. A tha natthlak khawp a ni. Contractor-in hnathawh nana Airport hmanraw awmsa a lo hmang mai kha a thinrimthlak a. Chutah a la tichhe teuh lehnghal a. Chutih hnuah mipui sum atangin cheng nuai 30 zet chu nawrlirh lei nan hman a ni leh a. Kan nawrlirh hi a man a to hlein a lang bawk a. Heng zawng zawng hian mipui min zah lohzia leh min tham lohzia a kawk vek a ni.

Kan Airport hi a chunglama motor a tlan chhohna a awm loh vangin buaina kan nei lovin a lang a. Keini aia Airport lian zawk hmun tam takah pawh thlawhna hi bus te'n kan pan a, ke te'n kan pan a. A chunga motor tlan chhoh theih hi a tulna vak ka hre ve hauh lo. Mahse kan heti tlat si zawng a ni. Kan Airport hmang hian tute emaw chuan a hring a hranin min rawk mawlh mawlh ni berin a lang.