SORKAR TIH AWM

Mizo, Mizorama cheng ṭheuh ṭheuh hian sorkar tih awma kan ngaih hi a inang lo viau thei awm e. Ṭhenkhat hi chuan sorkar hi sorkar vantlang tak leh fel ve tak niin an ngai maithei a, ṭhenkhat chuan sorkar hi kan duh tawk lo hle ni te pawhin a hriat theih. Kan Mizoram sorkar hi sorkar pangngai tak nia hretute chuan hei bak hi awm dan tur dang awm thei vakin an hre lo tihna ni awm takin a lang a, sorkar duh tawk lote erawh chuan heti lo deuhva awm dan hi awmin an ring tihna a ni thei ang. Mahni phak tawk leh ngaihtuah dan zelah kan awm dan mek aia ṭhaa awm dan tur ngaihtuah ngai lo emaw, ngaihtuah thiam lo emaw tan chuan kan awm dan tawk apiang hi lungawipui mai a awl viau a. Chutianga lungawi ta maite chuan tihdan dang an ngaihtuah chhuak mawh khawp a, an tan hmasawn pawh a harsa ṭhin viau bawk. American tlangval pakhatin min hrilh chu, "Keini American-ho hi chu kan thatchhe khawp a, thil reng reng hi a aia awlsama tihdan hi kan zawng reng mai a ni," tih a ni. An thatchhiat vang ni lem lovin thil thar an ngaihtuah peih zel leh an hmasawnna chu chapo lo taka a sawina a ni tih a hriat mai.

Ram a retheih poh leh sorkar hnathawk an hamṭha mai a. Ram changkangah chuan sorkar hna leh sorkar hna lo hi chuti takin a inthlau lo. Mizoram chhunga sorkar hna a hlu ta em em mai hi kan changkan leh changkan loh tehna pawimawh tak a ni ve thei. He sorkar hnathawk leh sorkar hnathawk lo inthlauhna tihreh hi sorkarna changtu apiang mawh a ni. Sorkar hnathawkte neksawr leh tihhniam ai chuan sorkar hna ni lo kha a hlawkin thawh a manhla ve mai tur a ni a. Chumi ti tur chuan sorkarin tha a thawh ang a, ngaihtuahna a seng ang.

Eizawnna thu-hla chauh lovah pawh kan khawlai nungchang leh kan awm dan hi dan leh hrai hmanga sorkarin a khuahkhirh a, a tihzalen tur a ni. Zalenna hi dan awm lohna leh awm tlemna tihna a ni lo va, dan fel tak awmna leh zawm ṭhatna hmun apiangah zalenna chu a mi chengten an nei nasa zawk. Mi dang khawsak tihrehawm zawnga khawsa chite an zalen viau chuan sorkarin a ngaihtuah tur a ni a, chu'ng chu a bitum tur a ni a, a tihrehna tlangpui chu sorkar kuta awm a ni. Sorkar hawiher leh sorkarin dan a lekkawh dan zulzui chuan mipuiten kan ṭawiawm ve ang. Mipui harh chhuah hmasak a, mipui duhdan ṭha tak mai zulzuia kal ta mai sorkar chu a vang viauin a rinawm.

Tunhnaiah Tuikual veng chuan Vanapa Hall leh a bul vela mi awm ṭha duh lote khuahkhirh an tum dawn ni awm tak a ni a. Mizoram khawpui berah pawh a lailum lai takah ruihhlo tih chingte an tlangnel em em ni tlatin a lang a. Sorkarin tihreh tum ve awm tak a nih laiin sorkar chuan hetiang tireh tur hian hriat thama hma an lak kan hre lo ni awm tak a ni. Helai bawr vel hi Police hotu lal pahnih hnenah mimal ngenna angin ka sawipui tawh a, mahse eng teh vak mah an ti lo. Veng bil leh mimalin kan ngaimawh hma hian kan sorkar mi rawih, kan Police te hian ngaimawh awm tak a nih laiin kan en deuh mai mai niin a lang. Heng ngaihtuah tur hian harsatna lian tak leh thil remchang lo tak a awm a, kan lo hre pha ve lo em ni zawk tih ngaihtuah theih tak a ni. Keini ngaihah chuan tunhmate khan mimal in saknaah Police te kha an thawk suau suau ṭhin a, chutianga chhawr kawi theih tur mi leh sa police te an awm theih chuan henglai venghim tura duty thei turte chu awm turah kan lo ngai a ni.

Zu zawrh leh zu kawlte kan khap bur a, mahse a zuruite chu eng tin kan ti leh lem si lo ni tlat hian a lang a. Sorkar chuan mipui hawiher hi a thunun tur a ni a, vantlanna hmunah lek phei chuan chin tawk hi sorkar hian a bithliah a ṭul khawpin a lang. Kan police-ten zurui pawngpawrh te, zurui ualau lutukte hi chu la hmak hmak se la chuan; tuna kan awm dan ai hi chuan kan changkang zawkin a rinawm.

Khawlai leh hmun ualau chauh ni lo, kan hnathawhna thleng hian sorkarin sorkar pawisa hmanga hnathawhte hi chu fet deuh zawka a endik a pawimawh hlein a rinawm. Political party unit ṭhenkhat hnathawhte hi chu endik dawl lo deuh deuh leh mipui zah lohna ang hial khawpa sawngnawite a awm ṭhin a. Mipui mimir hian Party hna a nih tawh chuan sawisel duh lohte hi kan awmphung pakhat a ni ta maiin a lang a. Kan incheina kan uluk ang huin khaw êng kan zahna leh kan tih tawk anga kan ngaih nia lang hi a hniam a. Hemi dah san hi sorkar chuan a tum tur niin a lang. Kan sorkarin min kaihhruai dan azirin mipui rilru hi a sangin a hniam tur a ni a. Mipui rilru a hniam viau chuan kan sorkarin a tihtur a ti lo deuh tihna ni ngei tur a ni.

Aizawl khawpui lun lai taka vantlang tana hmuhnawm loh taka khawsate khap beh chungchangah tlawmngaia thawktute kuta dah mai hi kan sorkarin a tum a nih chuan a zia lo deuh hlekin a lang.