Duhthusamah sam luat

Tunhnaiah faina lam ngaih pawimawhna avangin sorkar aṭangin veng hrang hrangah bawlh-hlawh bawm sem a ni a. An la sem chho zel pawhin a rinawm. Kan bawlhhlawh bawm sem hian ngaihtuahna a tikal angreng viau mai.

Kan bawlhhlawh bawm sem hi a lian lo hle mai a, kan khawsak phung en chuan heng bawlhhlawh bawm te hi mahni pindan pual bika chhawp atan emaw a tawk tiu teu viauin a lang a. Chutiang a nih vang chu em maw ni a dawngtu tam tak hian chhungkaw bawlhhlawh bawm atan chuanhman ṭangkai tumna nei lem lovin ka hmu a. Kan han en hrim hrim hian a len zawng ber mai aṭang hian tling tawk lova hriatna kan nei tlatin a lang. A bawm hi a nalh phian a, a duang chhuaktute rilru leh a lo pawmpuitute rilruah chuan mawi tak leh changkang tak anga lang thei tur kha a awm a ni mai awm mang e a tih theih.

Veng hrang hranga bawlhhlawh luan khawmna kawrpui hmel han en la, kan khawlai leh kan kawng siam te han en la, kan bawlhhlawh bawm nen hian a intuha chiah lova. Kan milianho chhungkaw bawlhhlawh bawmpui pawh hi han en la, hetiang bawlhhlawh bawm nen hi chuan kan inrem chiah lo.

Tlem lai khan kan venga tuichhia leh bawlhhlawh luan khawmna kawrpui siam nan hian SIPMIU (aṭang niin ka hria, ka hriat sual chuan ngaihdam ka dil e) hian pawisa an nei a. Nikum lamah khan kan veng kawr zawng zawng chu siam vek turin Work Order an tih mai hi mi hrang hrangin an rawn hum fur mai a. Tam takin an sawi ka hriat phak chu, ‘Chumi khami chuan min duhsak ve a min pe a...’ tih a ni deuh vek mai.

Mahse vanduaithlak tak maiin kawr zawng zawng chu a chhuat fit hnih leh a chanve a zau, a bang san zawng fit khat (fit khat vel an ti mai a) a siam tur a lo nia. A chhuatah lung phah tur a ni a, a bang pawh lunga rem tur a ni. Mahse buaithlak ta tlat peka chu kan kawr awmsa zauzawng chu fit riat te, fit ruk te a ni nuai mai a. Furah phei chuan chutah pawh chuan bawlhhlawh leh tuihawk a len loh chang a tam a. A siamdan tur an tih ang chuan min han siamsak chiah sela kan veng chuan buaina nasa tak kan tawk ang.

A manganthlak chhunzawm ta ber mai chu a siamdan tur an tih ang chuan han siam ta se kan ṭhatpuina ai chuan kan buaina a lian zawk ngei ang. Chuti a nih avang chuan a ṭhenin a chhuata lung phah lovin an siam a (fit hnih leh a chanve a zauva lung phah tur fit ruka zauvah i phah mai chuan hekna hlir hekna hlir a ni mai dawn si a). Chuvangin, a chhuat chu an kalsan ta mai a. A bang chu khawi chinah nge pin tur a hriat tawh si lova. A ṭhenin kawr kam lei awm mai mai te cement leh balu chiarin an han pawng bel ngawt a. A ṭhenin chuti lo deuh chuan an ti a. A ṭhenin engemaw ti tiin an tia. Tu pa ramhuai hmu ang mai emaw hian an tih tihin an ti ta vel mai mai a.

Dawhkan aṭanga a duangtuhovin Computer a an han duan a, colour printer aṭanga an print chhuahsa a mawi dawn tehlul nen a tak nen chuan a inhlat ta vai vai kher mai. Department lam aṭanga endiktu leh viltu tur lah an hmel kan hrethiam lo nge kan tawng fuh lo nge kan buaichuar ta riauva. An zawh tawh leh tawh loh kan hre lova, an siam tak leh tak loh pawh kan chiang ngam lova, bill an lak tawh leh tawh loh pawh kan va hre pha tawh bawk lova. Hna ropui tak mai, veng khat tawp tuihawk luankawr siamṭhat vekna tura sorkar laipui aṭanga pawisa lo awm chu a zuzi ta hle mai.

Aizawl veng hrang hrangah kawrpui hmel i hmuh hian kan incheina leh kan chawlhni inkhawm thuamhnaw nen hian ngaihtuah kawp thiam harsa i ti ve thovang a. Kan kawrpui hmel han hmuh hi chuan inchei tak maia han vahvel te leh inti changkang awm taka han awm te hi zahthlak tih chang i nei ve mahna. Pathian hnaih tumin zing tin kan
ṭawngṭai a, India rama hnam inchei parh ber te zing ami kan ni hial awm e. ‘Fai hi Pathian anna a ni,’ kan ti ngut mai a. Mahse kan kawrpui kianga han din hi huan Pathian pawh hi ang ve thei hian kan mawi lo. Kan ar pul hri leh kan vawk dam lo hrileng leh damdawiin lama kan zi hut hut mai te leh mitthi dar inchhawn chuah chuah te hi kan kawrpui hmel han hmuh hi chuan kan phu tawk hialin a hriat a.

Chutianga kan bawlhhlawh luan khawmna kawrpui chu a tenawm lai chuan a siamṭhatna tura pawisa awm kan hman zawhdan ningnelzia chu kan vengah lo kal la entir pawh ngai lovin nangmah ringawt pawhin i hmu vek ang. Mi rinawm fal zual leh pa tlawmngai zual kuthnu erawh hmuh tur a awm ve zauh zauh e.

Kan bawlhhlawh tlingkhawm manganpui vangin fel zawk leh awmze neia bawlhhlawh kan thehthang theih nan bawlhhlawh bawm kan sem angah ka lo ngai ve rawk hi ka lo tisual a ni maithei. Heng bawlhhlawh bawm te tak te te pahnih hian kan kawrpui hnawmhnawk hi a chhawk meuh em kan hmu thuai ang a. Fur lo thleng leh mahse kan veng tan chuan pawisa khati zozai senral hnuah khan huphurh tur chu kan la nei nual mai. Kan hmasawnna hi zuang lovin kan duhthusam hi a zuanin a zuang ni maiin a lang.