TAXI LEH MIZORAM

Kar hmasa lawkah intlan chhawk tura sor-karin a tih duh loh vangin Taxi puten nawrh an huaihawt avangin ni khat an tlan lova. Taxi chungchang leh kan Aizawl khawpui Traffic khawsazia hi a inzawm ngheh em avangin kan sawi zing ta viau a, kei phei chu engemawti lai phei chuan Taxi pute khan Press Release te min chhuahkhum nghe nghe a. Mahse huata han lak enah pawh ka en lem lo. Ka huat lem loh avangin anni pawhin a mimal anga min huat reng pawh ka ring hek lo.

Hetia Taxi chungchang rela a State buaia buai nuai nuai a, thu leh hla awm teivet pawh hi a mualphothlak angrengin ka hria a. Hmasawnna hna dang buaipui tur kan ngah tehlul nen Taxi chungchang bawk hi buaipui a ngai leh ta thin zawng a ni.

(1) Taxi chungchang kan sawi hian a ṭobul berah chuan kan sorkar thiam loh a ni phawt a. Sorkarah pawh MNF sorkar khan a tisual chiang mai a. ‘Mi eizawnna tur insiamsak,’ tiin chin tawk nei lovin a duh leh a dil zawng zawng hnenah Taxi permit an han pe a. Sap thufingin, ‘Anything too much is not good (Eng thil pawh a tam luat chuan a ṭha lo)’ a tih ang chiahin kan Taxi permit pek chiam chiam kha vawiinah chuan kan buaina reh thei lo tawp a ni ta mai a. Khatihlaia Taxi permit an pe chur chur mai kha a lo pawi kumhlun ta mai zawng a nih hi. Kan Taxi awmsa hi kawngin a daih lova, a dinna turin a daih lova, a chuang tur mihringin kan daih hek lova, motor dang tlanna tur kawng a awm ve ta lo bawk a, Taxi buaiin kan buai ta. Kan Taxi awm zat hi kan khawpuiin a tlin lo a ni.

(2) Taxi hi a tam a, City Bus pawh a tam a. City Bus hi chuan hman aṭangin intlan chhawk ‘system’ hi an lo hmang tawh a. Dan angin an neih a, a ding turte hi chu ṭha takin an ding fel mai a, mahni tlan loh ni-ah pawh tlan an tum an tum buai tawh lo. City Bus pawh hi a tam lutuk a, an vai hian tlan se kan Aizawl khawpui hi a buai thovang.

(3) Eng vangin nge Taxi kan tih leh ṭhin? Mimal motor te chu mamawh chang chauhva khawlaia inlar a ni a. Tam tak phei chuan lirthei tawt vanglai chuan an motor te an keng lo mai a. Motor tha pui pui nei, fate Two Wheeler hnunga bet vaw vaw tam tak an awm a. Lirthei ziaawm hunah an motor chu an lek chhuak mai a. Motor nei zawng zawng hian an kal duhna apiangah tunah pawh an lirthei hi lek chhuah vek tum se kan lirthei tawt zawng hi nasa takin a buaithlak ang. Taxi erawhchu kawng dung hi an eizawnna a ni a, an tlan chhuak lo thei lova, kawngpui a tawt pawhin a titawt belhtua an tan kha an tihtur a ni. ‘A tawt em mai ka keng lo mai ang, ka chhuak lo mai ang,’ ti ve ngawt se an nihphung an hloh tihna a ni hial ang. Chuvangin, Taxi avanga kan lirthei che vel a buaithlak hian Taxi khalhtu emaw, a neituin emaw mawh a phur ngawt thei lo. Dan hmanga rel fel chi a ni.

(4) Kan khawpui kawng hi a lo tawt a, a buaithlak tak viauah chuan a ngaihtuahtu tan chuan, ‘Eng vanga tawt nge? Eng kan tih hian nge awmze nei thei ta ang?’ tih ngaihtuah loh theih a ni lova. Kan kawng hi a letin zauh thut vek ila, tuna kan tlan dan kawng pangngai awm tho si hian tlanna tur dang ruahman thei ila chu Taxi Taxi kan ti lovang. Mahse chu chu thil harsa tak a nih avangin a kawng lam ai chuan a lirthei hi siksawi dan awm sela a awlsam zawkin a lang a. Chutah pawh kan duhthusam kan la thleng pha hek lovang. Mahse kan siksawi loh lekphei chuan kan buai hle mai si a, a siksawi dan zawn hi a ngaihtuahtute tihtur a ni. Ngaihtuahnaah chuan eng motor hi nge kan buaina tam ber leh tihdanglam theih? tih kha ngaihtuah leh tur a ni. City Bus vang a nih chuan City Bus, Pickup truck vang a nih chuan pickup truck, chutiang chuan a nawlpuia awmze neia siksawi theih kha zawn a ngai a ni.

(5) Kan thianpa pakhatin, ‘Motor tlan hi han en ila, Aizawl khawpuiah chuan motor sawm a inzui chuan chung zinga pasarih chu Taxi a ni,’ a ti a. Englai pawhin chu chu a ni vek lo, mahse a chang chuan sawm zinga pakua chu Taxi te a nih chang a awm a, sawm zinga panga hi chu motor chi khat, Taxi hi chu ni ngeiin a lang.

(6) Rorelna hi mipui tam ber tana tha tura kalpui tur niin ka lo ngai a. Dan hi a awm phawt ang a, chumi zawm chunga la ding khaw chhuak thei Taxi neitute, a khalhtute chu an ding chang ang a. Chuti ni lova tu te emaw hlau chung leh mi tam vak lovin vote hmanga min paih hlauh vanga ram mipuite tana dan tha siam ngam loh te, siam theih loh te hi chu hruaitu changkang lo leh dawihzep tih chi niin ka hria. Aizawl khawpuia awm tak avanga mitinin darkar tam tak ni tin hloh tak mai hi kan sum bawm hian a tlin lova, kan hnamin kan ṭhatpui lovang.