KRISMAS CHIBAI

A lo thleng dawn ta tak tak e — Krismas chu. Kumte lo tam vein ṭhat lai hun angin phur hluainate awm lo mah se, rilru hian Krismas hi chu a nghak tlat a. He Krismas thlarau hi mi tam tak tan chuan tlan chhiatsan ngaihna a awm lo. Krismas lawm theih hauh lohna hmunah pawh awm ila, kan thinlungah Krismas chu a awm reng a, kan kumthar ai hian rilru hian a nghak tlat ṭhin. Krismas chu mi tam tak thinlungah chuan chutiang chuan a bet nghet a, paihbo theih a ni lo va, thin thlak theih a ni lo.

Krismas hman dan ṭhate an sawi ṭhin a, a dik hlawm vekin a rinawm. Krismas hi zawng, a Krismas em mai a, hman dan chi hrang hrang pawh a awm ngei ang. Krismas lawm nana Krismas hla, tui tak maia han sak a, ruai ṭheh tur pawn lamah a'n inchhuang vut vut mai a, khaw dang hawi thei lo leka Krismas lunglenna te, Bethlehem ngaihna rilrute leh hunpui inher tur ngaihtuahna kila riak reng chung a, meng phal mang lo khawpa han zai tui maite chu Mizo kristian tam ber duhthusam a ni hial ṭhin a. Mahse, kan tunlai ṭhangthar thinlungah chuan zaikhawmte hian hmun chungnung a luah tawh lo va, hmun lairil a luah hek lo. Eng emaw tak dang hian ṭhangthar thinlung chu a luah ta tlat a. Krismas hla a dang zo va, 'Sikri kan ai e,' tih tuipuia tlaivar dawn dawna lo inawi tawk pawh awm theih tak a ni ta. Hmuh leh hriatin phur chhuak ta miau lo chu tihngaihna dang a awm si lo.

Ṭhenkhat thinlungah chuan Krismas apiangin thilpek a lo lang ve thung mai awm e. Krismas laia thilphal hi ṭhenkhat tan chuan Krismas a ni ta ve ang. Chutah chuan an Krismas a awm a, chutah chuan an lawm a kim. Thilpek theh chhuak lova Krismas hman zawh chu ho riauva hriatnate pawh a awm ang a. Krismas laia thilpek pe chhuak tura inngaihtuah, Krismas lai huna tute tan emaw luang chhuak tura inngaihtuah a, thil dang zawng zawng chu a behbawm anga ngai awm theih tak a ni ta. Krismas tuka tute nui hmel emaw siam a, Lal Isua chibai buk nana tu tute tan emaw lawmna thlentir tum hi mi tam tak an awm. Chu'ng mite Krismas chu mi dang tan a hlu bik awm mang e.

Krismas laia intuituah tum, ei sen loh chhekkhawl a, ni hnih khat lek atana ei tur leh intuituahna chi hrang hrang lakhawm hi mihring kan tam viau ang. Hun danga kan neih ngai hauh loh leh kan ei ngai hauh loh pawh Krismas laia neih loh chuan eng emaw tlachham riau dawna inhriatna hi a awm thei. Krismas laia ei leh in tur tlakchham hlau reng renga fanghmir haw lam anga mahni in chhunga khai lut ta zut zut tawk hi; mi vantlang kan ni hial awm e. Ni danga kan mamawh miah loh leh kan neih ngai hauh loh kha Krismas lai tak hian mamawh dawnin kan inhre ta tlat ṭhin a. Kan tihdan hriat chhun te pawh a ni ve ang a, Krismas laia chhungkaw hnianghnar tak tak hi kan tam ngawtin a rinawm. A sualna engmah sawi tur ka hre lo va, mahse kan khawsak phung pakhat a ni ve tlat. 'Thinlung A lamah hawn ila, ro thil dang a ngai tawh lo ve,' tih hla kha hetiang hunah hi chuan mawi ka ti thar leh thut ṭhin.

Ruih theih thil ti mi te mawlh mai hi Krismas lai chuan an thil duh neih kawngah tlakchham hlau berte an niin a rinawm. An thil tih ṭhin chu Krismas lai taka tlakchham mawlh an hlau va, Krismas chuan zalen taka an thil tih ṭhin tihna hun a rawn hawng niin an hria a, an neih chuan an hlim, an neih loh chuan an hlim thei lo va, an lungkham ut ut ṭhinin ka hria. Heng mite khawvel hi chu a vir kualna a hnaivai kan ti dawn nge, an mamawh hi a bing ngat mai a. Thil dang hi chu a 've' lek a chang zo ṭhin.

He Krismas hian kawng tinrengin kan nunphung a khawih a. Eng ti maha awm chuang lo tur pawh hian mi tam tak chuan kan in te, kan khuate kan pan vang vang a. Krismas laia kan awm duhna hmun kan va thlen khan eng tehchiam mah tih pawh kan tum lem lo va, tih tur pawh kan hre lem lo. Mahse Krismas-ah kher kher chuan kan khuaah te, kan in pangngaiah te awm ngei kan duh ṭhin. Hei hi chu khawvel pianken a ni ve mai awmin a lang. Krismas laia khaw dang leh hmun danga awmte kan han hawkhawm nak nak a, kan han inchibai nak nak hi eng zat man nge ni ang tih tu ma'n kan hre lo. Krismas zing ni chhuak, mahni in ngei aṭanga hmuh theih hi mi tam tak duhthusam a ni.

Kan Krismas hla ṭhenkhatah lusun chhungkuate tana a lunglenthlakzia nalh tak taka phuah kan hmu a, lung a kuai lo thei lo. Lusun chhungte tam tak chu he hunpuiah hian an khawhar an ṭap a, mi zawng zawng hlimna karah lunglengin an vân ruai ruai a. Mi dang hmuh lohvah an mittui a luang a, mi nui thawm karah a rukin an ṭap ṭhin. Nia, he khawvelah hian kan lungngaihna chuan mi zawng zawng hlimna hun a lo thlen chuan min delh rit bik a, min tilungleng zual ṭhin. Retheihnain a bawm nu leh pa tam tak chuan an fate an en ang a, an Krismas duhzawng an leisak theih loh avangin hrehawm an ti a. Thawhlawm thawh tur nei lo an awm lek phei chuan chu'ng mite khawvel chu thawhlawm chungchanga buai ve ngai lo chuan kan hriatpui pha ngai lo vang.

Hmun tina Krismas lawmna hla mawi a fàwn vel lai leh, hmun tina mahni intuituah tum hmel hmuh tur an awm lai hian i kiang hnaiah chutiang hla mawiin a chawh thawh zawh ve loh, damchhung khawsak harsatnain a delh beh an awm hlauh chuan; chu'ng mite tan chuan luang chhuak thei la chu i thinlung chhungrilah lawmna luipui a luang mial maithei.

Ruih theih thil ngawl vei nu leh pa te mawlh mai hi an khawngaihthlak ṭhin. Krismas boruak a sàn poh leh an mangan a zual emaw tih tur a ni a. 'Engtikah nge chanchin duhawm lo takin min rawn den thut ang?' ti réng rènga mi zinga awm lo thei lo dinhmuna dinte pawh kan khawvel hian a keng tel ta hial em maw ni tih tur a ni. Sual bik vang ni hauh lova faten hum sual an dai avanga hlimna kûtpuiah pawh rilru chhungril thlamuang ve thei lo eng zah tak awm ang maw le?

Kan Aizawl khawpui hmun ṭhenkhat chu mawi takin, pawisa tam tak sengin an chei a, a hmuhnawm ngawt mai. Heng cheimawina hian Krismas thinlung min puttir chuan a ṭha lehzual a, min puttir ta lem lo a nih pawhin a inhmehte pawh a inhmeh tho tho mai. Mihring hian eng emaw hunah chuan a mit tihahdam zawng emaw, a rilru tihahdam zawnga danglamna eng emaw hi kan mamawh chawk ṭhin a. Heng khawlai cheite hian rilru a tizangkhaiin mitmen a tinuam a, Krismas nen hian inhmeh tak a ni. Aizawl khawpui piah lamah pawh kan la uar chhunzawm zelin a rinawm.

Krismas hun a lo thleng a, tlawm tein a awmna hmun hmunah nipui par a lo par sen hlerh hlerh a, tlangsam te a lo par chhi chhiai a. Heng hmu thei leh mitthla tal pawha hmu theia kan la awmte hi malsawmna a ni a, vanneihna a ni. Khawiah emaw chuan nakin lawkah zaikhawm khuang ri leh Krismas hla, benga cham reng chungin kuthnathawk mi chuan a hnathawhna hmun, ram lam a la pan ang a. Khawpuia awm tam tak pawhin an hnathawhna, kum tluana a ngai ringawta mihring zi nuai nuai awmna an pan ang a. Pisa lama thawktute pawhin nikum chhung zawnga an dawhkan kil ṭhin kha an kil leh ang.

Hlim taka Krismas hmang a, dam taka awm turin duhsakna ka hlan che u a — Krismas chibai vek ule.