REVD CHUAUṬHUAMA THIH THU

Pu Chuaua damdawi-ina a awm thu leh a ngaihtuahawm thu kan han hre thut a. Reiloteah a chatthla zui ta nghal mai bawk a. A hrilhaithlak ngawt mai.

Mihring nunphung aṭanga teh chuan hrisel tur an awm chuan Pu Chuaua te chu hrisel tur an ni. Hun vawng ṭha, mahni taksa enkawl thianghlim leh ngaihtuahna hrisel tak nei an ni a. Mahse mihring taksa ropui tak mai hi a khawilai pawh hi a buai tawh laklawh chuan a buaithlak thei em mai a, tih theih piah lam tamzia hi kan kum a tam ang hu zelin kan hriat belh zawng a nih hi.

Mizoram mitthi zingah a hun lova thi kan tih leh kan ui zui tak ngawih ngawih hi thlang dawn ila, ṭhianpa RK Lianzuala te, Mafaa te leh Pu Chuaua te hi thlangtu kan tam ngawtin ka ring a. Chu bak pawh kan hnathawh leh kan mi ngaihsan zawng a zirin thlan chhuah tur kan nei hrang thluahin a rinawm. Heng ka han sawi chhuah pathumte hi chu Media lama inhmang te, Literature lama inhmang te an ni deuh vek a. Pu Chuaua hi chu kohhran leh Pathian thu lama inhmang nasa leh mi thiam a ni a, Literature tluangtlam leh Pathian thu lam kaihhnawih lo lamah a inhmang nep deuh. Chutih laiin Pathian thu lamah erawh a inhmang nasain a zirna leh a nihnaten a zir bawk a, Pathian thu lam lo chu han ngaihtuah hleithei pawh a ni meuh lovin ka hria.

Ka ngaihtuah dan chuan Pu Chuaua te ang kha chuan Bible chang khawilai mai pawh hi mi thiamte thu leh hla hmanga hrilhfiah theih vek an tum ni deuh berin ka hria a, a theih pawh a thei maiin ka ring a. Kei nen chuan kan inang lo nasa hle mai. Kei chuan Pathian thu hi hriat belh emaw, hrilhfiah belhchhah emaw hi ka tum ta lo angreng a. Ka hriat tawh sa zawm tumte leh ka chhiar tawh sa, ka lo mangnghilh titih te hi han hriat thar leh a, duh lai lai mahni tawka tuipui a, awmhmuna Pathian ropuizia ngaihtuah maite hi ka tleipui tawk fe ta mai a. Pu Chuaua te nen chuan inpersan angreng tak kan ni.

Mihring hi kan ngaihdan tam tak inan loh avang ngawta inhaw tur emaw, inhal tur emaw kan ni lo va, kan ngaihdan ang lova ngaihdan neite pawh an sualin an mawl ngawt hek lo tih hi Krismas han hman tam deuh chuan a langin ka hria a. Pu Chuaua nen pawh zu chungchangah chuan kan ngaihdan a inpersan daih mai a. Ka hriat dan chuan ani chuan Kristian deuh hlir kan awmkhawm chuan zu chu khap turah a ngai mai a, zu khap chu kohhran leh sorkar tihtur dik takah a ngai a. Kei erawh chuan khap rem theih loh pui khap a, buai buai ai chuan mi ram zawng zawng deuhthaw tihdan anga khap bur lem lo va, fimkhurpui deuh hi ṭha zawkin ka hria a. Kan ṭanhmun leh kan ṭanna lam han sawi tak tak chuan kan sawi kan sawi a, kan insawi ba tam tulh tulh a, kan ngaihdan a inpersan nasa tulh tulh ni mai hian ka hria a. Ngaihdan inang lo tak ni mah ila, Pu Chuaua kha a thiamna kawngah te, a ṭhahnemngaihna kawngah te khan tluk rual loh khawpa taima leh mi inpe, thluak ṭha bawk si niin ka hria a, zahawm ka ti. Khatiang mi thiam leh mi inpe leh thawm na kha ni lo se, kan Mizoram zu khap chungchang pawh hi a danglam hial law maw ka ti.

Pu Chuaua te ang kan ngaisang a, kan zah a, kan ngaina tlat mai kha a lawmawm. Mi tak tak kan ngaihsan chhung chuan duhthu sam lohna tam tak nei mah ila, keimahniah beisei tur a la awm tihna a ni. A thih ni kha chuan, "A thi a nih chu," ti ringawt ila, Revd Chuauṭhuama chungchang sawina a ni tih mi tinin kan hria ang tih tur khawpin mi rilruah a thawk a. A ropui ngawt mai. Isua thlàn te kha measuring tape nena zu teh thlap mai kha a ni a, a measuring tape kha in aṭanga a ken sa nge, Israel rama a lei chawp tih pawh kei pek chuan ka hre ta lo.

Kan la thi ngei dawn — chu aia thil chiang chu kan nunah hian a awm lo. Pian ropui ai chuan thih ropui hi a ṭha fe zawk. Chuti a nih chuan Pu Chuaua kha ropui takin a thi tih loh theih a ni lo va, kan thih nia kan ropui leh ropui loh tehna ber chu mi thinlunga kan thihnain nghawng a neihdan hi a ni ngei ang. A'n thih chiah khan mi tam tak rilruah chuan Pathian thu lamah Mizoram hi a ruak ta deuh sawtin a hriat ngeiin a rinawm a. Keini Mizo, chawlhni a lo thlen tawh phawta mi pangngai chin chu inkhawm vek tura inngai hnam tan chuan, Pu Chuaua kha sawi nep theih a ni lovin a lang.

Thihna thuah kher kher hi chuan he mihring hi kan thu lo viau mai. Ṭhenkhat chu kawngpui aṭanga lang phak lo thleng lum a, pem chhe te te bak nei mang lova dam chhuak an awm laiin, kawng hrang hranga teha thi àwm lo tak, an han thi mauh mai te hi chu hrilhfiah a har ngawt mai.