HLA KUNGPUI MUAL

Mizoramin Hla Kungpui Mual kan han nei hi chu a lawmawm mang e.

Hla Kungpui Mual lo pian chhuah lai vel te kha hre ve riai ruaiin ka inhre pek a. Kan sawi sual tak leh min lo ngaithiamin a dik zawk te, a chanchin ngaihnawm zawk te rawn pho chhuah nan kei aia hrechiang zawk te’n an rawn hmang ang tih ka beisei.

Mizoram thu leh hla dinhmun hi kum 1980 bawr chho, Burma ram aṭanga Pu B.Lalthangliana a lo chhuk hma, America ram aṭanga Prof. Siamkima lo kir leh hma khan a sang teh vak lova. JF Laldailova te, Remsangpuii Pa te, James Lianmawia te leh chumi hmain Zikpuii Pa te, J.Malsawma (Thanpuii Pa) te, C.Thuamluaia te leh midangte avang khan a nung ve a.

Burma ram aṭangin Pu B.Lalthangliana a rawn chhuk a, Mizo History a rawn buaipui a, a tui em em mai a. Kan Documents te kan lo fawmkhawm that lohzia te hriain theihtawpin Documents te a khawn khawm a. Ka hmuhdan tak phei chuan ama’n a kawl loh chuan a bo thlau mai ang tih te a hlauh avangin ama kawl ngei lo phei chu a ringngam lo ni hialin ka hria. Mizo Academy of Letters te a rawn tuai nung thar leh a, phur takin Aizawl khawpui dung leh vangah hian History lam leh thu leh hla lama kan inpawl khawm theihna tur te, hma kan sawn theihna tur te a ngaihtuah a. Dik tak chuan Pu B.Lalthangliana rawn chhuk hma kha chuan kan mithiamte kha mahni ṭhuthmunah midang pawi sawi lo, hma la tehchiam lo, thil ṭha lo tur pawh ti chuang lovin an thu hrang fir fer niin ka hmu a. Pu B.Lalthangliana khan min kai khawm ta ni berin ka hmu.

Pu B-a zarah Writers Association te pawh kan din niin ka hria. Chu Association chuan Academy of Letters (MAL)-in a ngaihtuah tel ve loh lam, Translation Book Award te pawh vawiin thlengin a ngaihtuah ta a nih hi. Mizoramah hian Literature lama kan insuihkhawmna emaw, kan intel khawmna emaw lam ngaihtuah chuan Pu B.Lalthangliana hi a thawh hlawk ber niin ka hmu a. A thawh rah zar kan zo tam khawp mai. Pu B-a tel lo chuan MAL pawh kha a awm ve che che chauh hman ti ila kan sawi sual lo maithei. Hruaitu nih tum lo, thawktu nih tumin theihtawp a chhuah tih kha mita hmutu zinga mi niin ka inhria.

Kan Khawbung unauten an ngaithiam lo hran lovang a, he Hla Kungpui Mual pawh hi Pu B-a ngaihtuahna leh hmalakna avanga lo puitling ta a ni tih hriain ka inhria. Pawl leh khawtlang angin heng thu hi ngaihthlak a lo nuam lo palh a nih chuan min hrethiam se. Prof. Siamkiman thu leh hla a’n luhchilh a, Zalenna Ram ziakin Poet’s Corner te a rawn sawi vung a. Khang aṭanga lo inmung te pawh kan ti thei ang a. Tunhmain Poet’s Corner te chu kan hre tawh a, mahse Prof. Siamkiman a sawi vul hma kha chuan chuti takin kan uksak lo. Mizo thu leh hla khawvelah chuan Prof. Siamkima Zalenna Ram kha a den a na khawp mai a, thu leh hla lamah Mizo ten kan mit kan men zau phah hawk kan ti thei ang.

Duhthusam ram thlirin, Khawbung lam khaw chhung unaute inpekna nen Hla Kungpui Mual chu vawiinah chuan a lo pawimawh ta hle mai a. A lawmawm mang e!

A mual a nuam si, a khaw miten an hlut thiam si. A mualah khian thing chi hrang hrang phun te an tumin a bei tawk an awm zel a. Lengkhawm hla phuahtu ropui, Patea te leh Solfa hla siamtu ropui, Vanmawia te, ziaktu ropui Dokhuma te leh awlsam taka ziak thei R.Vanlawma te an han awm a. Heng mite leh midangte thangthar tana hriatreng loh theih lohva he Hla Kungpui Mualin min han tlarsak hi Zofate tan thil lawmawm a ni. Mahni dam laia thiam thil avanga inhlankai mai theihna tur a awm lova, a thlan dan thuah pawh keini phak tawkah chuan an fimkhur tha em mai a, a hlu hle a ni.

Hla Kungpui Mual kan neih avang hian lawm tur kan niin ka hria a. Heta tlar ve phak nih hi thu leh hla lama tui mite tan chuan Life & After Time Achievement ni hialin a lang. Pawngpaw tum vak avanga tel ve phak erawhchu a harsa phian ang a. Kan thih hnuah mite thinlunga luah ve awm kan nih leh nih loh chauhvin he hmun luah theihna hi min pe dawn a ni. Chutiang hmun Mizoramin a nei ve chu kan tan a ropui hle.

Tunah zawng, thu leh hla lama tui, ṭhangthar tan Hla Kungpui Mual tlawh lova awm reng chu thil tihchi vak a ni ta lova. Hmu chak lo chung chung pawha tlawh ve ngei hi mi tam tak (thu leh hlaa tui leh tui reng tum he hmun la tlawh lo) tan chuan a ṭul ta reng mai. A tlawha tlawh ṭul hmun kan han nei ve ta hi a lawmawm.