ASSEMBLY SESSION

Tun tum Assembly Session ang tluk reng renga ngaihven hlawh Assembly Session hi a la awm lo vang tih hial turin mipuiin Assembly Session hi kan ngaihven ni hialin ka hria. Hetia Session kan ngaihven tak viau nachhan hi thil hrang hrang a awm thei ang a, ngaihdan pawh a inang vek kher lo vang.

Keia lo ngaih ve dan chuan hetia Session kan ngaihven tak viau nachhan hi tun ṭum inthlan liam taa politician ni lem lovin inthlan hun an nghakhlel ang deuh hlek kha niin ka hria a. Kan sorkar liam ta kha ngun taka han thlir vang vang khan duhthu a sam lo lulai deuh a. Mi tam tak kha kan mangang tak zet zet ti ila kan tisual lo hial awm e. Tun thleng hi chuan kan sorkar liam ta khan sorkarna a chang nawn leh mai ang tih kan hlauthawng hnuhnawh lehzual ni hialte pawhin a hriat theih. Sorkar kal liam ta Party mi leh sa tam tak pawhin kan sorkar thlah liam tak kha sorkar chhunzawm ta zel se la, Mizoram hian kan vanduaipui viaua ring an awm nukin a lang. Sorkar hmalakna hrang hrang leh thawm kan hriat khan min tiralkhel tlat ni berin a lang a. Cheng nuai zate kha a bo titih vel mai mai ni tlatin a lang a. Pawi khawihtu ni ngeia mipuiin an hriat, kan sorkarin hrem tumna reng reng a neih lohte awm tlatin kan hria a. Tu pa tuparawng chher thiam an sawi emaw ang maiin, kan sorkar hmalakna kha phullem phahah a tawp titih zel mai nite pawhin a lang a. Kan hotuten phur em ema an sawi mau pawh a chi kan lei fel te te a, a reh zui vang vang bawkin a lang a. Hengte leh thil dang dang han thlir khan mi pangngai leh thluak fim pangngai tan chuan kan ram dinhmun kha kawng hrang hrangin a chhia a, a chhiat chhan laimu berah pawisa thila duhamna inphum tlatin a lang a. Kum 2008-a MNF Party-in thuneihna a chan hmasak khan mi tam tak chu an ralkhel tawh a. Hel pawl leh Mizoram sorkar kha a inhne hnai lutuk ngeiin a lang tlat a. Kan ram chhung ngeiah tisa thil taka him loh dan awm thei ta tlatin a lang a nih kha.

Khatiang deuh khan tun inthlan hma khan mipui kan ralkhel deuh tlat a. Mahse tun ṭumah chuan hel pawl nena inthlunzawm thu-hlate leh, tisa thil taka him loh theihna lam ni lovin kan ei leh bar leh kan sorkar sum dinhmun kan ngaihtuahin kan ralkhel tlat a. Chu chauh ni lovin, chhun khaw eng zahderna nei lova sum leh pai thila duhamna kha a langsar ta riauvin, mipui hmai eng zahna nei lova khawsa ang deuhvin kan ngai tlat a. Mi dang hian eng angin nge an ngaih ka hre lo va, pawisa tam tak kan senna, kan Airport cheina emaw ni, siamna emaw ni te angte khu vawiin thlengin a ṭangkaina leh a hnemhnanna tur ka la hmu thiam phak lo va. Khu thil khu kan mamawh thil niin ka hre hauh lo. Kan pawisa senna ber, Airport building chung lama lawn chhohna tur concrete slab dawh zur mai khu a hman ṭangkaina tur awm ka hrethiam lo va, a awmzia ka la man ve lo. Thlawhna ding lai kawngkhar nena kalkawng dawh zawm a, luh thliah thliah hi chuti takin a ropui bikna ka hre lo va, keini tan thil ṭul takah ka ngai ve hauh lo. Mi pangngai chin deuh nena han sawiho thui deuh chang pawhin a tawpah chuan, 'Pawisa siamna a ni mai,' tih hi ka chhanna dawn tawk a ni leh ṭhin a, awih loh ngawt ngaihna pawh ka hre lo.

Hei chauh hi ni lovin Kolkata Mizoram House, Old Bullygunj-a awm, 1980 bawr chhova kan thlenna ṭhin kha kan Mizoram sorkar chuan a lo hralh titih a, pawisate pawh an lo inhlan hial tawh a, mahse tun sorkar thar hian a titawp a, a leitu lam nen kan sorkar chu an inkhing zak zak dawn chu a ni ta mai. Ram neihte a harsat a, hmunhma hmuhte a harsat tehreng nen, a engti tih hian nge maw khutiangte hralh kan lo tum reng reng ni. Kolkata-a awm Mizote pawhin hralh a ni tih an han hriat tirh khan mak an ti a, an ui ngawih ngawih a, an thlep hnawp a ni ti ila a sual lo vang. A thawktu pakhat sawi dan phei chuan chhiah kha pe mumal lovin rei tak mai kan sorkar kha a lo awm a, chhiah pek tur tlingkhawm kha nuai 200 chuang vel daih a ni a. Mahse Resident Commissioner Talo Rosanga taimak leh remhriatna azarah nuai 30 velah an tihniam a. Mizoram sorkar khan rang takin kha leiba kha a pe a, awm pangngaiin kan awm leh thei ta ni awm tak a ni. Chutianga hah tak a mi ṭhenkhatin an lo humhimsa chu kan Mizoram sorkar kal ta khan a lo hralh a, lehkha erawh an lo ziak fel fumfe hman lo mai chauh ni awm tak a ni. Mahni House neihsa pawh hralh duh ut ut khawpa pawisa mamawhin engtin nge kan Airport-te hetiang zat pawisa senga kan lo tihdanglam a, Meidum bulah ONGC kawng turte pawisa tam tak senga kan laih rikngawt tih hi ngaihtuah tham tak a ni.

Heng thilte leh thil dang dang avang hian kan sorkar kal ta kha mi tam tak hian sorkar leh turin an it lem lo va, la sorkar ve ngai hauh lo ZPM hian engtin nge he ram hi an kalpui dawn tih mipuiin an hre chak ta zek zek mai a. A hmaa kan sorkar thlah liam tak nen khan eng ang taka danglam nge an nih tih hi mipuiin kan hre chak ut ut ni berin a lang. He thu ziah lai thleng hi chuan mipuite hi kan sorkar thar lakah hian an lungawi viau mai a, mi tam tak rin phak bakin an la che ṭha chho zel a. Mi ṭhenkhatin, 'An hla ki an la sang lutuk a an tlin lo vang,' an tih aia tlinin an hla lak hi an sa chhunzawm rih niin a lang. Kha chen Health Care bill bat tawh pawh sorkar thar chuan a'n pe chhuak mai a, sorkar liam ta nen chuan a danglam deuh niin a lang.

Mi tam takin an phone aṭangin Assembly Session rorel lai hi awmhmunah an lo thlir a, hetiang reng renga Budget Session ngaihven hlawh hi Mizoramah a la awm ngai awm lo ve. Duh dan phei chuan hman aṭang khan kan ram roreltute che vel leh Session te hi hetiang hian lo ngaihven ṭhin ila chu, kan ram pawh hian hma kan sawn ve sawtin a rinawm.