KOLKATA MIZORAM HOUSE KAN HUM THEI DAWN EM?

Mizoram mipuite hian kan sorkar thar, ZPM kaihhruai sorkar khawsazia hi kan thlir ṭhuap a, mipui sorkar, eirukna leh hleih neihna awm ve lo sorkar chuan engtin nge ke a chheh tih hi kan thlir a ni. A hma zawnga Mizoram sorkar lo kaihruaitu Congress leh MNF te hi tun inthlan hnuhnung berah khan lo sorkar ta se, mipui beiseina hi a danglam hlein a rinawm. Congress sorkar leh MNF sorkar-ah chuan mipuiin kawng hrang hrangah beiseina zaa sawmnga vel nei ta se, ZPM sorkarah erawh chuan kan beiseina hi zaa sawmkua panga vel ni hial awm a ni. ZPM mi leh sa ni lo, Party danga awm harhfim deuh leh rilru tluang pangngai tam tak hian an awmna Party bansan chuang hauh lo leh, bansan pawh tum chuang miah lo hian ZPM sorkar hi an ring zawk ta tlat niin a hriat theih — an ṭawngka ngei han hriat hian. Mahse chutiang chu eng emaw zat awm mah se, pawl tinah hian pawl thlarauvin a chenchilh, harh chhuak thei tawh miah lo hi eng emaw zat an awm vek a. Chu'ng mite chuan an rilru leh an vote thlakna an sawhsawn ve thei tawh ngai lo. Chutianga pawl thlarauvin a bawh buai chu vanneihthlak takin mipui nawlpui an ni lo hlauh va, mi tlem te zawk an ni. Vote thlakna sawn thei, pawl thlarauvin a bawh buai ve lohte zarah sorkarna hi a inthlak leh mai ṭhin zawk a ni.

Hetia ZPM sorkarah beiseina sang tak satliah pawh ni lo, beiseina sang lutuk mah mah kan neih lai hian, sorkar kal ta khan eng eng emaw a hnutchhiah a, a hnutchhiah ṭhenkhat chu a ṭha a, a ṭhen erawh a ṭha lem lo niin a lang. Chu'ng chu ngaihthah ngawt theih a ni lo va, maimitchhinsan ngawt pawh a theih vek loh. Amah hla phuah thiam Pu Lalṭanpuia'n, “Kan ram hi kan ram a ni,” a tih ang maiin he Mizoram thil hi Mizo tlangval, sorkarna fawng vuantu tan buaipui loh ngawt theih loh chin a awm. A thu a khirh deuh chuan hunte a duh reiin pawisa sumte a hautak deuh va, a thu a khirh nep deuh leh chinfel a awlsam deuh va. Health Care bill te pawh rang takin ZPM sorkar chuan a chingfel kan ti thei ang. Sorkar hnathawk hlawh lak hun pawh a insawn ve chawpchilh nghal mai. Mahse aikal chungchang te, Kolkata Mizoram House hralh thute hi chuan buaipui deuh an ngai niin a lang.

Sorkar a inthlak vel lai taka hmanhmawh taka Kolkata Mizoram House pakhat hralh a’n ni hram hram hi chu a mak ve a. ‘Tuirini zâwng harh chu an harh khawp a, an tlanchhe tur pawh hian an ban phak mau ler te chu an theih ang angin an sâwi che hram hram,’ tih ang deuhvin sorkarna a inthlak dawn tih a chian tawh hnu si, sorkarna chelhtu turten pisa an la luah hman hma si, ni hnih ni thum lek chhungin he Mizoram House hmunhma hi sorkar tla tur chuan a’n la hralh ta hram hram a. A hralh kawnga an ṭawng chhan ber hmun dang ṭha zawk ngaihtuah tih thuah sulhnu tih tham hmuh tur a awm lo va, ‘Khaw' nge kan thiltih ṭhat ve theih chhun,’ tia hmun ṭha zawk nia ngaih lei thawm a awm lo va, lei tura biak thawm a awm lo va, chutiang hmun tur chu hauh lâwk thawm a awm lo va. A hralh lai vel chiahah hian kan hmanhmawh hle niin a lang.

Mizoram House hralh chungchangah hian thil awmzia hmu chiangtu leh hre chiangtu tam tak tan chuan, Serlui Hydel Project compensation nen khan inanna lai tak te pawh awmin a lang. Khawi laiah emaw hian chhung leh khat, intiamrual remchang deuh deuh mai hian tel vena remchang neih theih tak a ni a, chu'ng mite chuan pawisa suma hlawkna eng emaw an hmuh a remchang dawn bik riau nite hian a lang a. Pa berin hralh a duh ut ut a, a leitu turte duhsaktu lamah fapa a ṭang ni tlatin a lang a, inbiakrem kha a awl duh viau awm e.

Kan sorkar hian he Mizoram House hralh tawh hi lak let leh a tum tak zet a nih chuan kan dan leh hrai lama mi thiam, Mizo ukilte hian kan sorkar hi a tihdan tur ngaihtuahpui thei se a duhawm ngawt mai. Chutiang tur chuan kan dan lam thiam mite pun ve te pawh a ṭha hlein a rinawm. Tun dinhmunah chuan kan Mizoram sorkarin dan leh hrai lama a hmatheh ber tur leh, a hralhtu lamte hi an inngeih thei viauin a lang tlat mai a. An inthurual tlanna lai va hmu chiahin va hre chiah lo mah ila, hralh phal lotute ai chuan hralh duhtute nen hian an inkawm ngeih mai palh ang tih a hlauhawm thei tlat mai a. Kan Mizoram sorkar aiawhtu tur hian theihtawp a chhuah hram hram chung pawhin a chak lo zawkah kan ṭang palh mai ang tih a hlauhthawnawm rum rum mai.

Cheng vaibelchhe 38-a kan hralh, kan Mizoram House kha vaibelchhe 70 vel laia hralh ve theih te pawh niin a lang a. Mahse khatih laia sorkar khan Mizoram chhunga Restricted Tender an ti fai vek ang bawk khan Restricted Auction hmangin thil a kaltir ni awmin a lang. Khatih lai khan New Town lamah ram zau ṭha angreng takte pawh vaibelchhe 30 vel te chuan zawn ni se, hmuh theih te pawh a ni mahna, mahse chu lam ngaihtuah ta lem lo chuan a awmsa hralh lai khan tuipui a hlawh ni tlatin a lang thei.

Kan ZPM sorkar hi mipuiin rin viau kan tum a, beiseina sang tak kan nei bawk a. Mahse eng emaw laiah hian eng emaw hi a ti palh zeuh ang tih a hlauhawm riau va, chutianga eng emaw a awm zeuh loh chu kan beisei tlang phawt a ni ang chu.