NUIHZATTHLAK ITAWMIN SU KYI

Kan ṭhalai nun leh kan ṭhalai ni lo rilru sukthlek hi ka ngaihtuah mai mai a. Ka nuih hi a za deuh tlat mai.

Kan ṭhalaite hian an tur hi an zawng an zawng mai a. Mahse an demawm mai lo, keini pawh hetiang deuh tho kha kan lo ni ve ṭhin a. London velah 1960 chhova Beatles-hovin pheikhawk chhip zum an bun khan keini, Burma ramri depa awm, Willy’s Jeep bak lirthei hmelhriat fumfe nei lo, chaw ei nana thirkut hman chu sawi loh, mau fian hmanga la inhawp tawm tluah tluah te khan pheikhawk chhip zum kha kan han duh ve tlat a. 1970 bar chhova Dev Anand te’n an nghawnga puanthem sen hreng zuih ṭat chunga phaitual hnima Asha Parekh te an han lem kual vel kan hmuh khan Aizawlah Parachute hrui te kan lo awrh ve a nih ngai kha. Kan nun kha a hniam deuhva, keimahni tihdan engmah kan neih loh avang te, Design te, Fashion te leh thildang kan hriat hma a nih avang khan mi tihdan ang ang kha kan inhmeh nge hmeh lo tih pawh hre lovin kan han la chhawng ve ngawt lo thei lova.

Tunah hian kan ṭhalai-te hi an changkang ta deuhva, keiniho ngawt ai chuan thil thar pawh an hre chak ta. Mahse keini ang tho khan anmahni-ah awm fel tak awm ta lo chu an tur hi an zawng ni tlat hian ka hria a. An tur zawn tur hre lo ṭhenkhat hian mahni Mizo ṭawng thiam chian loh hi intihno nan an hmang ni te hian ka hre bawk a. A changin sapram lam an an tum a, a changin Korean an an tum a, a then phei chuan Korean lam an theih nan damdawi engemaw te an ei hial ni awmin ka hria. Sapin Keyboard an tum thin tih kan hria a, kan khawhar hla te Keyboard nen rem teh kan tum a. Kan khawhar hla te hi chu kan khuang nen ngei hian a inhmeh a ka lo hriat tehlul nen. Khuangah mah chuan khawhar hla bikah (lengkhawm dang ni lo) phei chuan khuang khat ngei hi duhthusam ni a ka hriat laiin Keyboard nen kan sa auh auh mai dawn ni te hian ka hria a. Nuih a za titih deuh tlat ṭhin.

Kan ṭhalai lam chu chuti chu lo ni se, keimah-ni puitling (han inti ila) tak pawh hian an tur hi kan dap ngawrh viauin ka hria a. A pumpelhna lah a awm mang si lo. A chang leh Switzerland te an kan tum a, a chang leh USA te kan sawi a, tunhnaiah phei chuan Nitish Kumar leh Tripura te kan sawi zing hlur mai a. Thlarau miten Israel lama thlarau pur chawk hi kan Mecca anga kan ngaih laiin Development lamah chuan Tripura zin te hi intih theih nan kan hmang tan chu a ni ta mai. Han inhrosain han inti Pathian nung be teh mah ila Tripura atanga lo haw hlim tlangval fel khek khawk, Tripura sorkarin an State an enkawl dan sawi tur hre tak chu an rilru a hmin mai a rinawm ta tlat lo. Tripura Chief Minister, Manik Sarkar te chu a hawiher, a thu vuakthlak leh a hnathawh ang deuha awm ve thei Chief Minister kan thlahlel chu a nih tak mai hi. Nitish Kumar leh Manik Sarkar te hi Hindu sakhaw tan Mizoramah Evangelist angrengin rei tawk Crusade an rawn nei ang tih hlauhawm tak a ni.

Delhi lamah Arvind Kejriwal a lo lang a. A hmel leh a awmdan zawng zawng enin thisen lamah kan inlaichin hnai lova, sakhaw thuah kan sangawi zawnpui a ni lo tih thuah kan chiang. Mahse kum li kum nga chu min han awp ve hrim hrim se kan danglam mai te kan ring a. A hmel pawh hi ngaihnobei ta viau hian kan hre tawh. Kejriwal ang deuh hi tu emaw kan ramah hian lo chawr nelh sela mipui chuan kan hnial hauh lovin a rinawm.

Tunah Myanmar lamah Suu Kyi a rawn ding chhuak leh ta a. Patling tam tak chuan Suu Kyi hi Switzerland lam leh Bihar lam theihnghilhin kan it leh dawn tan ta mai. Khati khawpa ram awhawm loh, khati khawpa ram ralti leh ram nuam lo Burma (Myanmar) kha Suu Kyi a rawn din chhuah meuh chuan reilote chhungin ‘an’ kan thlahlel leh mai dawnin a lang ta. Dikna leh rinawmna hmanga ro a rel chhunzawm vaih chuan kan Burma awmpui te kha han zawng chhuakin mi tam tak chu kan pem chho duh mai ang tih a rinawm. Tun thlenga a lan dan chuan beiseina mipuiten beiseina lian tak an ramah khian an nei a. Rorelna dik nena an ram leilung hausa tak mai khi an enkawl vaih chuan ram awhawm tak ni mai dawnin a lang sa reng bawk.

Amah Suu Kyi hian ka nuih a tiza lo, hmanni lawka kan it loh kan han it thar zel mai leh it zel lo thei lo dinhmuna ding chunga kan khawsa te, chuti chung si a inhmu lian viau anga lang lo thei lo tura kan incheina leh kan nawmsak tumna dang te, kan Pathian hming kan lam ri tel chhen te hian ka nuih a tiza a ni. Kan Pathian hi zawng rinhlelh rual a awm lova, mahse a hming lamtu tam tak hi chu kan rinhlelhawm a ni. Dikna leh rinawmna chu luipui anga a luan dawn chuan Supreme Court tual te pawh a chim tel a ngai dawn ni te hian ka hria a. Dikna, rinawmna leh thawhrimna tel lova thu ropui leh thu tumtlang pui pui sawi a, Pathian hming lam rengtute hian Hindu te, Buddhist te leh sakhaw betu dang te rorelna hnuaia awm hi kan chak tlatin ka hria.