MIZORAM CHRISTIAN COLLEGE

Pawl sawmpahnih result a’n chhuak a, zirlai tam tak chu College kalna tur ngaihvenin an awm a, ṭhenkhat tan chuan manganthlak angreng tak a ni. College hmingṭha deuh leh hlun deuh, an duhna hmunah te kal turin mi ṭhenkhat chu an mark-in a pha chiah lova, an pawisa neih te pawhin tlin loh chin a nei thei bawk a. Hlawhtlinna chang a College kal thei tura inziak tling ve ta zinga tam tak chu an mangang ti ila kan sawi sual awm love. Vanneihthlak tak maiin Mizoram Christian College a lo awm a, hetah hian zirlai tam tak chu an kal thei ta a, Mizoram pawn a College kal remchang chiah lo tan belh tur a lo awm hi vanneihthlak tak a ni thei.

He kan College ding thar hi ka lo hmuh ve dan chuan ṭha dawn riau hian ka hria a. Kan College tam tak hi chu zir tura an tuk leh tihdan phung pangngai a syllabus chhung ami zir mai a ni a. Naupangte zir tura University lam te leh mithiam dang ten an bituk sa (syllabus) kha miin a zir thiam chuan ṭha takin a pass mai thei ṭhin a. An mark hmuh ṭhat leh ṭhat loh te kha tehna pui ber a ni lo thei lo.

Zirna hi a mak khawp a, ngaihtuah ngun hian a mak tawlh tawlh te pawhin a hriat theih. Mi tam tak chuan kan zir loh daih hi eizawn nan kan hmang tlat mai. Economics lam zir a thiam viau tam tak hian kha subject nena inlaichinna nei hauh lo hi an dam chhunga an eizawnna hna atan an thawk a. Pastor hna zir, sumdawng ta daih te, Political Science zir, Missionary a kal ta daih te an awm a. Kan zir loh lam eizawn nan a hmang ta hi kan tam viau.

Zirna hi chutiang chuan inralkah angreng tak tak hian kan buaipui a, chutih lai chuan hriat awm tak tak tam tak hi kan zir hauh lova. Lehkhathiam thei tih loh theih loh, pawl sang tak thleng a zir, zirlaibu chhunga thil inziak tam tak chu hre deuh mai, mahse nunphung erawh hre lo ve fe fe awm theih a ni. An mark hmuh ṭhat avanga hna dilna lama che ṭha thei tak tak, hna hmu zung zung mai ṭhenkhat hi chuan hlawhtlinna formula tak hre miah lovin hna sang tak tak an chelh a. Chu chauh ni lovin rilru pachhe ve tak tak pawh awm theih a ni. Chung mite chuan an nun khalh ngil turin zir awm tak tak tam tak an lo zir tlat lo mai a, hriat awm tak tam tak an hre lo fo. Mihring rilru, a ṭha zawnga kaihruai thei zirlai zir fumfe reng reng lova mark tam tak tak hmu awm theih tak a ni.

Kan Mizoram Christian College-ah hian mihring nun nena inhne hnai tak tak zirlai an zir dawn ni awmin a lang a. College ṭhenkhat, tunhma aṭanga lo ding tawh aia ṭha zawkin mi tam tak chu an chher chhuakin a rinawm. Mirethei te dinhmun te, Pathian malsawmna chungchang te, taimakna avanga hlawhtlinna awm theih dan te leh thil tam tak hi zir tur a awmin a lang a. Heng zirlai hi College tam takah chuan an zir lova, an lehkhabuah chutiang chu zir tur a awm hek lo. Rinawmna hlutzia te, huaisenna dik tak ropuizia te hre hauh lova sang tak thlenga lehkha zir hi thil awm thei a ni. College dang ai chuan hetiang kawngah hian he Mizoram Christian College hi a chhenfakawm dawnin a lang a. He College aṭanga zir chhuak tam tak hian a mark hmu sang zawngin ti ṭha lutuk lo mah se nunphung dik an puak chhuah hlauh chuan a lawmawm ngawt ang.

Mi tam tak hian lehkha kan zir a, B.A te kan pass tawh chuan kut hna hi thawk lo tawp turah kan inngai a. Ṭhenkhat phei chuan sorkar hna thawk ngei ngei turah kan inngai tawp mai. Hetiang ngaihdan hi khawi aṭangin nge kan neih a, thiamna tak tak ngaihtuah lem lova mark hmuh san ngawr ngawr tumna te hi engtia kan neih tak nge tih hi ngaihtuah tham fe a awm. Kan ṭawng tu huatthu chang suh se nunphung dik leh rilru dik inzirtirna tel lem lova degree sang angreng tak neih mai hi thil awm thei deuh a ni tih a lang chiang a. Kan rilru zawk hi dik se, thiamna leh hriatna nena kan thuam belh phawt chuan he hringnun kawng hi kan zawh tluang zawk ngeiin a rinawm. Kan Mizoram Christian College-ah hi chuan chutiang chu engemaw chen beisei theih a ni dawn a. A thlamuanthlakin a hlawk hlein a rinawm.

Kan Mizoram Christian College hi hetiang thila beisei theih ni ngei tur a ni. A chhan pawh kan chhuan leh kan duh em em, kan Mizoram leh kan Kristianna chawia kan Aizawl khawpui ngeia kan din, he College hi a lo ṭha lo palh a nih chuan a pawi viau ang tih a rinawm a, kan ṭhatpui hleih theih loh tura kan College chu a awm a nih palh hlauh chuan a tlawm thlakin a pawi hle dawn. Hemi hre chung hian kan kohhran hruaitu te pawhin fimkhur takin he College hi an en zui an tih a rinawm a. Chuvangin zirlaite tan pawh hlauthawng lem lova pan a remchang viau ang.