Eiruk Loh Thu

Eirukna chungchang sawi hi a ninawm a, ṭhenkhat tan phei chuan a ninawm lehzual viau - an eiruk ve ngai loh avang leh thil awm dan ngun taka an chik ngai loh avangin. Sorkar pawisa kalhmang leh hnathawhnaa pawisa senso kalhmang chhut ve ngai lo tan chuan eiruknain hna a tihbuaizia leh thil awm dan hi hriat loh theih tak a ni. Chuvangin eirukna buaipui ve ngai miah lo tan chuan mi dang ringhlel niawm taka eirukna tih fo mai hi ngaihtlak ninawm thei tak tur a ni.

Mahse, hnam changkang lo te ṭhanmawhbawk lian ber chu eirukna hi a ni ngar ngar ti ila, kan sawi sual kher awm lo ve. Hmasawnna hnathawh tur ruahman a nih reng rengin ruahman anga thawh a nih loh chhan ber chu eirukna vang a ni tlangpui. Ruahman anga thawh a nih loh chuan kan thil siam kha a zau zawngah te leh a thui zawngah te a tling lo va, chubakah a tlo zawngah a tlo lo ta bik ṭhin a. Chuvang chuan a lo chhe hma ta ṭhin a ni.

Eirukna hi chi hrang a tam theih dan turzia hi sawiin a siak lo. Entir nan kawng siam ṭhat tur ni se, a thui zawng aṭangin eirukna a awm thei nghal a. Km 17-a thui kha km 18 anga ziah a nih hlauh chuan, km khat siamna tur kha a hlep theih nghal titih mai a. A hna azirin chu chu cheng nuai 30, 40 te leh 50 thleng pawh a ni thei. Chu cheng nuai 30 chu khawilai kawng chhe thawm nan emaw hman ni ta se, khaw pakhat mai ni lo, a piah leha khaw awm leh chu kawng zawhtu zawng zawng chuan an hlawkpui thei.

Eirukna hi kawng siamah chauh a awm lo va, sorkar department zawng zawngah a awm thei vek a. A nihna takah chuan mi rinawm lo leh eiruk duh tak tak tan chuan awmna hmun apiangah eirukna tur a awm. Hna thawhna chu sawi loh, office-a ṭhu ringawt tan pawh eiruknaa inhnamhnawih dan a awm zel a ni teh chek ang chu, mi GP Fund pawh ei ṭhen dan a awm niawm tak a ni. Eirukna chi hrang hrang sawifiah tum hi a buaithlak tham hle. A chi hrang a tam lutuk a, eiruk theih lohna hi a awm meuh lo zawk a ni. Tunlaiah phei chuan sorkar hnathawk, mahni hna thawk hauh lova mahni aiawh tur ruat ta ngawtte kan buaipui ta luai luai mai a nih hi.

Vawiina kan Mizoram hmasawn lohna chhan ber chu kei chuan eiruknaah ka puh hmak a. Ṭhenkhat chuan he ka thlirna hi an pawm lo vang. 'Hmun dangah pawh eirukna hi a awm tho va, hma an sawn tho alawm' an ti ang. Mahse, keini chu kan tih theih a hniam a, kan pawisa a tlem a, kan thiamna a tlem bawk. Keini aia dinhmun chhia leh rethei tam tak he khawvelah hian an awm a, chu'ng hmunah chuan eiruknain keini ram aiin ro a rel nasa lehzual bawk.

Tuna kan Mizoram sorkar hruaitute hian an eiruk loh tur thu an sawi a. An sorkar tirh aṭangin he eiruknaa an inhnamhnawih ve loh tur thu an sawi a. Vawiin thlengin an thusawi hi ka la ring a. Tun hmaa kan hriat ṭhin sorkar hruaitute eiruknaa an inhnamhnawih ni ngeia ngaih theih kha, ka hriat hma loh chu rin phawt hi ka bat niin ka hria. Anmahni hi rinhlelhawma an awm a, rinawm lo taka an awm thu chiang deuh kan hriat hma hi chuan kan ring phawt tur niin ka hria. Tuna kan sorkar hruaitute chet dan leh an hawiher ka en hian ka la ring tlat a ni.

Eirukna hi tam tak chuan retheih vang niin an hria a. Mahse, ka ngaihdan chuan retheih vang a nih pawhin, rilru retheih vang a ni zawkin a lang. Rilru a retheih miau chuan kan neih ang tawk apiang hi kan duhkhawp lo va, a bak kan zawng zel ṭhin. Chu chauh ni lovin, hausakna kan tehna chu pawisa leh khawvel thil vek a nih tawh chuan, eiruk hi a awl thei viau awm e. Eiru anga kan ngaihte hi han en ila, an neih loh vanga eiru ta ai chuan an neihsa an duhtawk loh avanga eiru ta an tam zawk. Neih loh vang tak taka mahni ta lo tur pawh la ta mai te hi chu, eiru angah pawh kan ngaih loh chang a tam awm e. Ram hmasawnna tibuai khawpa eiru anga kan ngaihte hi chu, keini aia nei anga kan ngaih deuh vek an ni. Eirukna hi chu kan neihsa leh kan la neih loh thil vang ni lovin, kan rilru puthmang aṭanga lo awm a ni zawk.

Eirukna hi heti khawp hian kan chhiatpui a, chuti chung chuan kan ram hruaitu kaltate zingah eirukna tih tak meuha do kan la hmu tlem hle a. Kan sorkar hrawn liam tak chiah phei kha chu eirukna chungchang sawipui a huphurhawm angreng a. Minister leh MLA zingah mi fel leh rintlak tak tak awm mah se, eirukna do thu han sawi tehchiam an awm lo va, an awmhmunah an rintlakin an nghet ṭha hle ni maiin a lang a. Tuna kan sorkarna chelhtute erawh hi chu eirukna do thu sawipui ngam angin an lang a. Kei mi mawl hi chuan an insawi ang hi an hlen chhuah ka ring mai a. Kan duh ang leh kan beisei ang thlap emaw, chu aia ṭha deuh hleka an hlen chhuah emaw chu beisei thlap thlap chi erawh a ni lo mai thei. Mihring hi a duhsaktuin an sawi chanve ang vel, a ertuin an sawichhiat ang chanve vel kan ni fo. Engpawhnise, beisei chu a hma aiin a sang.

Eirukna chungchangah kan sorkar hnathawkte leh kan VC/Local Council, Block leh Party Worker tam takte khaw hmuh hi a buaithlak hle. A chung lamah thil ṭha duh mah se, a hnuai lamah hian eirukna ṭhanhnan tawh hi kan ṭhahnem viau mai a. Eirukna do tak tak tur chuan chet hrawmhraw deuh leh rorum deuhte pawh a ngai ngeiin a rinawm.

Engpawhnise, kan buaina bul leh a tawp hi chu eirukna hi niin a lang a, kan do ngei chu a ngai a ni.