MIZORAM SORKAR SUM DINHMUN NGAIHTUAHAWM

Vawi duai lo chu Mizoram sorkar sum dinhmun ṭhat loh thu leh a manganthlak thu hi kan ziak ta a. Mahse heti chung hian ziaawm lam a pan thei hauh lo.

Kan sorkar sum dinhmun ngaihtuah hi chuan kan ram hruaitu, thu haw lam leh kal lam hre pha tura ngaih chin te hi chu cher dawk dawk khawpa inngaihtuah awm tak an ni a. Mahse chutih lam thu ai chuan an in sak thu leh a sang zawnga anmahni mimal ṭhan chhoh thu hi ngaihthlak peih chin chin ngaihthlak tur a awm zawk tlat a. ‘Chumi chuan in chhawng sarih a rel mek,’ ‘Chumi chuan chutah chuan in a nei a, chutah pawh chuan a nei leh tawh,’ tih te; chumi chuan hmana an sawi, amahin a ta ni lo anga a sawi kha a chhunzawm zel tih te leh an chenna in an sak mek thu te kan hre chamchi a. Chu chauh ni lovin an Official car lei thar thu te, car an insem thu te kan hre leh bawk a. Chanchinbu lamah heti khawp hian kan ziak a, mahse zak awm hmel an pu lova, inthlahrung awm hmel an pu hek lo. Khawvelin politician a hmuh fo ṭhin dang te ang bawkin kan Kristian ram politician te pawh zahtheih lohna hmaikawr vuah ang tlat an ni mai.

Hetih lai hian kan sorkar sum dinhmun hi ngaihtuahawm tak a ni a. Kum hnih hmalama pawisa draw tawh, hman theih si lova Mizoram sorkarin a hren beh ringawt pawh hi chil puta thlir tham a ni a. A tam tham a, a rei uchuak ta lutuk bawk a. Nuai hlira chhiara singbi tehmeuh a ni a. Mahse kan sorkarin chumi tihziaawm nana a rawtna ṭhenkhat chu tuisik bur tê leh lian chungchang (a matter of Rs. 20/- or so) a ni. Nakinah chuan ‘Envelope thar hman loh tur,’ te hi a la ti dah ang a ti nia. Mahse Envelope chu han bih chiang ila pakhat Rs. 3/- man te, Rs. 2/- man te a ni ang a. Sorkar Department zawng zawng hian Envelope hi hmang ta lo vek pawh ni ila kum khat chhungin a kawl lo turin motor pakhat an kawlna senso man pawh kan hum chuang lovang.

Kan sorkar pawisa hi thla tinin a nuai za biin kan indaih lova, chutih laiin a thawidamna atana kan rawtna ṭhenkhat chu cheng 20/- man vel thuartham a ni.

Kan insensona lian tham deuh zingah chuan sorkar hnathawk hlawh te a tel a. Chuvang chu ni maw sorkar hian hna ruak hnawhkhah te, hna thar siam te a khap bur a. Sorkar laipuiin hlawh a tumsak tur hna thar reh te kan hlau em em a, sorkar laipuiin zaa 90 zel pawisa tuma a hna min sihhmuh leh kan rawih mek te hmun ruak hnawhkhah te chu khawimaw laiah chuan a khirh em em a. Hnathawk hlei thei lo khawpa kan insum laiin State sorkarin a pumpuhluma an hlawh a tumsak thenkhat te chu kan hnawhkhat leh thuai thuai lawi a.

Hemi chauh ni lo hian kan insenna tam tak chu Secretariat service a hna thenkhat kan hnawhkhat lutuk hi a ni ngei ang. Secretariat-ah hian LDC aṭanga Secretary thlengin hna chhawng kua vel a awm a. Chung zawng zawng chu dan anga lehkhain a paltlang vek dawn chuan chawlhkar hnih hi lehkha thang chhung atan a rei lo hle a. Chutihlaiin ṭhenkhat hi chu an chhawrnahawm lo em em a. Under Secretary fel deuh awmnaah chuan Joint Secretary te, Deputy Secretary te, Addl. Secretary te hi an awm a tul lo viau. Chutiang bawkin Joint Secretary tih tlak deuh awmnaah chuan Addl. Secretary awm te hi a ṭulna hriatthiam a har hle. Secretary awm lohva engmah ti thiam chuang lo leh ti thei chuang lo Addl. Secretary te kan nei fur mai hi chu tuisik botol ai chuan a heksak zawk ngawt mai. Joint Secretary tam tak hi chu awm hauh lo mahse sorkar hian engtinmah a tuar lovang tih hi sawi siah siah ngam a ni.

Buaithlak tak maiin heng post hrang hrang, ‘Ministerial post’ kan tih mai te hi hnawhkhah hmasakah kan hmang a. Department tam taka Field Officer indaih loh ngawih ngawih lai leh dah khah a buaithlak em em laiin heng Office hmun thu te post hi kan hnawhkhat zung zung a. Pawisa lah kan indaih lo em em bawk si a. Sorkar huaisen, a ngaihna hria kan mamawh ngawt a ni. Heti hrim hrim hi chuan kan sorkar sum hian awmzia a nei lo telh telh ang a, ṭhenawm State ṭhenkhat, awm nei lova kal, a buaichuar lutuk tawh avanga a nawr huaisar apiangin thil an tih theih ringawtna ang mai kan ni ang.

Hetiang siamrem tur hian sorkar hian Policy fel tak a neih a ngaiin a lang a. Minister tinin mahni hma zawn ṭheuhvah Chief Minister biak thiam dan azirin an nawr nget nget a, thildang ngaihtuah lem lova hetiang ngaihtuah peih Minister te leh Secretariat Staff huangtau deuh te’n an nawr kaw deuhva. Sorkar kalphung leh inthlahrun nachang hre deuh te’n an nawr chak lo deuh mai niin a lang. Pawisa hi chu nei hlauh ila chu post awmsa zawng zawng hi hnawhkhah vat vat hi kan tihtur a ni a. Mahse a pumpui thuin pawisa kan nei ta tlat lova, Treasury khar mualpho lohna turin a buluk thei ang berin pawisa fai kan hrengbet ringawt tawh a, kalphung engemaw chu kan chher a ngai a ni. Entir nan, ‘Under Secretary leh Secretary inkarah post pakhat bak fill-up loh tur,’ tih angrenga kan kal loh chuan kan mi rawih te hi kan chawm seng ta lo takmeuh a ni.

Heti lova kan sum buai hi kumkhua atana kan chinfelna tur chu hlawhfa rate tihsan a, thlai thar man tihsan a, thildang zawng zawng man tihsan a, chuta ṭanga chhiah tam zawk lak chhuah chu a ni leh mai. Chhiah kan lak tam a ngai a, mahse tun dinhmunah chhiah kan lak tam ringawt chuan sorkar hnathawh chu vanram a ni ringawt ang a, kuthnathawktu leh thildang thawktuten an tuar ang. Kan inkhai rual theihna awm chhun chu sorkarin pawisa a hmuh let tam a, sum a neih a ni.

Hei hi kan ti thei lo a nih chuan sorkar hnathawk hlawh hi kan tihniam leh tur a ni. Chuti a nih loh chuan he Mizoram State hian buaina nasa zawk a hmachhawn ang a, englai pawhin kan harsatna hi a cham reng ang a, a tawpah chuan sorkar hna hi kan inchuh vek ang a, kuthnathawh hi a hahthlak thlawn kumkhua ang. Sorkar hnathawk hlawh punna rate hian kut hnathawh a hlawk ve tur a ni a. Hnadang pawh a hlawk tur a ni. Sorkar hnathawk nikhat hlawh aṭangin kan hlawhfa hlawh kan bituk a ngai a ni.