TUARNA THENKHAT HI CHU MAWL VANG

Duh loh huna ka lirthei neih ve chhun (Motor leh Bike) te’n min nawrhsan emaw, huaikawm min bawlsan emaw ka hlauh avangin a theih hram chuan a tui (petrol & diesel) thun turin Sairang kawng ka pan vang vang ṭhin a. Ka mamawh bechhiat huna ka hman tur pawh ka kawl lawk dim diam ṭhin. Petrol pump thenkhatah chuan a theih hram chuan thun loh hram hram ka tum. Ka neih chhuna ka lei, ka lirthei neih ve chhun te hi a nih tur ang hun hma daiha a chhiat ka hlauh avangin chutiang chuan ka ti a. Kum thum vel dawn lai chu ka lo ti ve ta reng mai.

Kan awmdan hi ka ngaihtuah a, kei chu ka thatchhiat avangin mi tawrh ang hi ka tuar peih lo ta mai thin a. Ṭhenkhat hi chu an taima a, thil hi an ti mai zel a, a lo hahthlak ta deuh emaw, a lo buaithlak ta deuh emaw a nih pawhin an tuar chhunzawm mai a, an lungawi mai. Kei chuan tawrh loh theih reng han tawrh hi chuan a chhan hi ka dap ta thin pek ni te hian ka hria.

Kan petrol hi an pawlh dal thin tih kan hriatna hi chu a rei tawh a. Kan vei meuh lo ni te pawhin a hriat a. Kum engemawti kal ta vel khan kan sorkar kha a’n khauh deuh a, petrol te kha an endik lai te, an endikna ‘result’ te kha kan hmu zauh zauh a. Mahse tunhnu hian engmah hi an ti leh ta mang lova. An petrol endik te kha a thawnthu te ka lo hria a. Eng anga pawlh dal pawh phur tehreng mahse an endik hunah khan an phurh nawlpui ni lo, endik tur bik kha an siam thiam an ti lehzel a. A hawlhna fung khan luhna tur bik a nei a ni ang chu maw ka ti mai.

Hetiang thilah hian mihring kan inang lo lehpek a. Mi ṭhenkhat hi chuan an mimal hamṭhatna a tel dawn loh chuan vantlang tan eng thil pawh an huamsak a, an phalsak mai niin ka hre ṭhin. Sorkar Officer tam tak, an hnuaia thil dik lo awm, an mawhphurhna ni ngei si, mahse siam-
ṭhat tum lem lova, ‘A buaithlak ve em a,’ ti a lungawi ta mai, mi rethei zawk te leh mipui nawlpuiin an tawrhna tur hahdam taka en liam thei an awm ṭhin a. Kan Minister zingah pawh chutiang chu an awm ṭhin niin ka hria a. Chuti ni lo se thil hi kan ti tak tak ṭhin tur niin ka hria.

Supply Minister hi ni ve ta ila Gas bur tihchingpen te, petrol pawlh dal te, buhfai hralh then te leh Supply Godown a bukna dik hlei thei lo te hi ralpui phiarin ka phiarin ka ring. Hei aia thawh tur tangkai zawk engnge awm? Heng thil lianpui pui, mipui nghawng nghal rap thil te aia buaipui tur hmanhmawhthlak leh pawimawh chu Supply Minister tan hian a tlem hlein ka ring. Mahse YMA te an tlaivar a la ngai a, mipui kan phun sup sup pawhin ngaihven a la hlawh lova. Buaina emaw, lehkha hlai pui pui nena kawng zawh kher emaw kan nghak fan fan ni te pawhin a lang. Buhfai hralh rutuin buhfai a hralh ruk hian Mizoram sorkar a hek a, chu chu mipuiin kan tuar tih chu Minister chin chuan hriat awm tak a ni a. Mahse kan ngaihtuah tak tak lo a ni ang, kan buhfai phurh hi a ngaihtuahawm lulai lutuk.

Kan petrol pawlh dal thawnthu hi ka’n ngaihtuah a, kan tawpna chu vai phakar hmelchhe tak tuemaw emaw, kan Tank Lorry Driver zir sang lo tak ngawhngawl zet mai emaw, kawng kam khawilai emawa nuthlawi zakthei lo zet, petrol black a zuartu emaw an ni. Heng mite zahtheihlohna leh luhlulna te, duhamna te avanga mipui aiawha ding, mipui thlavang hauhtu thutthlenga thu te an han tlawm mai hi chu kei chuan hriatthiam har ka ti a. Heng mite finna lehkhalh zo lo anga, ‘A buaithlak ve lutuk,’ ti ngawt maia Departmental Officer tam tak an han awm ringawt hi chu ngaihsan harsa ka ti. Leia cheng kan ni a, engmah hi a fiahfai thak chuan kan ti thei kher lovang. Mahse nunphunga neih ringawt khawpa heng thil kan tuar hi chu finnaah kei chuan ka ngai ve lova, fin lohna lamah ka ngai. Min bum theitu an ropui loh viau chuan an bum emaw, suahsual rawng an bawlkhum ngat ngat theih te emaw chu han inngai ropui vak tur kan awm lovin ka hria. Supply changtu Minister te, Legal Metrology changtu Minister te, heng Department pahnih a Officer lal pui pui te leh Inspector te hian zahawmna neia tuallen ve an duh chuan tuna kan dinhmuna ding chung hi chuan heng te hi thinlung taka ngaihsan leh zah an harsa ka ti.

Mawhphurhna hlen lo reng renga damchhung ni hman a, hlen pawh tum peih tawh lo khawpa chawlawl rawih tawh hnua zahawm la tum si hi ka nunphung hriatthiam loh chi a ni a. Inthlahrung hlek lova sorkarin an mawhphurhna an hlen theihna tura hlawh leh hlâm a pek te hui kim vek tho si phei chuan mipui lakah te pawh awm mai mai paha la inthlahrun ve awm ka ti. Mahse chutiang ngaihdan neitu zawk chu ka sual ta beuh emaw tih tur khawpin kan rilru hi a chawlawl tawh a, ngaihdamna thinlung nei khawp ngaihtuahna pawh kan nei si lo.

Kan tawrhna tam tak hi chu mawl vang mai mai a ni.