DAWT HAL CHUNGCHANG

Vanapa Hall kawtah MNF Party mi leh sa te pungkhawmin rorel lai Party, ZPM lamin tun hma aṭanga dawt an lo sawi tawh nia an hriat hrang hrang, point za lai mai ziak chhuakin mipui vantlang hmuhah an hal a. ‘Keini chuan hetiang dawt hi kan duh ve lo va, kan hal a nih hi,’ an tihna ni awm tak a ni. An beisei ang takin he an thiltih hian titi a luah angreng viau mai a. Miin an ngaihven thu-hlaah chuan an thiltih hi an hlawhtling hle te pawhin a hriat theih a ni.

Mipui lenglak, MNF Party lamṭang ni lem lo te rilru leh ngaihdan han thlek chian deuh hian, mi rilruah âwm tihna leh hmangchang hria anga ngaihna erawh a awm lem lo tlat niin a lang a. A mak vak lo. Whatsapp leh Facebook lama kan han hmuh ve phakah chuan, a hal lo tur awm takin an hal ni te pawhin miin an ngai niin a lang tlat a ni. Chutiang ngaihdan chu ṭan lam neih vang emaw, MNF Party duhsak loh hrim hrim vang emaw ni lovin, thil awm dan leh thil kal tawhin a hrin chhuah a ni kan ti thei ang.

Kha dawt hal programme kha Mizoram hmangaih vang leh rorelna ṭha zawk awm se tih tak tak avanga ngaihtuah chhuah ni ta se, thla ruk vel chauh la sorkar hman laka hetia phut neih nasat viau mai te hi a patling hna em? tih te thlengin a ngaihtuah theih. Dawt anga an ziah chhuah a, an tarlan tak tam tak kha chu thil la tih hman loh emaw, ‘An ti dawn lo chiang ta ngei e,’ tih hleih theih loh te pawh a la ni rih ang. Sorkar dek dek a, engkim chingfel nghal zung zung tura mi dang phut tak tlat mai kha a mak angreng viau zawkin a lang. Chutih lai chuan an point rawn tarlan tam tak kha chu ngaihtuah theih tak te pawh niin a lang ve tho va, chuti chung pawhin a engti zawng pawhin an che hma deuh mah mah em maw ni tih loh theih a ni lo. Thil tam tak hi han ngaihtuah a, thiltih theih ngei tura lang, tih dawn tak taka lo harsa em em si hi he khawvelah hian rin aiin a tam a. Sorkar hmalakna chungchangah phei chuan a ni lehzualin a lang. Kei phei chuan sorkarin ti thei se ti a duh em em ka nei nual a. Chu'ngte chu ngun taka ka ngaihtuah a; thiltih harsa lem lo te pawh a ni nual. Mahse chu'ng chu sorkar chuan a ti mai lem lo va, ka ngaih pawimawh ang huin kan sorkarna fawng vuantu Minister ṭhenkhat pawhin an lo ngai pawimawh mang hauh lo va. Khawilai hmun emawa khualliana ṭan te pawh an ngai pawimawh zawk daihin ka hre nual. Mahse ka ngaih pawimawh apiang kha an lo ngai pawimawh ve zel tur tihna pawh a lo ni leh chuang si lo.

Kan thiltih tam tak hi chu kan tih thiam leh thiam loh lam ngawt a pawimawh lo va, kan tih theih leh theih loh pawh a pawimawh ber lo, mi dangin a titu tur angin min ngai em tih te hi ngaihtuah a ngai ve viau mai. Mipui hmaah thu ṭha tak pawh kan sawi thei maithei, mahse a sawitu tur anga miin min ngaih miau loh chuan kan tan sawi loh a ṭhat zawk hun te pawh a awm thei. Hmannia dawt hal pawh kha a haltu tur dik kan ni em? tih ngaihtuah ngai angreng tak niin ka hria.

Thil hi tih awm leh awm loh a awm ve thei viau mai a. Dâwt hi chheh khawm a, hal chi a ni meuh em tih ngaihtuah a ngai viau. A nihna ang diak diaka dawt hal chungchang ngaihtuah takah chuan, dawt hi kan hal dawn a nih rau rau chuan, keimahni sawi hi a sawituin hal ta ila, a Pathian thu zawk ngeiin a rinawm. Kan dawt sawi kha phum bovin awm se, kan dawt sawi kha mi dangin rawn hre zui tawh miah lo se kan tih avangin, keimahni ngeiin kan dawt sawi kha hal ila a ziaawm ber maithei. Mi dang dawt sawi kan hal dawn a nih chuan, kha mite dawt sawi kha mi dangin hriat rengsak lo ila, he khawvel ata hi kha thu kha paih bovin awm se, kan tihna te pawh a ni thei ang. Chuvangin mi dang dawt sawi hal hrim hrim mai kha eng emaw ti takin a remchang lo deuh tlatin ka hria. Hemi ang deuh hlek hian tlangval ṭhenkhat lah chuan, ‘Anni chuan dawt sawi hi an inti neitu lutuk a, mi dang dawt sawi ve chu an remti lo va, an hal ta a ni,’ te an han ti kual vel a, nuih nuih te pawh a za thei. A haltuin mipui rilrua thawk tura an duhdan nen chuan a inpersan hla thei viau awm e. A pawl pumpui ang pawh ni lo, a halnaa a phusa pawl leh a mei dep kaitu tur thlengin ngun deuh hleka ngaihtuah ngai ve thei tur chi tak a ni.

Hetianga thil hal hluah mai hi kan Mizo hnam zia a ni em tih te pawh ngaihtuah a ngai a. Lim kan han hal ṭhinte pawh hi Mizo pa tam tak thinlungah chuan a thawh dan a dang deuh tlat thei. Vai hian lim hal hi an uar phianin a lang a, saphovin lim an hal hi kan hriat tlem vang ni maw, kan hmu khât deuhvin a lang. Kan lungawi loh thu leh kan remtih loh thu tlangaupui nana a hal zawnga khawsak hi, tih zel atan a ṭha ber lo mai thei. Japan ramah chuan an lungawi lohna lantir nan hmun an phiat fai chiam mai e, tih sawi thawm ka hre tawh a. Keini nen chuan kan danglam angreng ngawtin a lang. Keini chuan lungawi loh lantir nan a tam thei ang ber thil tihchhiat kan tum chang a awm ṭhinin a lang a, Japanese-ho erawh chuan lungawi loh lantirna ni tho siin thil ṭha an ti a, anmahni mimal hna erawh an kalsan ve tho a ni.

Kha dawt hal avang khan a haltu Party kha mipuiin an ngaihzawn phah sawt ang em? tih ngaihtuah a ngai ve thei e.