FAINA

Prime Minister ropui, Narendra Modi-an Faina Beihpui a’n puang a, kan Mizoramah pawh kan Chief Minister-in thlalak chhung atan hmun a phiat lai te kan han hmu a. Mi rilru pawh a hneh nual awm e.

Pu Modi-an Faina beihpui thlak a puan hma zawng khan faina kha kan hotute hian a sawiin an sawi dup dup a, sorkar ruahmanna te pawh eng eng emaw kan hmu a. Ministry hmasaah khan Clean Mizoram tih kha kalpuiin engemawchen chu hma lak a ni a. Bawlhhlawh bawm te, Committee te, Garbage Trailer te leh eng eng emaw kan ti a. Tun Ministry-ah pawh kan hotute chu an fai hmel viau - an chuanna motor thlengin an duhtui bawk a.

Faina hi thil pawimawh tak mai a ni tih chu kan hre tlang a. Mahse pawnlam faina satliah hi chu chhunglam faina tel lo chuan a daih rei lo tih chu Office leh hmun hrang hrang, tha ve angreng takin kan han sa a, bang kila chil chhak ta mai te, chinai tat ta mai te leh meizial bung paih ta mai te kan awm nuai a. Chu aia la buaithlak zawk, vantlang zun-In ngeia e duh mai kan la nei nual a. Pawnlamah chuan faina chu kan kalpui a, mahse chhunglamah kan rilruin faina tak tak a tlin loh avangin a fai sa chu kan tibal leh ta vek tih a chiang ngang mai. Mi mawl, mi rilru fai lo, mi tawp chuan kan fai lohna rilru chu kan han lantir meuh chuan pawnlam faina chuan a do hneh lo kan ti thei bawk ang chu.

Prime Minister Modi-a lo lan hma daih khan faina chu kan lo duh ve tawh tih chu kan ṭawngkam leh kan awmdan tam takah a lang a. Kan hotute pawh anmahni an intifai tih pawh kan hmu ang. Mahse Modi-a lo lan veleh hmunphiah te chu kan han hum thar ve leh a, faina thu chu a tharin kan han sawi ta a nia. Kei phei chuan a tlawmthlak zawngin ka ngai lek lek mai. Engah nge keimahni thua fai ve mai kan tum loh? Engah nge Modi-a tel hma hian kan hotute hian hmunphiah te an lo lek a, engahnge a taka an duhna te hi mipui hmin thei tura an lantir loh? Chawlhkar tin Inrinni apiang hian engahnge kan hotute hi zing dar 7 - 8 inkarah kan chawhmeh bazar bawlhhlawh paihna te hi an lo en ṭhin loh chu aw? Zingkarah interview mi 200 te an hmachhawn em ni? Anih loh leh zingkarah interview an phal lo a nih loh chuan engahnge thla tin Zirtawpni tuk te hian bawlhhlawh thlithlai tur leh a ṭul ang han ti mai tura hnathawh kawr nena an infam chhuah loh? Chutiang chuan kum chanve han ti hlauh sela chu he Zoram hi India rama fai ber kan nihna a va rei tawh dawn tehlul em.

Prime Minister Modi-a te chuan Obama te a kawm a, China palai te a kawm a, petrol man te a tihniam a, nikhatah darkar 18 chhung te hna thawkin namen lovin a thawkrim tih kan hria a. Keini kan hotute chu vengchhung football tournament hawng tur te, Unit inhmuhkhawmna hmanpui tur te leh tui­lakna cheng 50,000 man khawl hawng tur te pawhin an koh kal theih zel a. Chuti a nih chuan heng kan thil sawi hi an duh chuan an ti hman. An rilruah faina tura hmahruaina tak tak awm se chu hmanah kan lo fai thei daih tawh tih a hriat tih thu ka sawi duh mai a ni.

Tunah pawh thingtlang khaw ṭhenkhat chu an fai em em a. Anmahni ngawt pawhin faina hi an lo inzirtir a, keini Aizawl khawpui hi a bal leh tawp ber kan ni zawk mah awm e. Kan Aizawl khawpuiah hian mi zaktheilo leh changkang lo tak tak, hriatna tlemte leh changkan lohnain a bawm ngheh khah tlat kan nei nual a. Chung mite chu thuneihna hmang te, vauna hmang tea kan enkawl a ngai a. Chutihlaiin kaihhruaina kan mamawh bawk a. Kan ram hruaitute hian car manto uchuak taka chuang chunga min tlanpelh rikngawt hian kan fai zo lo a ni. Minister te an han nih takah chuan tunhma lawka an kalna ṭhin, Bazarah te khan an kal ta lo mai a, hmun tawphnawk an hmuh fo ṭhin kha an en khûm ta tlat a. An tlin hma lawka an hnatlanpui te kha khuallian parṭhi nen lo chuan an chibai remchang ta lo tlat a. Kan chenna khawvel ni lo, Bangla leh ‘Sir’ khawvelah chengin min hruaitu tur te khan mipui hi min dah hrang ta tlat a. Chhetein han thawkho zeuh ila chu kan fel mai tur.

Mizote hi hruai awl tak, nawr kal erawh har tak niin an sawi ṭhin a. Kan tlem avang hian hruai kan la awl em em a. He kan awlsamna tak hi kan hman thiam chuan kan Mizoram hi dinhmun changkang takah kan hlang thei tih a hriat a. Chutihlaiin ṭhuthmun aṭanga thupek hmanga enkawl mai erawh kan har viau a ni tih chu a lang reng mai bawk. He Ministry hian bawlhhlawh paihdan chi thar a ching chhuak a, tunah chuan fel takin bawlhhlawh kan paih ta mai. Veng tinah phunnawi lo leh fel angreng takin bawlhhlawh kan paih ta a, hei aia fel leh hret zawka ruahmanna hi han siam belh leh hlek pawh ni ila kan zawm leh mai ang. Mizote kan felzia leh hruai theih kan nihzia chu kawng hrang hrangah a lang a. Kristianna kan vawndanah te, vantlang kan zahdanah te, kan nungchang tam takah hian hruai theih kan nihna a lang a. Chung te chu hmang ṭangkai ila tiin duhthawh takin ka’n sawi mai a nia.