AIZAWL MUNICIPAL COUNCIL

Aizawl Municipal Council a lo ding a, nghakhlel angreng takin kan lo thlir a. Sorkar pangngaiin a dawt leha tlin lehna ngawt ngaihtuahin ro an rel thin avangin kan Aizawl khawpui hian hmangaih leh duat taka enkawltu, a nihna dik hre chunga enkawltu a neih kan lo beisei a. Veng bial hlawm khat deuhvin aiawhtu kan nei ang a, chung kan aiawhtute chuan an bial hrechiang takin pawisa te an chhuah ang kan lo ti a. Awmze nei leh khaw eng zah tak chungin thil an kalpui dawn emaw kan ti a. Beiseina nen AMC kan lo thlir a.

Mahse thil hi beisei ang a ni ta lo hle mai a. Kan veng Development hna te chu tunhma ang deuh tho khan Party mi leh sa leh mimal induhsakna angin a la kal ta reng a. Hmanni lawka MNF lamin thuneihna an han chan zawk chhunga thil thleng te kha chu a duhawm lo ve ngawt mai. Inthlahrunnna leh khaw eng zahna tel lovin thil an ti bawrh bawrh mai niin a lang a. AMC lama kan mihring hriat ve ṭhenkhat te pawh kan ngaihdan a danglam ta daih mai a, a pawi khawp mai - an tan. Khatiang mai maia thil ti tur khan politics te an khel chhunzawm dawn a nih chuan mi hlauhawm leh hrawn huphurhawm tak an ni. Khaw eng leh mipui mimir zahderna nei tak tak lo mihring chetdan hi chu a ṭihbaiawm tlat ṭhin.

A thuhrimin AMC hian hna an pe a nih chuan a vildan kawng ngaihtuah tel se a ṭha mang e. Hna sem thei nih ngawt hi ṭhutthlenga ṭhut tawh chuan a har lova, heng hi chu mi mawl pawl tak pawh hian an ti ve thei mai. ‘Helaiah hian hna hetiang deuh hi thawh tur a awm a, cheng chuti zah vel chu a ni ang,’ tih a, ‘Hei hian lo thawk rawh se,’ tih ringawt hi tu tan nge har ang? A thawktu tur thlan dan thuah thil tha a hring chhuak ang em? Rinawmna leh dikna nena thawktu tur engtinnge kan thlan chhuah ang? Kalphung fel zawk leh rintlak zawk kan chher chhuak ang em tih ngaihtuah hlei lova ka thei na tih vanga theibawng sem mai mai chu a tha hauh lovang. A endiktu pawh awm mumal lo, a hna chu a Specification angin thawh a ni em? A nih loh chuan a bill chu engtia tih tur nge tih te pawh awm fumfe lova hna sem ve vak vak ringawt mai hi thil mawl tak niin a lang.

Kan AMC te an inthlak a, an inthlak let leh a. Mipui chu kan lo tim sung sung a ni ber mai a. An inthlak nachhan ber kha thuneihna leh pawisa sum duh vang mai mai niin a lang ta tlat a. An inthlak let leh nachhan pawh pawisa sum vang leh thuneihna hman dik loh vang niin a lang leh bawk a. A zahawm lo ve ngawt mai. Pawisa duh langsar viau nih te hi nunphung tha lo leh zahthlak tak a ni a, eng hnam zingah mah hetiang mite hian mi zah an phur tak tak ngai lo. Hmai chhanah miin an hrilh fawk fawk duh lovin an ti chhuak duh lem lo a ni thei a, mahse thil zahawm lo tak a ni.

Aizawl khawpui hi kan Mizoram darthlalang a ni a, Aizawl khawpui chhunga AMC hna an han hralh leh an han lei kual vel thin te hi chu chinchang hre pha inti ve tan chuan a ngeiawm ngawt mai. Contract hna hi hralh mai mai tur a ni lova, thil thiang pawh a ni hek lo. Mahse thawk ṭha leh tak tak chuang mang si lova ‘Ka leina a to em alawm,’ ti mai mai turin an han thawk chhawng hmel te han hmuh hi chuan a hrehawm tih mai loh chu sawi tur a vang khawp mai. Chutah heng hna hi contract pangngai, agreement leh drawing pawh awm fumfe lo a la ni leh ta nghal a. A leia lei chhawn tawh chuan a buai zual zel mai zawng a ni.

Hmun ṭhenkhatah phei chuan a hna lo ruahmantu Ward Councillor te kha nihna chang thar te khan an han rawn der duh hauh lova. Chu chauh ni lovin an hriat hlauvin thil an ti emaw tih hial tur a ni zawk a. A ruahmantu tel lovin, a tihdan tur inhrilh chian awm mang si lovin hna thenkhat chu a lei chhawngtuten an han thawk ringawt mai a, an duh chin chinah an tawpsan ta mai bawk a. Ṭhahnemngaihna mita lo thlirtu tan leh duhthusam nena lo thlirtu tan chuan kan AMC awmdan chu beisei ang a ni lo ngawt mai. Ngaihtuah ber atana politics hmang lo, khawtlang leh ram hmasawnna bakah Aizawl khawpui tihhmasawnna ngaihtuahtu tur kan thlang chhuak emaw kan ti a, mahse therhlo duh dang leh politics thuneihna hmang duh mai mai kan lo thlang chhuak ni te pawhin a hriat a, a pawi hle mai.

AMC member zingah mi fel leh pangngai tak tak an awm ang a, chung mite chu kan thusawi hian huap tel ve lo se a lawmawm hle. Kan sawi leh kan ngaimawh chu sum duh viau mai leh thuneihna leh challan duh vanga hna tha thawh pawh ngaihsak thei lo khawpa pamham te a ni. Tute emaw tihlawm tum vanga a chhiat a that tur ngaihtuah lova hna pe chhuak ringawt mai, enzui leh chuang miah si lo member te kha chu Aizawl khawpui tan chuan in hnawksak tham tlat a ni. Tu mimal emaw tihlawm in tum avang te, eng Unit emaw in duhsak avang te khan kan vengin kumkhuain a tuar thei tih chu in hre ve ngei ang. Chumi pawh hre pha lo in nih a, engmah sawi lova ngawi tlat tura min beisei bawk a nih chuan in ngaihtuah tawi hle tihna a ni. Kan tawrh miau chuan kan sawi ang a, in hming pawh kan lam ri fak fak ang a. Vawiina zawite tea kan lam rik hi tuifawn angin a bial zau zel ang a, engtik niah emaw chuan in duh aia thui a la thleng ang.

AMC hi ngun takin inen ula, thildang tih loh, Aizawl khawpui chei nan leh siamṭhat nana pawisa awm chhun ang ang hi ṭha takin hmang hram teh u.