PENSION THLA

Nimin lawka ral ta February thla kha sorkar hnathawk pension tam ber thla a ni ngeiin a rinawm. Mizorama sorkar hnathawk tam tak chu tunhma khan sikul lamah zirtirtuten March ni 1 a piang angin an kum an dahsak a. Kum 20/30 kaltaa chutianga hotuten an lo tih chu vawiinah chuan pension hun a inrual ta ṭhup ṭhup mai ni berin a lang.

Mi tam tak chuan kum dik lo hmanga sorkar hna thawk leh hnathawhna hmuna kum hlep ru angin an ngai a. Eirukna nen an sawi zawm viau a. A dik theihna lai awm bawk mahse tam tak hi chu an sual vang emaw, kum an hlep ruk duh vang emaw a ni hauh lo. Ṭhenkhat phei chuan a hunlaiin chutiang rilru chu an pu pha lova, vawiina kan ngaihtuahna angin thil dik lo a nihna lam an lo ngaihtuah reng reng lova. Sikul lama an zirtirtute tih ang ang kha an pawm ve mai a. Zirtirtu lahin a hlawmin Exam form an fill-up sak mai bawk a ni. Chuvangin kan rual u te kha dem teh vak tur an ni lo. Ṭhenkhat phei chu zirtirtute khan, ‘IAS te in la Exam duh tak mialin in exam thei lo palh ang,’ tiin duhsak takin an dahsak mai a. Ṭhenkhat lahin, ‘Sorkar hna in thawh rei duh takin,’ an ti mai bawk a. Zirlaite lahin khatih hunlai khan engmah ngaihtuah thiam lovin, ‘Ni e,’ an ti mai a. An rilruah chuan Matric pass leh Fail ringawt emaw te kha a awm a. Exam Form-ah engtinnge kum an dah tih kha an ngaihtuahnaah a lut teh vak lo.

Engemaw hunlai khan sorkarin he kum dik lo siam dikna hun te pawh hi a hawng a, mahse chu pawh mi tam tak chuan an lo hre leh pek lova. An ngaihven lem lo bawk a, ‘Chutiang pawh ka hre ve lo,’ ti tam tak an awm a, an hre chiah lo pawh a ni ang.

Mihring kan inang lo ang bawkin tam tak tan chuan sorkar hna thawh rei hi a buaithlak khawp mai. Tam tak hi chu pension se an tan leh sorkar tan a ṭha hlein a rinawm. Ṭhenkhat chu thawk hlei thei tawh lo khawpa upa an nih thlengin tlin lo chung chungin an thawk hram hram a. An hna an tlin lova, an tih tlak tak tak tawh lova, mahse an chawlhsan ngam lova. Sorkar tan leh thawhpuite tan pawh a hahthlak lu lam hret zawng a ni. Ṭhenkhat chuan sorkar zara han invaivung leh thuneihna mahni phak tawka han kawl te hi an thlahlel em em a. Thawh aiin a nihna hi an tuipui a. Heng mite tan hi chuan Office hi a nuam em em a. An incheina a ni a, an pawisa thawh chhuahna a ni bawk a, nuam an ti vawng vawng mai. Chuvangin an pension hnuah pawh rawih leh an thlahlel ngawih ngawih a. Ṭhenkhat phei chu rawih nawn, thawk tak tak hlei thei tawh si lo, mahse bansan ngam chuang lo an awm leh a. Heng mite hi chuan sorkar pisa ṭhutthlenga thut hi an kham mawlh lo a ni. Thiam dang leh thawh peih dang an nei lova, chuvangin an tan sorkar hna hmanga inlak vung kha tihtur awmchhun a ni.

Ṭhenkhat chuan pension an chak zek zek a. Pension nghak thleng zo lova mahni tuina lama kal emaw, chawlh hahdam emaw an thlang a. An kum an lo indah naupang te chu pawi an ti ngawih ngawih a. Mahse chung zinga mi tam tak chu chhuak ngam si lovin an tangkhang reng thei tho.

Mak ve tak chu tih tum nei miah lo, hnaa tui tak tak bawk si lo, ṭhahnemngaihna tel lova tei mai mai duh, han bansan dawn em a ngam chiah si lo mihring heti zat kan kawl hi a ni. Kum 30 te thahnemngaihna tel lova thawk chunga pension phal bawk si lo, puitling thankin zet heti zat kan awm hi chu a mak angreng viau a tih theih ang. A hna lamah tui ni se a dik thlap a. Tui lo chung pawhin mamawhna avanga thawk ka ni a, ka theihtawp ka chhuah ang te la ti tal ni se a zia deuh tur. Chutiang pawh ni chuang si lova tar chhiat rak thlenga mahni phurpui loh tawp hna thawh hi a mak viau a ni. Kan damchhan leh kan nih tum hi pawisa neih ngawr ngawr emaw, takna tak tak tel lova mi hmuha lan mawi ve deuh mai hi em ni aw, a tih theih.

Kan Pension runpui thla, February a pension sup sup hun hi a la liam dawn a. Ṭhangtharte chuan an kum dik an ziak zel tawh a. A hun hmaa pension pawh an tam telh telh a rinawm.

Tuna mi tam takin mi ṭhenkhat kum inziak naupang an dem deuh hi chu an demawm hranin ka hre lova. Kum inziak naupang emaw naupang lo emaw, tui si lo leh ti tha peih bawk si lova kan inhamtang tlat hi a ngaihsanawm lo zawk a. Chuti chauh pawh ni si lo, hrisel lohna avanga thawk thei lo inti, Office pawh kai hlei thei lo, chawlh fumfe pawh la duh si lo, invalid emaw, voluntary emaw pawha pension duh bawk si lo te hi chu sorkarin ngaihtuah tha se a duhawm hle mai. Thawh tur tam tak awm a thawk thei si lovin hmun luah tlat mai hi thil kawngkal a ni lova. Thawk thei tam tak an awm laia thawk thei hauh si lovin hmun luah tlat pawh hi a dik lo. Kum hnih khat te inngaihthiam tawh hnu chuan zawh lam lam kawng zawh a ṭha hlein a lang a, a puitlinthlak zawk bawk.