KAN BUAINA ZU

Zu kan buaipui tawh mai rih lo dawn emaw tih laiin tunlaiin kan buaipui thar leh deuhva. A buaipui an awm takah chuan a buaipuiawm chhunzawm ve leh ta mai. Political Party pakhat phei chuan, ‘Kan sorkar chuan zu zawrh kan titawp ang,’ an ti mek bawk.

Zu buaipui hi thlirna hrang hrang aṭangin a thlir theihin ka hria.

1. Thil awlsam tak a ni. Tihtur tha dang ngaihtuah chhuak thiam lem lo, lansarh duh ve si tan chuan sualna leh fel lohna zawng zawng deuhthaw a mawhphurtua zu han puh a, han do vel hi thil pawimawh ti anga lan theihna awlsam tak a ni a. Ngaihtuahna thar te, hmasawnna thar te leh ruahmanna finthlak te awm lem lo mahse Mizo tam tak tan chuan thil tha ti ve anga lanna awlsam tak ni tain a lang.

2. Thil tih sa loh deuh mai a ni. Kan sorkar te, kan kohhran te, kan khawtlang te’n a lang a pauva zu an do bur bur chuan hmasawnna hna thawhna tur leh mipuiin an ngaihven tur kha a labo vek a. Veng chhunga zu zuar pahnih khat te, tlangval lak tlak lem loh pali panga te kha kan buaipui luai luai mai a. Titi berah kan neih a, kan rinna tehna angrengah kan hmang a, kan hmasawnna hna thawh loh zawng zawng kha kan zu beihna thawnthu chuan a chhilh bo vek a. Mipui tan hekna nasa deuh mai a ni. veng chhung kalkawng tlabal em em siamthat nana cheng sangkhat pawh thawh khawm thei hauh lo khan zu do nan chuan kan thawh khawm ruih ruih thei a. Veng chhung tuihawk luankawr tenawm leh mumal lo siamthat nana tuk khat tha pawh thawh thei miah lo kha zu do chuan nileng lengin kan inhawr khawm thei a, zanlai thleng thlengin kan tei kual peih a. Khawtlang hruaitu rualin chutia kan tih chuan hna tangkai dang thawk tura inphut leh zel chu thil harsa tak a ni. Chuti kan nih avanga kan veng, hei leh chen kan luah tawh pawh heti mai hi la ni kan ni thei em?

3. Hun chu kan khawhral narawh e. Nikum vel maia sorkarin zu zawrh phalna a pek dawn khan zu phalrai a nih huna kan buai turzia leh kan him loh nasat turzia te thenkhat chuan kan sawi peih hle a. Dik tak chuan hnial ngam pawh kan awm mang lova. Mahse beisei ai daihin buaina leh rik nuai nuai chu a thleng ta lova. Thenkhat phei chuan min sawithaihtute kha an hril a hai ta mai awm mang e an lo ti fiamthu hial a. Kan buaina leh kan inhnialna zawng zawng kha ‘buana hmaa kherh’ an tih ang rawngkai, zeldin thubawl a lo ni ta. Kan zu buaipui vak kha tha thlawn seng kan lo ni ta mai.

Kan sorkar lah chuan zu zawrh dawn khan a rui te pawh na taka hrem a, tha taka khuahkhirh tum angin an insawi a. Chu chiah chu zu zawrh duh pawl pawhin kan tanfung a ni. A zu tak zawk hi buaipui lovin, zu chu hralh ni se, chhiah pawh la ila, a hlawkna pawh sorkarin tel ve se, zu zawrh duh lo lamin an huphurh ber, zu avanga buaina hi theihtawpin tirem ila tih kha kan beiseina a ni. Mi ram leh hmundangah pawh an zawrh, zu hi amah zu ngau ngau bei lovin, a in dan leh a ruihdan hi mi tihdan ang pangngaiin bithliah chin siam fel ila, chu dan hnuaiah leh kalphung hnuaiah chuan zu hi chin tawk neiin awm ve mai se tih hi kan tanfung a ni.

Tun hnuah hian zu rui hremna te, phalna hnuaia khuahkhirhna dan te hi a dul leh ta deuhvin a lang a. Khawlaia ruih te pawh hi a zalen leh ta deuhvin a lang a. Chutih laiin kohhran lahin tunhmaa an tihdan pangngai ni lo, tihdan chi dang hmangin zu zuar te an thunun ta zauh zauhva. Hei chu an thu a ni a. Sorkar tan inrawlhna tur a awm chiah lovin a lang a. Kohhran chuan engtiang pawhin an mi leh sa te chu lo ti se, sorkar chuan a tihtur chin ti turin kan beisei a, sorkar chuan zu rui khuahkhirhna chungchangah pawh bat a nei bawk.

MNF Party chuan sorkarna an chan hunah zu zawrh phalna tihtawp an tum thu an puang a. Hei hi an hlawkpui ang nge hlawkpui lovang tih hriat a har khawp mai. Hei hi vote zawnna hmanraw chi khat a ni a, zu hi an haw tak tak a nih chuan an Party aṭanga tanin an Party member, zu in mi leh rui mite chu an vote pawh an duh tur a ni lo. Mahse zurui vote pawha tlin chu an duh ngei si ang. A lehlamah chuan zu zawrh phalna tihtawp an tum a nih chuan zu zawrh duhho zawng tan chuan MNF chu vote ngam chi an ni hauh dawn lo. Zahawm pangngai leh dan bawhchhe lem lova zu in duh zawng zawng te zalenna chu MNF sorkar hun hunah rahbehin a awm dawn tihna a ni thei em? Chu chauh ni lovin Mizorama zu tam tak leng vel reng chung siin sorkarin pawisa hmuhna hnar tha tak pakhat a chân dawn tihna a ni chiang a. Chu chu sorkar chuan a tlin tak tak ang em?

Sawi sawi ngai lovin kum 17 zu kan khap hnua zu kan han zuar thar hi kum 10 te tal chu a that a chhiat kan ngaichang ang chu tih nak alaiin sawi leh hi tul tlatin zu lang a maw le.