KHIN DIK LO HMANGTUTE

Tlem lai khan mi ṭhahnemngai ṭhenkhatin Aizawl khawpui chhunga bukna dik lo hmanga thil hralhtute an zawng chhuak a. A lawmawm ngawt mai.

Dawrkai tam takin bukna dik lo hmangin thil an hralh a. Dik lo leh tenawm takin mipui pawisa an lo ei mai mai a. A bik takin thir zawrhna dawrah hian chutiang chuan thil an ti a. Khata thil dik lo titutew kha eng hremna nge kan pek tih ka hre chak ngang mai a. Kan sorkar chak tak hian khang mite kha engtinnge a tih zui tak min hrilh thei awm se ka ti hle mai.

Dik lohna hi a tenawm a, kan theihtawpin kan do tur a ni. Dik tak chuan mi verther, mi pamham, mahni hlawkna tur a nih phawt chuan midangte chu bum zel mai tur anga ngai hi kan awm ta nual mai a. Chung mite chu hrem a, an tih leh tawh reng reng lohna tur ngaihtuah te hi sorkar tihtur pawimawh tak a ni. Chu chu dan awmchhan a ni a, dan chu mitinin dikna kan ban phak theih nana awm a ni bawk. Dikna a lal a ṭul miau avangin dan chu mi zawng zawng zawm tur a ni.

Thir zuartu tam tak khan thir quintal sawm an hralhin quintal khat te an lo fanghma no ei ringawt a. Min bum reng siin min duhsak awm takin an awm a. Dik lo taka kan pawisa min laksak chungin kan thatna tur ngaihtuah ni awm takin an awm a. An tenawm tih mai loh chu sawi tur a vang hle mai. Khatianga thil titute kha chu an dawrah thla khat chhung rawng sena ziah X te khai belhchhah ni ta se hremna pangngai bakah a lawmawm hlein ka ring. Dawt hmanga mipui leh anmahni dawrtute hnen aṭanga pawisa la duh dawrkai te kha chu kei chuan ka theih chhung chu ka dawr tawh lovang.

Heng thil tha lo leh fin vertherna hnaivai te te hi a bik takin Silchar vai hnen aṭanga kan zir chhuah a ni hlawm a. Hetianga titu tam ber chu Silchar vai, thir buk leh buaipui vel tura kan ruatte hi an ni ang. Heng kan unaute hian fin verther dan hnaivai te te, zahawm lo tak tak, hlawk ve theihna tur si hi an hre thei em em mai a. Chungho duhamna rilru do zo lo dawrkai inti ve si tam tak chu kan Mizo zingah an lo awm ta a. Kan hnam tan thil pawi tak a ni.

Kan petrol-ah khawnvartui a inpawlh a, kan Gas bur ruk phai then a ni a. Kan buhfaiah a buk tirit turin lei nawi a inpawlh a. Kan buhfai bag lahin thingtlang lam a panna kawngah suam a tawk a. Kan Weigh bridge a ṭha thei mawlh lova. Chung karah chuan kan sorkarin dawtin report a ziak a. Kan mamawh aia tam hi kan mamawh phah a, kan sum sen tur aia tam hmun tam takah kan seng a. Kan harsatna kawngah kan dinhmun dik tak kan hre thei tak tak lova. Kan buaina kawng hi a thui ta hle mai.

Kan sorkar hian inthlan leh a tlin ringawt ngaihtuah lo hian thil dik lo titute man chhuah a, hrem hi tih tak takin ngaihtuah sela a tha mang e. Kan ṭhenawmnu chuan hmanni lawk khan, ‘A va manganthlak tak em awww! Hei kan Gas hi ni 15 chauh kan hmang a a ral der mai. Nidangah chuan thla khat te kan tla ṭhin si a,’ a ti vawng vawng a. An dinhmun ngaihtuah a, chhungkua an inren dan te en chuan an gas ruksaktute hmel awm ang te han suangtuah a, an chunga lawmna pakhatmah an neih lohzia te ngaihtuah chuan a rilru natthlak ngawih ngawih mai.

Miin in sak an duh a, theihtawpin pawisa puk tur an zawng tang tang a, puk tur an hmuh chhun chhunin thir an lei a. Chutah a zuartuten nuamsain an lo bum hmiah hmiah a. Chutianga mi bum ching dawr neitute chuan hmingthat leh lan mawi nan kohhranah thawhlawm te an han thawh ve leh lawih lawih a. Thawhlawm thawh tha thei lah chu kohhranin an lo lawm leh phian a. Chhun khaw enga mi rawk hmang tu tu te emaw hi chu mawi takin kan lantir a, chawimawina kan pe reng tihna a ni.

Legal Metrology Deptt. hian khang bukna dik lo hmangtute kha engtinnge an tih zui tak a, Consumer Union hian an ngaihven zui em? Legal Metrology Deptt. changtu Minister hian khang dawrkaiho kha engtinnge a tih zui tak hriat ka chak hle mai. Khatianga thil dik lo chhui chhuaktute kha an fakawm a, khatiang khan thil ti zel sela. Khang dawra thil leitu hriat theih ang ang te chu an dik lo taka an pawisa lo laksak te kha pe kir leh vek turin sorkar hian ti ngei sela a duhawm ngawt mai.

Miin thil sual leh dik lo an lailang a, hremna hi chu sorkarin a lek ngei tur niin a lang a. Mi chhui chhuah leh hai chhuahsa pawh hremna nen a umzui thei lo a nih chuan a vanduaithlak hle ang.