KAN POLICE FORCE TE HI

Kan Police te hi mi ṭhenkhat chuan India rama police tha ber ti tein an han sawi ṭhin a. Dik se, tak tak ni se kan duh hle a. A chang chuan ni deuh te pawhin kan hre ve ṭhin a. A chang erawh chuan kan ni tak tak ang em? Kan inenkawl dan han en hian chutiang chu kan nih theihna tur a awm dawn em ni? a tih theih awm e.

Aizawl khawpui laili lai tak mai ti a sawi theih, AR Lammual, Vanapa Hall, Tennis Court velah hian hmeichhe inzuar angreng langsar angreng tak te, ruihhlo tih ching te an vir hut hut mai a. AR Lammual bula kawng chunga lei dawh (Over bridge)-ah phei chuan a tam zawkah hmeichhe awm nem deuh tan chuan kal inthlahrunawm khawpin ruihhlo tih ching an tam a, an invit, Dendrite an hip, damdawi an inhlan chhawng, an hmel han en reng reng pawh a ‘Khawm-case’ a man inthlahrunawm hauh lo tur hi an awm reng ti ila kan sawi sual lovang. A chang phei chuan zingkar aṭangin an awm a, chhunah leh tlaiah te pawh englai pawhin an awm reng tih theih a ni.

Hemi bul lawk, State Bank Main Branch tual velah te leh Excise Commissioner Office tualah te, Vanapa Hall tualah te hian zan lamah chuan nula hmanhmawh lo tak tak te hi an tei an tei mai a. An kal liam tawh emaw tih te hi an lo let leh a, Taxi a chuan tum ni awm tak, chuang lawk lo, chuan tum lo ni awm tak, chuan tum deuh reuh anga lang te hi an vir an vir mai a. Zan rei em emah te hian an inbial an inbial a.

Kan Aizawl khawpui laili tak maia hetia heng mite an han awm leh hetianga kan han awm ta mai hi chu mak hi ka ti reng mai a. Kan police-te hnathawh hi ka ngaihtuah ve fo ṭhin. Police te hi tualchhung buaina hmet dai tur te, tualchhung inawpna keng tluang tura rawih an ni a. Ram leh ram indona lama pen chhuak ve tura ngaih an ni lo. An hnathawh chu tualchhungah a awm a ni.

Kan police te hian heng hi vei sela, tih tak takin nawr sela chu kan khawpui laili tak mai hi chu heng mite lakah hi chuan venghim thei tur kan niin a lang. Hmel han en reng reng pawha rinhlelhawm ngawih ngawih, amah Pu Zuala tihdan tak a engkhaw sawi set set lova han man chawt a, ‘I sim ang em?’ tih mai inthlahrunawm hauh lo tur mite’n kan khawpui hetianga an titawp hi chu a dik thei lovin ka hria.

A lehlam zawnga ngaihtuah chuan tunhma khan kan Police te khan an hotute in sakna lam kha an bawr hneh thei ngang mai a. Cement leh rora chawhpawlh nileng tur te khan an chhawr theih a. Police lal deuhvin in an sak chuan dawrzawn chanve vel hi chu englai pawha thawk rawt ang an ni hial a. Ṭhenkhatin an huana hnathawk turin an chhawr, ṭhenkhatin an bawng an enkawltir, ṭhenkhatin lei an laihtirin ṭhenkhat chuan an inchhung furniture zawng zawng an siam zawhtir vek a. Heng zawng zawng hi sorkar hriatpui loh leh sorkar hna lo vek a ni a.

Kan sorkar lo ding ta hian khatianga in sa tura police force te chhawr kha a khap ta a. Chuti a nih chuan khatianga in sa ṭhinho kha khawiah emaw hi chuan an la awm tur a ni a. Tuikuk hel um tawk an awm laiin HPC(D) bei tawk pawh lo awm se, Vanapa Hall leh a chheh vel thianfai khawp hi chu police kan la neiin a lang a. Hetia kan khawpui ve ber tuallai ualau lai tak maia mithianghlim hmel pu lo tak tak an khawsa nghet tlat mai hi chu a veiawm hlein ka hria.

Ramhnuai pilrila mi zu bilh pawh kan hai chhuak thei a, chutiang hai chhuak tur chuan tha tam tak kan seng tawh a. Zu kan duh loh chhan pawh hmeichhiat mipatnaah te nungchang inthlahdahna a siam a, mihring nun a tipawlawh a, chuti khati kan ti ngeiin a rinawm. Chutiang thlen thei zu chu ramhnuai rila mi pawh khawrh chhuah tuma kan beih tlut tlut laiin kan kawtkai intawm lun lai ber maia hetia nun inthlahdah tih hriat tak maia mi tlemte khawsa kan han ngaizam leh tlat anga lang hi a mak hlein ka hria. Chu chauh ni lovin mi tam takin suala kan ngaih loh zu chu ngawrh takin kan um a. Mahse khawvel leh midang zawng zawngin suala kan ngaih ruihhlo nen heti hian kan khawpui laili-ah mi fere te te (han ti ila) tlemte an inluling a, hemi khap rem thei lova kan inngai leh khap rem tumna tak tak kan nei lo ni a lang hi India rama police tha ber ber tan chuan a tlawm thlak zawng te pawhin ka ngaihtuah.

Kan mimal in sa tur chuan police lal engemaw zat chuan police force mi dawrzawn chanve kum chanve chhung dawn dawn an chhawr fer fur a. Mahse kan khawpui laili a duty tur leh mi kawhmawh bawl te vaikiang tur chuan kan indaih leh hlei thei si lo em ni tiin ka ngaihtuah. Kan tum tak tak lo nge, a ngaihna kan hre lo nge ṭul kan ti ve lova, helai kan khawpui laili a mi rinhlelhawmte avang hian engmah mawi lohna kan nei lovin kan hria? Kan sorkar hotute ngaihdan ka va hre chak em!