Designation Plate tar lo Chief Secretary

Dik tak chuan ngaihtuahna hmang deuh leh inthlahrun nachang hre mi deuh, hmun danga mi khawsak dan hre pha chin deuh leh mahni nihna hmanga pawimawh chan tum lem lo chuan Designation Plate tar hi an ngaihtuah fova. Sorkar hnathawk tam tak pawhin an tar tawh lo bawk.

Ka rindan chuan, thil hi hriat chian hi a har ve tho mai a, BDO te hian an bial chhung an fannaah te hian thingtlang miten awlsam zawka an lo hriat a, an harsatna te an lo thlen a, an inpawh thuai theih nan an Designation Plate hi an bial chhungah tar se a tha ang, tih angreng vel hian khawilaiah emaw kaihhruaina a awm ang a. Chu chu ni ve lo pui pui hian kan lo ti ve ta vak vak a ni mai awm mang e te ka ti ta mai mai a. Kan thu lak hi a mak angreng a, motor kawl/dawn thuah pawh Sectt. Service Association hruaitute khan ngampa deuh mai hian kan Chief Minister leh Minister-te hmaah khan, ‘An aia hniam zawk pawhin motor an dawn te chuan a chunga mi ten an kawl loh a thiang hlei nem. Sorkar hnaah chutiang chu dan a ni hlei nem,’ an han ti phar phar a. Kan Minister leh CM ṭhenkhat, sorkar kalhmang hre lem lo kha chuan hnial ngaihna an hriat loh bakah tak tak chiahah an ngai a. Motor te kha hlawh azira dawn ni tlatin an hre miau mai a. Hna ni lovin hlawh kha kawng engkima tehfung atan an han hmang a, kan buai zo ta viau a nih hi.

Field Officer, hnain a zir vanga motor kawl tur, sorkar Officer Junior tak (BDO te ang te) hi hna pawimawh tak a ni a, mahse a Senior zawngah chuan Senior post a ni lo. Mahse motor kawl an mamawh a, chu chauh ni lovin an Designation te pawh an bial chhungah tar se ram leh hnam tan a ṭha ngawt ang. India ramah hian Block Development ngaih pawimawhna leh hemi zulzuia ruahmanna siamna hi a rei tawh em mai. Dik tak phei chuan Development tih leh Block tih hi chhulkhat kual ang hial a ni. Chuta Development khawihtu ber chu mipuite nen inhne a, thawkhova, thuneihna nei turin sorkar laipuiin a ngaihtuah a.

Mahse le, keini chuan, “He mi ai hian a senior a. SDO a ni tlat a, BDO pawhin a tar chuan tar tur alawm,” kan ti ta a. Chutah a kang kai zel a, Office hmun nghakho, Jt. Secy te, Dy. Secy te, Under Secretary te thlengin kan tar a. Officer ve ve chuan kan tar ta vek a. Heng office hmun thu - Sectt. Service Officer-ten an motor a heng an han tar han hmuh phei hi chuan nuih a za a. Kan Chief Secretary berin a tar loh hnu hian hengho hian tar chhunzawm zel tak maw le.

Tlem lai aṭang khan kan MLA-ho lah chuan an han tar ve ta ngawt pek a. An tar chhan hi ka hre chiah lova. Mahse hetia an tar a nih rau rau chuan kan inzirtirna tur ni a ka rin chu eng thilah pawh kan kawng kal mai mai te hi min han tlan pel se, vawkchaw dawl phur teuh chung pawhin, “E hei kan MLA motor a nih hi! Lo ding teh u lo ding teh u! Saw kan feh kawng saw min rawn ngaihtuah teh. Kan leilawn saw a rawp tawh a tlak a hlauhawm,” te kan ti ang a. Awlsam taka anmahni kan hriat theih tawh avangin kan tan an Designation Plate hi a hlawk ang. Aizawlah te hian thingtlang aṭanga lo kal hian, “E khai, lo ding teh u lo ding teh u! Hei kan bial MLA chumi khami in chu ka hre lova, min han hrilh lawk teh u,” te ti mai sela. An Designation Plate hi hmun danga MLA ten an tar ve ngai loh, mahse Mizoramah chuan sorkar hnathawk tih thika an tar tak mai a ni a. Heng zawng zawng hi an inhuam tel tur a ni. Mipui aiawh tura thlan, rawngbawl tura inpe an ni a, an inpekzia entir nan Designation Plate an tar kulh a. Kawngkhar luchunga “Welcome” tih tar ang maiin kan harsatna chu khawi hmunah pawh, eng hunah pawh kan thlen ve theihna tura an kawngka hawn angah kan ngai lo thei lovang. Chuti a nih loh chuan lalna leh thuneihna entir duh vang a ni ang a, a tenawm ngawt ang.

Field Officer te hi chuan an bial chhungah mamawhtute mamawh phuhruk nan Designation an tar hi a ṭha a, an hnain a awlsam phahna a awm ang. An lal vang leh thuneihna tam tak an neih vanga tar an ni tur a ni lo. Tuipang Medical Officer-in a bial fannaa Cross sen chhinchhiahna pu motor a hman a, a Designation a tar avangin Health Directorate a Jt. Director, Medical Education hian Aizawl khawpuiah a Designation a tar ve ngawt hi ṭangkaina a awm lova. BDO, Khawzawlin Ngaizawl vel a tlawhnaa BDO tih a tar hi a tangkai laiin Dy. Director (E), Rural Development Department, tih chuanga hmun hrang hranga tlan kual hi a ṭulna awm reng reng ka hre lova. Under Secretary, han tih ngawt te, Dy. Secretary, han tih ngawt te phei hi chu zahthlak lam rawng a kai. Eng nen vak mah sawi zawm tur a awm lova, ‘Chumi te pawhin an tar,’ tih zawng kha an sawi tur neih chu a ni.

Nihna hi chu kan duh viau a ni. ‘Upa’ tih te kan han ziak tel hram hram tak a. Kohhran huang pawn lama ‘Upa’ ti a inziak nalh nalh tawhho hi chu Lal Isua inngaihtlawmna puan khan a daih ve hi ka’n ring lo bur mai a. Kohhran huang pawna ‘Upa’ ti a mahni inziak leh indah reng reng chu ngaihdan ka nei ve tlat mai a. A dik leh dik lo te, a thiang leh thiang lo te aia mi tihdan ni a hriat zawm ve zel theiah ka ngai mai. An sual e phei chu ka ti dawt lo, khawvel ningkhawng an hria a nih ve pawhin mahni hamthatna tur ni a an hriatah chuan foul zeuh zeuh hnial lo mihring ang talah ka la ngai ta fan. Tunhmaa kan hriat ngai loh, Er-ho hi an rawn inlar thar a. Lehkhabuah leh thildangah hian mi hmingah Er. hi ka hmu ngai lo em mai a, tih ve theih tho, mi tih lem loh, mahse keini lamin kan lo chawi lar tak chiam a nih te ka ring. Ngaihtuahna tluang pangngaia han ngaihtuah pawhin Bachelor Degree nei zawng zawngin hetianga kan dah dawn a nih chuan hnial thu chiah chu a awm lo nain tunhma pawh khan, Chumi khami, B.A, tih kawngka lu chungah kan tar ve ṭhin tak kha maw. Miin an tar miau chuan an tar ve mai a niang chu.

Kan Chief Secretary chuan a Designation Plate a la thla ta chu a nia le, midang hian la tar ve zel hlawm tak maw. I lo thlir ang.