SILENT CITY KHA

Hmanni chu veng paho kan awmkhawm laih laih lai tak mai hian motor pakhat a lo kal a, a tlan chak tehchiam pawh a ni lova, mahse a fimkhur ve hle ni tur a ni, horn a rawn hmet vak vak mai a. Ṭhenkhatin an lo en deuh ha ha lai chuan a’n hmet leh salh salh a. Reiloteah a tlan liam zui ve ta mai bawk a.

Khatia rawn titu kha ka’n thiam lo viau dawn a, mahse ngaihthiamna tak eng eng emaw ka nei ve tlat a. Vantlang kawngah hian kan han punkhawm deuh hlek emaw, a huhova thiltih engemaw a awm hlek hian motor lam ngaihsak lo hian kan tam chhuang hian lirthei hi kan pawisa lo ta deuh mai ṭhin a. Laklawh chang a lirthei han tihkhaihlak chang chu awm mahse hun tam takah chuan kawngpui kan nel lutuk deuh mah mah thin a. Motor khalhtu, midang tihpalh hlau reng renga khawsa tan chuan a leh a lingin thin te hi a rim hlur ṭhin a. An thinrim nachhan pawh fel takin awm hlawm ila tih duh vang a ni ve fo tho mai.

Ngaihtuahna dang lehah chuan kan Aizawl khawpui hi mi tam tak chuan kan chhuangin kan boruak muanawm tak hi kan lo chenpui rei tawh a, motor horn han hmeh te hian kan thin a thawng letling a. Vairam atanga lo haw hlim te tana nunphung pangngai anga horn han hmeh hi Aizawlah chuan mak kan ti ta tlat mai a. Hei hi kan that vang leh kan boruak duhawm em vang a ni. Ngaihtuah thui lutuk lo, mi ti deuh mai mai, remchanga horn hmeh te chu motor khalh dan ve tur reng emaw ti ta mai tan chuan kan awmdan hi a mak letling zawk viau thei. Motor horn chu hmeh atana siam a ni a, kawng kawi thlen dawna han hmeh te hi thenkhat tan chuan tihmakmawh, insut palh pumpelhna atana fimkhur lawkna a ni a, tih awm takah ṭhenkhat chuan an ngai. Kan motor hnunglam tam takah chuan ‘Horn min pe ta che,’ tih nan, ‘Horn Please’ tih te kan lo ziak ve mek a. Kawng kawi tam takah kawng siamtu, a tlangpuiin BRTF lam mi phei chuan horn hmeh tur tih entir nan tawtawrawt lem an dah bawk.

Kan Aizawl khawpuiah hian motor Horn ri a tlem em avangin kan nunphung tam tak chu a ṭha tih a hriat ngawt mai. Kan hawihhawm a, midang kan pawisa a, kan motor khalh kan fimkhur a, kea kal leh midang kan zahder tih a lang a ni. Kan awmdan te tak te te hian kan nun chhungril hi hmun tam takah a tarlang fo thin a. Kan ṭawngkaa kan insawi dan te, lan mawi tuma kan inpho chhuah laia kan awmdan te aiin kan nitin nun leh kan awmdan sawi thama ngaih loh ṭhenkhat hian kan nihna a tarlang chiang fo zawk a. Kan Aizawl khawpuia motor Horn hmet mang lova kan awm hi kan hnam tan darthlalang duhawm tak a ni. Theih ni se khawlaiah te hian, ‘No horn please’ tih te han tar ila. Khawilai laiah emaw, ‘Horn i hmeh loh avangin Aizawl i cheimawi a ni,’ tih te han tar bawk ila ti te thleng thlengin chapo angreng takin duhthu te han sam ta zel ila kan ti lutuk ang em?

Kan khawpui hi khawpui fai, khawpui bengchheng lo, hawihhawmna nena tual lenna hmun ni se kan duh vekin a rinawm a. Kan tih chuan kan thei leh mai pawhin a rinawm bawk.

Mizote hi fel takin awm ila tiin duhthu kan sam a. Kan sorkar hnathawk te, kan Contractor te, kan Politician tam tak te hian thianghlim takin hna thawkin awmphung mawi tak nei ila ti a duhthu kan samna lamah thil dik lo te, tih that loh te kan sawi a. Mipui awmna laia motor horn hmettu ang maiin thil tha lo a thlen palh loh nan te, mipuite kan zangkhai zawk nan te, kan vaia kan nawm zawk nan te heng hi kan sawi thin. Chutihlaiin a tha lam pawh kan chawi vul a dik a, kan awmdan tha pawh kan chin chhoh a tul bawk.

Inthlan chungchangah kan awmdan a mawi viau mai a. Hmun dang ang lo takin tlawmngai pawl leh kohhran lamin uchuak taka inthlan ni a khawsak an khapin chutianga miin an tih lohna tur chuan tha an thawh a. Hmun khata thingpui lum te kan ching chhuak a, Roll enna hmun te hmun khatah kan siam a. Kan duhthlanna zalen taka kan hman theihna turin boruak tha an siam a. Thahnemngai fal zual che mawi lo thei tur tan pawh tun thleng chuan hmun a awm vak lo. Hetiang inthlan boruak thianghlim leh tha tak mai hi Mizoram hmun pangngai tam berah chuan kan awmdan a ni a. Khawimaw laia che uchuak deuh chu chhim lam thlafemah te an awm mial maithei. Kan inthlan boruak tam ber hi chu a chhuanawmin a fak tlak a, YMA leh kohhran te hmalakna te, a rah chhuah leh mipui mimir nunphung te pawh inthlannaah chuan hmun danga awm te tana thikawm leh duhthusam ram rim nam rum rum khawpin a tha a ni.

Inthlannaah pawh hetianga kan tih theih chuan Aizawl khawpui hi Silent City ti a vuah theih turin kan awm leh thei mai ang tih a beiseiawm a. Sap ram leh ram changkang dang anga kan mawi theihna leh kan boruak a nawm theihna hnai ber te zinga pakhat chu Silent City nih hi a ni mai awm e.

Khai le, Silent City kan nih theih nan theihtawp i chhuah teh ang u.