KAU LEHZUAL RAWH U

Ṭhian pawl khat hi ramah an riak a. Sapuiin a rawn tihṭhaih ta mai a. Buk thlanga awm te mangang chuan buk chhaka awm te hnenah chuan, “In silai kha kâu sain keng rawh u,” an han ti a. Buk chhaka awm te chuan, “Kan kâu,” an lo ti a. Mahse buk thlanga awm te thlaphanna chu a reh chuang si lo va, eng danga ti ta lo chuan, “Kâu lehzual rawh u,” an han ti ta a.

He thu hi a nuihzatthlak angreng viau mai a. Mahse hetiang deuh hian kan sorkar hruaitute hi ka au ve duh khanglang a, nuih kan tiza ta deuh a nih pawhin eng kan tih ang. Kan hmasawn dan te, kan ṭhan dante leh kan duhthawhnate han en hian kan sorkar hrawn mek hian, theihtawp an chhuah nia a lan lai hian inthlahrung tak chung siin, “Bei lehzual rawh u,” tih hial a chakawm.

Kan State chhunga tihtur leh hmasawnna hna thawh ngai tamzia ngaihtuah hian a chang chuan rilru a hah viau mai a. Dan siamte a ngai a, chutih laiin dan awm lo emaw kan tih ṭhenkhat hi chu a lo awmsa reng a, a kenkawh lamah kan hnufúm mai maite a lo ni a. A ṭhen laiah chuan thil pawimawh tak mai, khuahkhirhna dan eng emaw awm ngai ngei ngeia langte hi a titu tur pawh hriat loh, tu Department chan nge tih pawh hriat hleih theih loh, eng dan hmanga tih ngai nge tih pawh hriat loh te hi a awm a. Tu Officer fel deuh leh ṭhahnemngai deuhvin emaw; thuneihna a chan chuan ama ṭhahnemngaihna leh duhthawhna avangin thil tam tak a ching fel mai a. Mahse chu Officer chu a kal liam chuan a dawta mi chuan a rawn la zam mai mai a, a hmaa fel taka thil awm ṭhin kha a lo dul tial tial a, a lo zuzi zo ta ṭhin a. Dan tlawhchhan ṭha pawh a lo awm lo va, a hmaa mi a fel em vanga thil kha lo ṭha mai maite a lo ni ṭhin. Aizawl Bazar pheiah hian Bungkawn aṭanga kea kalna kawngah hian a chang chuan chunglam aṭangin tui a rawn far ṭhin a. Tihpalh thilthua far chang a lo awm, mihring thilsiam a nih avanga lo awm palh a nih chuan mihring ve bawk chuan hriatthiam chin neih a ngai. Mahse a chang chuan rin aiin a far rei ta ṭhin a. Dan a awm fumfe lo em ni tih awl tak a ni. Kan Aizawl khawpui chhunga a lun lai leh, laili lai tak maia hetiang thil a thleng leh ṭhin hi hriatthiam a har chang a awm lo thei lo. Thil té tham leh ropui lo tak a ni, mahse a thlenna hmun azirin mak ve thei tak a ni.

Mipuite hi kan ril a ṭam a, kutdawh duhthusam ang maiin kan duhthusamte hi a kaihlai thei khawpin a lang. Sorkarna changtu ni ta ila, theihtawpa kan beih lai meka kan tih loh lai apiang emaw, kan la tih hman loh emaw apiang inhrilh char char mai chu a ninawmte pawh a ninawm theiin, ngeiawm lamah te pawh a kal thei hial awm e. Mahse, “Kau lehzual rawh u,” tih ang maiin theihtawp mai ni lovin, a bak pawh bei zel thei se la, a duhawm khawp mai. Hmun tam takah chuan thinte hi a rim duh dawn riaute hian ka lo hria a. Kan electric banin dinna tur a hre tawh lo va, mimal in sain kawngpui kan hnaih luat avangin kan electric hrui thlun dan a buaithlak a. Siam fel dawn chuan ramin a daih lo va, boruakin a daih lo va, leilungin a daih hek lo. Chutih karah chuan kan thim hlek chuan kan vui em em a. Chuti chung pawhin kan hotute hian tihfel tumin bei chhunzawm zel se a duhawm ngawt mai.

Hmanni khan Opposition lam khan, “Sawhthing hi a chingtute kawtkaiah kum tluanin lei rawh se,” tih angreng kha an han tiri a. Eng sorkar leh eng company mahin an tih theih loh tur thil ti tura han inphut tâkte kha rin ai chuan a mak hial. A chingtute kawtkai chu sawi loh, a chhekkhawlna hmun siam bika mi pawh lei vek tur chuan kan tun dinhmunah chuan a harsat dawn a, a hunbi tiam chhunga mi chauh pawh lei zawh vek a harsat dan tur ngaihtuah chuan; kan inkar lu deuh em ni tih awl tak a ni. Mahse chuti chung chung pawhin kan sorkar hotute hian Mizoram mipui hmakhaw ngaiin, a tihdan tur ṭha ber anga an hriat ang angin bei ṭang ṭang zel se a va duhawm em. 'Sai an insual chuan an kephah bula hnimten an tuar ṭhin,' an lo tih angin a chunglam sang taka inbeih dan dik lova inbeih hi mipuite'n kan tuar a. Duhtui lo taka vote zawn pawh hei leh chen hi kan tuar tawh. Eng inthlan pawh hmachhawn leh dawn ila, mawi tak leh rintlak takin vote zawn ni se a duhawm. Ṭum khat tlin nana ram mipui rilru tihnual rawih thei khawpa vote zawnte hi a pawi vawng vawng.

Kum khat dawn lai chu theihtawp chhuahin sorkarin mualphona leh hmingchhiatna nei lovin thil ṭha tih tumin ṭan a la ta a, kum lo thar leh turah leh hun lo kal zel turah pawh a hma aia paukhauh leh tumruhin rinawmna vawng se la, an pau tikhauh se ka duh ngang mai. Minister leh MLA leh Chief Minister hausa leh mahni inhaivur thiamte kan ngaih ropui telh telh hun tur hi a rawn inher chhuah ve ka ring lo va. A rei telh telh ang a, mahni ṭanghma hai lova ram hmangaihna lantirtu mi dikte hi an tlo telh telh ka ring.

An tih tawh sa leh an inhlan tawhnate fakawm hle mah se, “A aia nasain bei leh teh u,” tih hi kan kumhlui thuchah ni teh se.