HRILHLAWKNA DIK LO

Sorkarin zu zawrhna dan a siam a. A siam hma aṭangin thu leh hla a tam a, kan inchai bur bur ti ila a dik hial awm e.

Kohhran thlirna aṭanga thlirtute chuan sorkarin zu zawrh phalna dan a siam a, Mizoramah dan anga zu zawrh a nih vaih chuan buai nuai nuai tur leh khawlaiah te pawh zu rui kat sup sup tur angin min hisaptir a. Vawiin thlengin kohhran chuan zu zawrh chu an la do ta ṭang ṭang a. Kohhran ṭhenkhat phei chu an duty hial a. Thlirna ṭhenkhat aṭang chuan an fakawm thei a, thlirna ṭhenkhat aṭang erawh chuan a mak hle a ni.

Kan kawtthlerah zuruiin lal hrawt a, chhun khaw engah pawh a rui lo zawk tana inthlahrunawm khawpa kan Aizawl khawpui awmtirna tur dan pass tur ang hialin he zu zawrhna dan hi er lawk a ni a. Kan khawlaite pawh ralmuang lo thar ṭhut tur angin kan beisei bawk. Heng hrilhlawkna leh thil awmdan tur anga ngaih te hi zu zawrh duh lotute ka aṭang leh an lehkhaziak aṭanga chhuak a ni a, chung mite zinga tam ber chu kohhran lam mi leh sa te an ni.

Mahse mak tak maiin zu kan han zuar a, kan lo er lawk nasat vang nge ni tehreng ni zu zawrh hma leh zu zawrh hnu danglamna chu hriat a har angreng viau mai a. Zu zawrhna dan duh lotute sawi ang chuan thil a awm ta mang hauh lova. Zu zawrh duhtute pawhin, ‘Thla hnih khat emaw, kum khat chhung emaw chu zu kan zawrh avang hian kan danglam viau pawh a ni thei,’ ti a inthlahrung taka an sawi te pawh chu chutiangin thil a awm ta hauh lova. Zu zawrh hma leh zu zawrh hnu chu chuti tehchiamin a danglam rih lo hle.

Eng pawh ni se hei hi a lawmawm a. Zu zawrh duh lotute hlauhthawn ang thil kha thleng ta tak tak phei se chu zu zawrh duh lotute kha nasa takin an au chhuak lehin a rinawm a. Au chhuah leh ngai lova hetia kan han fel ta titih mai hi chu kawng thenkhatah chuan a hrilhaithlak zawk rum rum a. Mahse chuti zawnga ngaih tur erawh chu a ni lo. Kan vaia tan a lawmawm em em a, kan lawm vek tur a ni. Zu zawrh duh lotute hi misual an ni lova, thil tha leh ram leh mipui tana thil tha duhtu an ni tih kan hrereng tur a ni.

Zu dawr kawta intlar erawh rin ai chuan kan tam ta. Zu zawrhna hmun a tlem vang nge ni dawn ni, thla hnih khat leka intlar tur hmuh zawh mang loh mai inring, zu zawrh duhtute ngaihdan pawh a pel ve tho mai awm mang e a tih theih bawk. Mihring nuai thum velin zu dawr pali vel kan han intawm a nia, intlar ve fe chu ngai tur a ni reng a ni.

He zu zawrh hian thil ṭhenkhat min ngaihtuahtir a :

1. Mi ṭhenkhat hlauhthawn ang em em chuan a nawlpuiin kan lo mawl tawh lo a ni mai awm mang e. Dan anga zu lei, uanpui uchuak leh mawi lo khawpa khawsa rin aiin kan tlem ta a. Kan kohhran hruaituho ngaihdan tam tak ai hi chuan kan mipui sukthlek hi a lo danglam tawh a ni mai lo maw? a tih theih. Heti chung pawha kan ngaihdan hi kan la vuan tlat a nih chuan a buaithlakna lai a awm thei ang tih hi rin ve a tha khawp mai.

2. Zu duh hi kan tam hle a. Zu hi a ṭhain zu ruih te hi a pawi lo ta tihna lam a ni lo, mahse a intu hi kan pung ta hle a nih loh pawhin mihring kan lo tam ve ta tih hriat a tha hle bawk ang. Mi ṭhenkhatin zu in duh mi tlemte anga kan ngaih ang hi chu a lo dik chiah lo a nih a rinawm. Kan zu in ral zat hi a lo tam ta hle a, in lo thei lo anga inngai an tam a, chhiatpui fe fe hmu reng chung pawhin a khapa khap ralah chuan khap hlawhtlin harsat turzia hi ngaihtuah a ngai hlein a lang.

3. Ka hmuh ve phak chinah dan anga zu zawrh tak avanga in thar ta emaw, in nasa zual ta viau emaw an awm pawh ka hre lo. A intu leh a rui ṭhinte chu a ngai reng ni maiin ka hmu a. Ka hresual em lo’ng chu. Zu in lo thin, zu awm thar tak avanga han in ta mai ka hmu lem lova. Chutiang bawkin zu zawrh tak avanga in nasa zual pawh ka hre mang lo. Zawrh hnu leh zawrh hma kha a ngai ang reng ni maiin ka hria. Rui thin ka hmuh te kha chu an la rui thova, rui ngai lo ka hriat te kha chuan zu zawrh tak avangin an chin thar pawh ka hre hek lo.

4. Tunah chuan tunhma aiin zu hlutna a tlahniam ta sauhvin ka hmu. Kan khap chhung zawng kha chuan engemawti takin zu kha a hlu riau mai hian ka hria a. Khapna kan han hlih chiah hian zu hlutna a tlahniam sawtin ka hria a. Tunah chuan IMFL neih hi a hma anga intihtheihna tur thil a ni tawh tlat lo. Hemi han hmuh hi chuan zu zawrh hi a tha chu a ni mai law maw ni le? a tih theih.

Nasa takin kan sawi a, chanchinbu, TV leh thianho inkawm khawmna hmunah te zu zawrh chungchang kan sawi chiam chiam a. Tunah a takin kan han tawng a. Chhuatlai aṭanga meikhu tawn ai chuan thuk bul aṭanga meikhu hmachhawn chu a ziaawm zawk ang deuh hian han zawrh takah chuan a lo tha hlein a lang tih hi ka thu tlukna a ni. Harsatna kan hmachhawn tur anga kan ngaih tam tak kha a lo awm mang reng reng hlei nem maw le!