TAXI AN INTLAN CHHAWK LEH DAWN TA

A vawihnihna tur nge a vawithumna tur ka hre ta chiah lo, Taxi intlan chhawk tur thu a lo awm leh ta rup mai. An intlan chhawk tak tak tur leh tur loh ka la hre ngam chiah lova. An intlan chhawk pawhin eng chen nge an intlan chhawk ang tih a hriat leh loh bawk. Tunah thil awmdan tur hi huai taka sawi chiam chiam pawh a ngamawm lo. Hmanlaia kan sorkar hriat thin ang kha ni lovin tunhnuah chuan sorkar hian a ti dawn emaw tih hi tih leh loh mauh a nei ta zauh zauh.

Taxi chungchang kan buaipui ta viau mai hi a lungchhiatthlak hle mai. A lungchhiatthlak nachhan pawh -

1. Buaipui loh theih loh turin kan khawpui zawh tawk aia tam permit kan han pe phawt a.

2. Taxi kan hriatdan chu khawpui hmun lun leh ualau lai bera ding a, a duh apiangin koh tur niin kan hriat tlat avangin kan khawpuia hmun awl remchang chu Taxi-in an luah fai ta vek a.

3. Taxi tam lutukin a hrin pakhat, Traffic jam a nasat avangin an tlan chhunah hlawk taka an tlan loh chuan an hlawk lo lehzual dawn a. Chuvangin intiam rualin rate sang tak an bituk a, chu lah sorkarin a pawmpui emaw, sorkar rate tuk hi a sang lutuk hrim hrim emaw a ni ang.

Tunhmain an lo intlan chhawk tawh a, a duh lo pawl an awm a, chung mite thu chuan sorkarin a thu a zuk leh a. Tunah intlan chhawk tur a ti leh a. Hlawhtling tak maw.

Hmanni lawka Commercial Vehicle an nawrh laia Taxi Driver thenkhat (ni ngeia rin) chetdan te kha chu a mawi lo uchuak hle mai a. Miin an motor a midang an chuantir tur kha dang thei niin an inngai a, midangte tlawmngaihna leh midangte an duhsakna kha tharum leh zah theih lohna hmanga vau daih an tum a. Khatiang rilru zahthlak kan khawpuia lantirtute kha rorelpui tlakah kei chuan ka ngai lova, thunun chi an ni. A chang leh pawimawh an inti a, a chang leh hna hnuaihnung thawk an inti a, a chang leh chhungkaw eizawngtu an inti a. A dik thei vek a, chu bak pawh an la ni, hnam darthlalang tha tak an ni. Tum khat ka vai thian pakhat Aizawl lo kalin Taxi Driver rinawm a hmuh avanga Mizo min fak nasatzia kha ka la theihnghilh thei lo.

Eizawnna emaw, hna emaw hi a pawimawh vek. A nep ber pawl emaw kan tih pawh hi mamawh hun a lo thlen chuan a lo pawimawh em em vek mai. Rinawm leh dik taka hnathawktute hi an zahawm vek a, rinawm lo leh dik lova thawktu chu hna sang tak anga lang thawktu pawh ni se a ngeiawm zual ting mai a. Pawi a khawih zau ting mai.

A pawimawhna thlur chhuah dawn chuan eng hna pawh hi sawi fe thama pawimawh a ni. Taxi an nih avanga pawimawh bik hliah hliah an ni lo. Taxi awm hma khan kan pi leh pu te an lo khawsa reng tawh. Ram changkangah hetiangin khawpuia motor dinna tur tha lai zawng zawng Taxi-in a luah vek lo. Kan private motor te, kan Taxi te hi hei aia tlem daih hi awm mahse kea kal te kalna tur hi kan tizau ang a, thirsakawr kan lei ang a, chhuahvah tlem theihna turin kan mamawh te kan ngaihtuah ngun mai ang. Tu te private motor emaw, Taxi emaw, Sumo emaw, City Bus emaw, Good Carrier emaw pawimawh bik viau anga dah a, midang aia voh bik hi kan khawpuiin a tlin chiah lo.

Kar hmasa khan Guwahati-ah ka zu kal a, Taxi dinna chu buaipui a lo ngai tawh hauh lova. Khawvel hmun hrang hranga an hman, Computer network, Uber hmangin mahni awmna zawn zawn atangin Taxi kan ko ringawt a. Minit nga chhungin a lo thleng a. A chuan man a tlawm zawk a, a fai zawk a, a khalhtu te an hawihhawm bawk. Chutihlai chuan kan Taxi Driver te hian Aizawl khawpui kawngpui zau lai zawng zawng hi an dinna atana zuah vek tur ang deuhva ngaihtuahna an nei hi kan tawmpui kher a tul lo. Hetiangin dinna hmun bik zau tak hi nei lo mahse Taxi hmanga eizawnna hi a chhe mai dawn lo. Thakthing Bazarah member 90 aia tam an awm a, a dinna hmuna ruatah chuan Taxi sawm pawh a ding thei lawi lo. Chumiin a hril chian em em chu panga dang dinna tur pek belh ringawt chu thil awmze nei lo a ni a, pahnih khat dinna lak thensak pawh a pawi tehchiam lo tihna a ni. Taxi Stand hrim hrim te hi tihbo te pawh a ngaihtuah theih. Bazara din theihna awm zat leh an member zat hi han khaikhin ila a intuha lo hle ang.

Eng pawh ni se Taxi a ni emaw, Sumo a ni emaw, Bus a ni emaw, eng lirthei chungchang pawh Traffic awmphung leh kan khawpui tlin tawk ngaihtuahin hotuten an rel tur a ni a. An rel ang chu pawm loh ngawt theih tur a ni lo. A reltu turin an rel tha ngam lo hi kei ka buaina a ni.