KAN BUAINA GAS TIHCHINGPEN HI

Kan Aizawl khawpui daifem, chhangchhe bawngbawr a chhungkaw intihhlimna (family picnic) phak tawk lekah hian tute’n emaw Gas an pawngsual mup mup mai a. An tihdan chu sawi loh, an thlalak chenin Central YMA lamin an khawrh leuh a. Chung thlalak te chu mipui hmuhah an chhuah chuai chuai a. Hlawh nei lo, tlawmngaih chhuaha thawktuten chutianga an tih tawh hnu pawh chuan kan sorkar hian he pawngsual thubuai hi a la chingfel chiah lo niin a lang a. “Rorelna dik chu luipui angin luang se.....” tih thuvawn intarna pindanah nalh zet zetin kan la thu rimtui vung vung mai!

Designation leh Title nei fumfe lo chunga thusawitu atana sawm hlawh ber Pu Vanneihtluanga chuan, a enthlatu insiam a, a tichingpentu motor permit cancel a, a driver licence chhuhsak mai hian thla khat chhungin a rem mai a ring. He a rindan tawmpuitu hi kan tam khawp ang.

Motor hi duh duh phurh nan hman ngawt a thiang lova. Phurh loh tur phurh nana hman motor ding kumhlun ta engemawzat chu Seling daia Custom Check Gate bulah kan hmu. Pawikhawihna motor hi tlan thei lova siam tur hian Police SP chin chunglam chuan a ngaihna an hre vek ang - thupek chauh a ni an mamawh. Cowboy hunlaia Sheriff thinrim tawh laklawhin, ‘I thubuai tur chu Saloon aṭanga Office kan panna kawngah hian ka ngaihtuah chhuak teuh mai ang,’ a tih angrengin Gas tihchingpen nana hman motor te chu tlan thei lova siam turin sorkar leh kan dan hre mi te hi kan Rules leh Acts te hian a thuam ngei ang.

Mi pahnih, Mualkhang Gas Driver Association a an President (Vanlalzawna) leh an Secretary (Lalrinliana Sailo) te’n an Gas phurh YMA-ten an check thin chu an duh loh thu an sawi ngam a. “Kan tihtur tha taka kan ti lai min lo tikhawtlaiin kan zahawmna min tihbawrhbansak hi kan ngaithiam lo,” ti lama tan khawh ta lo chuan, “Thuneitu ni si lovin min lo check hi kan duh lo,” an ti ringawt ngam a. Driver dang kal chhuak tur te pawh an dang a. Tlem laia Guwahati a ka nula lepchiah hmuh kha min ti hrechhuak. “Vaipa chumi khami nen in awmdun kha,” an ti a. Ani chuan diau hauh lo hian, “I daw bawk! Chumi a ni lo, chumi zawk chu a nih kha!” a ti!

1. Mualkhang Gas Driver Association hian member engzatnge an neih a, tute nge ni? Engtikah nge General Body Meeting an neih a, an inthlan? An Dan bu-ah Gas an phurhna kawnga check theitu tur chungchang sawi thawina te an telh reng em? Hetianga mipui leh kan aiawhtu anga kan lo ngaih kumkhua Central YMA meuh thiltih dan pawh dodal ngam khawp pawl chu engnge an Registration Number?

2. He pawl chanchin hi sorkar hian a ngaihven tur a ni a, a chhui tur a ni.

3. He pawl hi phuahchawp, mimal huaisar thiltih mai mai te a lo nih hlauh chuan Vanlalzawna leh Lalrinliana Sailo te hi Police Station an panpuina kalkawngah pawh an thubuai tur chu a ngaihtuah chhuah chawp teuh theihin a rinawm. Rambuai laia Ngaizawl VCP-in, “MNF ka ni a ti lo, Sipikal ka ni a ti mauh a nih kha,” a tih ang ringawt mai a, “Kan Association-in.....” tih ngawt mai hi enfiah a ngaiin ka hria.

Heng Gas tichingpentu, zahna chang hre hauh lo te lak ata mipui humhim tur leh diknain ro a relna hmuna Mizoram siam tur hian Supply Department te leh Police te hian an tihtur chanve aia tam hret chauh pawh ti se kan Gas tihchingpen thawnthu hi keini ang mi tlahlang satliahin kan khel kan khel tawh lo tur. Eng vangin?

(1) A hmun hma a hnaivai lutuk.

(2) An khawih chingpenna bial a zim.

(3) An khawih chingpenna hmun a ualau.

(4) A titute hi an finna lam aiin an huaisarna lo chu chutia mak han tih tham a awm lo.

(5) Mihring inrawlh an tlem.

(6) An khawih hun hi a inkar a zim.

(7) An pawi khawih tuartu hi kan tam lutuk.

(8) He pawi khawihna hi sorkar tan darthlalang a ni.

A titute hi man chhuah har chu sawi loh, Central YMA man chhuah sa ringawt pawh hrem mawlh mawlh tham a awm tawh. Kan Gas bur chhinna tihdanglam a, khawih chingpen harsa lehzual tura siam chungchang lam lam te han ngaihtuah chuan ran khuahkhirh Policy hmang lova Huan Hung Policy kalpui kan ang ka ti.

Kan Opposition lam lah hi bengchhen huna ngawih chat ching angin kan hmu zo tawh. Opposition nih pawh hi a lo tlin loh theih viau dawnin a lang.

Rorelna dik leh felna luipui te hi amaha a lo luan hun hi sakuh ser nghahin kan nghak dawn nge a thawhin kan thawk chhuak dawn?

He Gas tihchingpen hi kan sorkar hian a tihreh theih loh chuan kan Central YMA emaw hnenah thuneihna pe sela, a nih loh leh a tireh theitu tura rin hnenah ‘Open Tender’ chhuahin kan ngamna tawkin kan chhang thei ang em? Inchona kutkawr chu mipuiin kan theh thla a, sorkar hian engtinnge a chhar dawn? Nge, kan kutkawr theh thlak hi VIP Light vuah motor-a chuang chungin kan hotute hian an tlan pel vut vut dawn le?

Gas tihchingpen hi - Bang rawh se!