PARKING FEE TENDER

Tunhnaiah Aizawl Municipal Corporation-in Parking fee khawntu thlan thuah cheng nuai 32 lai an hloh tih thu chanchinbuah a lo chhuak a.

A awmziaah chuan cheng nuai 32 a sang zawka chhangtu pe lovin a chhangtu hniam zawk an pe tihna a ni ber mai awm e.

AMC lam insawi fiahnaah chuan a chhang sang ber hnenah pek tur tih a awm lo, AMC hian a chhang sang ber hnenah lo pawh a pe thei.... chuti khati.... tih ang vel a ni.

Tender chungchangah hian mipui leh Official tam takin kan hriat tur chu Tender chhan dan turah hian, ‘A chhang hniam ber (Tuna Parking Fee-ah chuan hemi letling chiah hian a chhang sang ber tih a ngai ve thung) hnenah pek ngei tur a ni tiin a hnuaia hming ziaktu hi a intiam lo......... ‘Chhanna chu figure leh tawngkam (words) a ziah tur a ni......... Thla hnih chhungin tihpuitlin tur a ni,’ tih te leh thu delhkilh dangte a inziak vek bawk thin.

Tender-ah hian a chhang sang ber hnena pek tur a ni kher lo tih thu delhkilh awm mahse a nihna takah chuan a chhang sang ber hnena an pek loh chuan AMC hi khin theih an ni a, rorelna hmun (court)-ah chuan kal ngat ila thiam loh an chan a rinawm.

Sorkarin Tender a chhuah nachhan ber hi chu sorkar a hlawk theih nan leh lei tur lam chi a nih chuan a rate tlawm thei ang bera a tha thei ang ber a lei theih nan te, hralh tur a nih chuan a man khawm tam thei ang bera hralh a, sorkar a hlawk theih nan te a ni a. Chubakah thil dik lo leh tu duhdan emaw ang ringawt a thil tha lo tihna awm thei lo tura thiltih a nih theih nana Tender hi koh a ni thin.

Chuti si eng vangin nge ‘A chhang hniam/sang ber hnenah pek ngei ngei tur a ni kher lo,’ ti anga a inziah ve ziah si?

Chutianga ziah a nih loh chuan bungraw tha lo (bungraw lei tur a nih chuan) tak kha hniam deuhvin tuin emaw man tlawm tein a rawn chhang tlat ang a. Chumi chu tender contract chu pek a nih loh chuan dan bawhchhiatna a ni dawn tlat a, chutianga bungraw hman tlak loh lei ngei ngei tulna lak atanga inven nan zawk chuan ‘A chhang hniam/sang ber hnena pe turin a intiam lo,’ tih tawngkam hi belh mai a ni.

Chhan tha tawk tak, han ngaihtuah leh han en mai pawha fel lohna engemaw a awm a nih loh chuan bungraw supply turah chuan dan zawh kim, a bungruaah pawh sawiselna tur lang chiang tak awm a nih si loh chuan a chhang hniam ber (a tlawm thei ang bera supply theitu) chu thlan ngei ngei tur a ni. Office tawngkama, ‘You are requested....’ tih a nih tawh chuan tih ngei ngei tur tihna ang a ni a. Chutiang chiah chuan, ‘The undersigned is not bound to accept....’ a tih vang ringawt hian duh duh pek thiang a ni hauh lo.

Sorkar hna ka thawh ve lai khan IAS leh IAS ve lo danglamna chiang tak ka hmuh pakhat chu Tender chungchangah a ni. IAS-ho reng reng chuan (keini chuan bungraw lei lam chauh kan tih thin avangin) a chhang hniam ber kha an thlang tawp mai a. Minister-in rawn sawi mahse engmah an ngaihtuah set set lo. IAS ve lo te kha chuan Minister te an hlau fova, anih loh pawhin tu te emaw duhsak an tum fo. A man tlawm thei ang bera ‘supply’ theitu khan indelhkilhna thu engemaw a bawhchhia a nih ngawt loh chuan a chhang hniam ber kha IAS val chuan an thlang ngei ngei thin. IAS ve lo chuan mawlmang takin, ‘Kan duh duh kan ti thei alawm,’ tih vang ringawtin a chhang hniam ber ni lo kha thlang thei tlata inhriatna an nei a. A tak pawhin chutiang chu ka tawng nual. Min khingtu awmin thil fel lo awm se khatianga duh duh thlang theia inhria kha chu an tal buai fe ang. Chutianga buai zauh zauh chu a awm reng bawk.

Parking Fee chungchangah pawh hian kan AMC insawi fiahna hi a pawm nahawm lovin a lang a. A chhang sang ber khan Tender Clause engemaw tihkim loh a nei a, an puang chhuak lo a nih chuan thudang, chutiang a nih si lohva midang an lo pe a nih chuan a khing peih an awm phawt chuan kan AMC hi a dingchang hauhvin ka ring lo.

Sorkar pawisa hi fimkhur taka hman tur a ni a, sorkar hek theihna tur zawnga thil kalpui reng reng hi a dik lo, a chhan pawh pawisa zawng zawng hi Department pakhat ta ngawt a ni lova, sorkar pawisa a nih tawh chuan mipui pawisa tihna a ni. Sorkar Officer thenkhatin, ‘Kan Department pawisa, Central atanga kan hmuh chuti khati.....’ tiin an duh duh a an tih theih emaw te an ti hial thinin a lang a. Hei hi ngaihdan dik lo a ni. Sorkar pawisa zawng zawng hi mipui hamthatna ‘public interest’ veka hman tur a ni a. Fimkhur lo taka hman hi sorkar hnathawkte tih hauh loh tur a ni. Chumi hrethiam lo sorkar hnathawk chu a hna chelh a san poh leh a mawl lian ting mai a, a manganthlak a, a ti peih awm se khing a, chachhuah a, an thiltih dik lo chu a hring a hrana an hriatfiah theih nana hrem zat zat tur a ni. Chu chu ram changkanga an kal dan a ni a, ram a hnufual a, mipui kan mawl poh leh sorkar hnathawk leh pawisa bawm tlang vuantu kan hlau thin.

Kan vengah ringawt pawh AMC pawisa hmanga vantlang thatna tur, luikawr siam mam tur te, kawng zauhna tur lungrem te, thlanmual cheina tur te, kawng sialna tur te leh hna thawh tur dang kan ngah tehlul nen cheng nuai 32 kha chu uiawm tak a ni. Khatiang ui nachang hre lo leh ui duh lo te kan lo nih hlauh chuan a zia lo ngawt ang le. Mamawh sawi apianga, ‘Pawisa a awm lo,’ ti chung reng si a sorkar pawisa ren chuang lotute hi chu mipui tan chuan hnawk awlsam tak an ni.